പ്രീമിയം ഹാച്ചിൽ പോരു കടുക്കുന്നു; വിപണി പിടിക്കാൻ അൽട്രോസും

​മാരുതി സുസുക്കി ബലേനോ, ഹ്യുണ്ടായ്​ ഐ 20... ഇന്ത്യയിലെ പ്രീമിയം ഹാച്ച്​ബാക്ക്​ വിപണിയിൽ എതിരാളികളില്ലാതെ കുതിച്ച രണ്ട്​ താരങ്ങളാണിവർ. ഫോക്​സ്​വാഗണി​​െൻറ പോളോയും ഹോണ്ടയു​െട ജാസും ​സെഗ്​മ​െൻറിലുണ്ടെങ്കിലും വിൽപന കണക്കിൽ ഐ 20യോടും ബലേനോയോടും നേരിട്ട്​ ഏറ്റുമുട്ടാൻ മാത്രം കരുത്തൻമാരല്ല. ഈ നിരയിലേക്കാണ്​ ടാറ്റയുടെ പ്രീമിയം ഹാച്ച്​ അൽട്രോസ്​ എത്തുന്നത്​. പാസഞ്ചർ കാർ വിപണിയിൽ ആദ്യ വരവിൽ അടിതെറ്റിയെങ്കിലും ടാറ്റയുടെ രണ്ടാം വരവ്​ രാജകീയമായിരുന്നു. ടി​യാഗോ, ടിഗോർ, നെക്​സോൺ, ഹാരിയർ തുടങ്ങിയ മോഡലുകളുമായിട്ട്​ അരങ്ങു തകർക്കുകയാണ്​ ടാറ്റ. ഈ നിരയിലേക്ക്​ എത്തുന്ന അൽട്രോസും ചില്ലറക്കാരനല്ല.

ടാറ്റയുടെ ഏറ്റവും പുതിയ ആൽഫ പ്ലാറ്റ്​ഫോം അടിസ്ഥാനമാക്കിയാണ്​ അൽട്രോസ്​ എത്തുന്നത്​. ബി.എസ്​ 6 നിലവാരത്തിലുള്ള പെട്രോൾ, ഡീസൽ എൻജിനുകളുമായിട്ടാണ്​​ അൽട്രോസി​​െൻറ വരവ്​. 1.2 ലിറ്റർ പെട്രോൾ എൻജിൻ 86 പി.എസ്​ പവറും 113 എൻ.എം ടോർക്കും നൽകും. 1.5 ലിറ്റർ 90 പി.എസ്​ പവറും 200 എൻ.എം ടോർക്കുമാണ്​ ഡീസൽ എൻജിനിൽ നിന്ന്​ ലഭിക്കുക.

ഡ്യുവൽ എയർബാഗ്​, എ.ബി.എസ്​, ഇ.ബി.ഡി, സീറ്റ്​ ബെൽറ്റ്​ റിമൈൻഡർ, സെൻഡ്രൽ ലോക്ക്​, സ്​പീഡ്​ സെൻസിങ്​ ഓ​ട്ടോ ഡോർ ലോക്ക്​, ചൈൽഡ്​ ലോക്ക്​, ഇമ്മോബിലൈസർ, പെരിമെ​ട്രിക്​ അലാറാം സിസ്​റ്റം, കോർണർ ലൈറ്റ്​, റിയർ ഡിഫോഗർ എന്നിവയെല്ലാമാണ്​ അൽട്രോസിലെ പ്രധാന സവിശേഷതകൾ.

ഏഴ്​ ഇഞ്ച്​ ഫ്ലോട്ടിങ്​ ടച്ച്​ സ്​ക്രീൻ ഡിസ്​പ്ലേയാണ്​ ഇൻറീരിയറിലെ പ്രധാന സവിശേഷത. സ്​മാർട്ട്​ ഫോൺ കണക്​ടിവിറ്റി, വോയ്​സ്​ കമാൻറ്​, നാല്​ സ്​പീക്കറുകളുമായി ഹർമാൻ ഓഡിയോ സിസ്​റ്റം എന്നിവ ഇൻറീരിയറിലെ മറ്റ്​ പ്രത്യേകതകളാണ്​.

അഞ്ച്​ സ്​പീഡ്​ മാനുവൽ ഗിയർബോക്​സിൽ മാത്രമാണ്​ അൽട്രോസ്​ വിപണിയിലേക്ക്​ എത്തുക. ഇക്കോ, സിറ്റി എന്നീ ഡ്രൈവിങ്​ മോഡുകളും അൽട്രോസിൽ ഒരുക്കിയിട്ടുണ്ട്​. 21,000 രൂപ നൽകി അംഗീകൃത ഡീലർഷിപ്പുകൾ വഴി അൽട്രോസ്​ ബുക്ക്​ ചെയ്യാം.