ഇന്ത്യയിലെ ഏറ്റവും സുരക്ഷിത വാഹനം ഏതാണ്​? ​നെക്​സോണിനെ പിൻതള്ളി പുതിയ താരോദയം

ഇന്ത്യക്കാർ വാഹനം വാങ്ങു​േമ്പാൾ അവസാന പരിഗണന നൽകുന്നതെന്തിനാണ്​. ഒരു സംശയവും വേണ്ട അത്​ സുരക്ഷക്കാണ്​. എത്ര കിട്ടും(മൈലേജ്​) എന്നതാണ്​ നമ്മുടെ ഒന്നാമത്തെ ചോദ്യമെങ്കിൽ വിറ്റാൽ എത്ര കിട്ടും എന്നതായിരിക്കും രണ്ടാമത്തെ പരിഗണന. ഇതുകേട്ടാൽ വണ്ടി വാങ്ങുന്നതുതന്നെ വിൽക്കാനാണെന്ന്​ തോന്നും.

മ​െറ്റാരു പ്രധാന ആശങ്ക സർവീസ്​ ചെയ്യു​േമ്പാൾ കൊടുക്കേണ്ടിവരുന്ന പണത്തെചൊല്ലിയാണ്​. പതിനായിരം കിലോമീറ്റർ ഒാടിയായാലും പത്ത്​ പൈസ മുടക്കേണ്ടിവന്നാൽ അത്​ നമ്മുക്ക്​ സഹിക്കില്ല. സൗജന്യ സർവീസ്​ കഴിഞ്ഞാൽ പിന്നെ സ്വയം ചികിത്സയാണ്​. ഏതെങ്കിലും നാടൻ വർക്​ഷോപ്പിലെത്തി ഒായിൽ മാറി ഒാടെടാ ഒാട്ടമായിരിക്കും. തരം കിട്ടിയാൽ എ.സി ഒാഫാക്കുക, എ.സി ഫിൽറ്റർ മാറണമെന്ന്​ പറഞ്ഞാൽ നമ്മുടെ പണം തട്ടാനാണെന്ന്​ കഥയിറക്കുക, നൂല്​ കണ്ടാലും ‘ഇനിയും പോകും’ എന്ന്​ പറഞ്ഞ്​ ടയറിനെ പീഢിപ്പിക്കുക തുടങ്ങി വിചിത്ര ശീലങ്ങളുള്ളവരാണ്​ നാം.

ഇനി സുരക്ഷയുടെ കാര്യമെടുത്താലൊ. എ.ബി.എസ്​, ഇ.ബി.ഡി എന്നൊക്കെ കേട്ടാൽ ഇംഗ്ലീഷ്​ അക്ഷരങ്ങൾ തലതിരിച്ച്​ എഴുതിയതെന്നല്ലാതെ ഇതൊരു അത്യാവശ്യമാണെന്ന തോന്നൽ നമ്മുക്കില്ല. ഇൗ സാഹചര്യത്തിലാണ്​ സുരക്ഷയെന്ന ഏറ്റവും സുപ്രധാനമായ സംഗതിയെപറ്റി നാം ചർച്ച ചെയ്യുന്നത്​.

ജി.എൻ.സി.എ.പി റേറ്റിങ്ങ്​
ലോകത്ത്​ വാഹന സുരക്ഷയുടെ ആധികാരിക രേഖയായി കണക്കാക്കുന്നത്​ ഗ്ലോബൽ എൻ.സി.എ.പി റേറ്റിങ്ങിനെയാണ്​. ന്യൂ കാർ അസസ്​മ​െൻറ്​ പ്രോഗ്രാം എന്നതാണ്​ എൻ.സി.എ.പിയുടെ പൂർണ്ണ രൂപം. ആഗോളതലത്തിൽതന്നെ ക്രാഷ്​ ടെസ്​റ്റുകൾ നടത്തുകയും വാഹനങ്ങൾക്ക്​ സ്​റ്റാർ റേറ്റിങ്ങ്​ നൽകുകയും ചെയ്യുന്ന സംവിധാനമാണിത്​.

അടുത്തകാലത്താണിവർ ഇന്ത്യയിലെ വാഹനങ്ങൾ കാര്യമായി പരിശോധിക്കാൻ തുടങ്ങിയത്​. ആദ്യമൊക്കെ ക്രാഷ്​ ടെസ്​റ്റ്​ കഴിഞ്ഞാൽ മൊത്തത്തിൽ പെറുക്കിക്കൂട്ടി കൊണ്ടുപോകാൻ പാകത്തിനായിരുന്നു നമ്മുടെ വാഹനങ്ങൾ ബാക്കിവരാറുള്ളത്​. ഇതിനൊരു മാറ്റമുണ്ടാക്കിയത്​ ടാറ്റ നെക്​സോണാണ്​. രാജ്യത്ത്​ നിർമിക്കപ്പെടുന്ന പാസഞ്ചർ കാറുകളിൽ ആദ്യത്തെ ഫൈവ്​ സ്​റ്റാർ റേറ്റിങ്ങുള്ള കാർ  എന്ന ഖ്യാതി ലഭിച്ചത്​ നെക്​സോണിനാണ്​.

ഇത്​ പറയു​േമ്പാൾ നാം ഒരുകാര്യം മനസിലാക്കണം. കാറി​​െൻറ ക്രാഷ്​ ടെസ്​റ്റ്​ പലതരത്തിലാണ്​ നടത്തുക. മുതിർന്ന യാത്രക്കാർ, കുട്ടി യാത്രക്കാർ, വഴിയാത്രക്കാർ എന്നിവരുടെ സുരക്ഷയാണ്​ പരിശോധിക്കുന്നത്​. മുന്നിൽ നിന്നും വശങ്ങളിൽ നിന്നും ക്രാഷ്​ ടെസ്​റ്റുകൾ നടത്തും. നെക്​സോണിന്​ ഫൈവ്​ സ്​റ്റാർ റേറ്റിങ്ങ്​ ലഭിച്ചത്​ മുന്നിലെ യാത്രക്കാരുടെ കാര്യത്തിൽ മാത്രമാണ്​.

കുട്ടികളുടെ സുരക്ഷയിൽ മൂന്ന്​ സ്​റ്റാറായിരുന്നു നെക്​സോണി​​െൻറ സമ്പാദ്യം. എങ്കിലും ചരിത്രത്തിൽ ആദ്യമായാണ്​ ഏതെങ്കിലും ഒരു വിഭാഗത്തിലെങ്കിലും ഒരു ഇന്ത്യൻ കാർ ഫൈവ്​ സ്​റ്റാർ സുരക്ഷയെന്ന അനിവാര്യ കടമ്പ മറികടക്കുന്നത്​. 

നെക്​സോണിനെ മറികടന്ന താരം
2020ലെ ജി.എൻ.സി.എ.പി ക്രാഷ്​ ടെസ്​റ്റിൽ നെക്​സോണിനും മുകളിൽ ഒരു ഇന്ത്യൻ നിർമിത വാഹനം ഇടംപിടിച്ചു. മഹീന്ദ്രയുടെ എക്​സ്​.യു.വി ത്രീ ഡബിൾ ഒയാണാ വാഹനം. ഇതൊരു ചെറു എസ്​.യു.വിയാണ്​. മുതിർന്നവരുടെ സുരക്ഷയിൽ ഫൈവ്​ സ്​റ്റാറും കുട്ടികളുടെ സുരക്ഷയിൽ നാല്​ സ്​റ്റാറുമാണ്​ എക്​സ്​.യു.വിയുടെ സമ്പാദ്യം​. നെക്​സോണിനേക്കാൾ ഒരു സ്​റ്റാർ കൂടുതലെന്നർഥം.

ഏഴ്​ എയർബാഗുകൾ, ഇലക്​ട്രിക്​ സ്​റ്റെബിലിറ്റി പ്രോഗ്രാം, ഹിൽ സ്​റ്റാർട്ട്​ അസിസ്​റ്റ്​, എ.ബി.എസ്​, ഇ.ബി.ഡി, കോർണർ ബ്രേക്കിങ്ങ്​ കൺട്രോൾ, നാല്​ ഡിസ്​ക്​ ബ്രേക്ക​ുകൾ തുടങ്ങി ആധുനിക സംവിധാനങ്ങളുള്ള ഏറ്റവും ഉയർന്ന വേരിയൻറിനാണ്​ ഇത്രയും സുരക്ഷ ലഭിച്ചിരിക്കുന്നത്​. ക്രാഷ്​ ടെസ്​റ്റിൽ ടാറ്റയുടെ മേധാവിത്വമാണ്​ കാണാനായത്​.

ആദ്യ അഞ്ച്​ സ്​ഥാനങ്ങളിൽ മൂന്നെണ്ണം ടാറ്റക്കും രണ്ടെണ്ണം മഹീന്ദ്രക്കുമാണ്​. രണ്ടാമത്​ നെക്​സോൺ, മൂന്നാമത്​ ആൽട്രോസ്​, നാലാമത്​ തിയാഗൊയും തിഗോറും ഇടംപിടിച്ചു. അഞ്ചാം സ്​ഥാനം മഹീന്ദ്രയുടെ മരാസോക്കാണ്​. മാരുതിയുടെ ഏറ്റവും സുരക്ഷയുള്ള വാഹനം ബ്രെസ്സ എസ്​.യു.വിയാണ്​.