യെസ്ഡികൾ ഈ മാസം 13ന് എത്തും; അറിയാം, ചെക്​ ലെജൻഡിന്‍റെ ചരിത്രം

'യെസ്​ഡി' എന്ന വാക്കിനൊപ്പം പലവിധമായ വികാരങ്ങളും ഇന്ത്യക്കാരുടെ മനസിൽ കൂടിക്കലർന്നിട്ടുണ്ട്.​ നാം ഇന്ന്​ ഉപയോഗിക്കുന്ന ബൈക്കുകളേക്കാൾ പ്രാകൃതവും സാ​ങ്കേതികത്തികവില്ലാത്തതുമായ വാഹനമായിരുന്നു പഴയ യെസ്​ഡികൾ. എങ്കിലും ഓർമകൾ ഏറെ ദീപ്തമായതിനാൽ യെസ്​ഡിയെന്ന്​ കേൾക്കുമ്പോൾ ആരാധകർക്ക്​ ഉണ്ടാകുന്ന ആവേശത്തിന്​ കുറവില്ല. ഈ ബ്രാൻഡ്​ മൂല്യത്തെ വിൽപ്പനക്ക്​ വയ്ക്കാനാണ്​ മഹീന്ദ്രയുടെ സബ്​സിഡിയറി കമ്പനിയായ ക്ലാസിക്​ ലെജൻഡ്​ യെസ്​ഡി എന്ന വ്യാപാര നാമത്തെ വീണ്ടും വിപണിയിൽ അവതരിപ്പിക്കുന്നത്​.

ഈ മാസം 13ന്​ പുതിയ യെസ്​ഡികൾ വീണ്ടുമെത്തുമെന്നാണ്​ കമ്പനി അറിയിച്ചിരിക്കുന്നത്​. സമൂഹമാധ്യമത്തിലൂടെയാണ്​ ഇതുസംബന്ധിച്ച സൂചന നൽകിയത്. ഒന്നല്ല പകരം മൂന്ന്​ പുതിയ യെസ്‍ഡി ബൈക്കുകൾ ഇന്ത്യൻ വിപണിയിലെത്തിക്കുമെന്നാണ് പ്രതീക്ഷിക്കുന്നത്.

യെസ്​ഡിയുടെ ചരിത്രം

ജാവ, യെസ്​ഡി എന്നീ പേരുകൾ അഭേദ്യമായ പരസ്പരബന്ധമുള്ളവയാണ്​. ജാവ എവിടെ നിന്നാണ് വരുന്നത്, യെസ്ഡി അതിൽ നിന്ന് എങ്ങനെ വ്യത്യാസപ്പെട്ടിരിക്കുന്നു എന്ന്​ നമ്മുക്കൊന്ന്​ അന്വേഷിക്കാം. ചെക്ക് റിപ്പബ്ലിക്കിലെ മോട്ടോർ സൈക്കിൾ നിർമ്മാതാക്കളായിരുന്നു ജാവ. ജനേസെക്​, വാണ്ടർവെർക്​ എന്നിവരുടെ പേരുകളിൽ നിന്നാണ്​ ജാവ രൂപം കൊള്ളുന്നത്​. 1929ൽ ജാവ എന്ന ബ്രാൻഡ് നിലവിൽവന്നു. നാസി അധിനിവേശത്തിൻകീഴിലായിരുന്ന ചെക്കോസ്ലോവാക്യയിലാണീ മോട്ടോർസൈക്കിൾ ബ്രാൻഡ് ജനിച്ചത്.

ജാവയെ ഇന്ത്യയിലേക്ക് കൊണ്ടുവന്നത് ഫറോഖ് കെ ഇറാനി, റുസ്‌തം എസ് ഇറാനി എന്നിവർ ചേർന്നാണ്. ഇവരാണ്​ ജാവയെ യെസ്​ഡി എന്ന്​ പുനർനാമകരണം ചെയ്തത്​. 1961ൽ മൈസൂരുവിൽ യെസ്‌ഡി മോട്ടോർസൈക്കിളുകൾ നിർമ്മിക്കുന്നതിനുള്ള ഒരു ഫാക്ടറിയും സ്ഥാപിച്ചു. ഇന്ത്യക്കാരുടെ മനസ്സിൽ ജാവ യെസ്‌ഡി എന്ന പേര്​ പതിയാനിടയാക്കിയ മോഡലാണ്​ ജാവ 250. ഇതിനെ എ-ടൈപ്പ് എന്നാണ് വിളിച്ചിരുന്നത്. പിന്നീട് യെസ്ഡി 250 ബി-ടൈപ്പ്, യെസ്ഡി 350 ട്വിൻ, യെസ്ഡി മൊണാർക്​ എന്നിവ പുറത്തിറങ്ങി.

യെസ്ഡി 175, യെസ്ഡി 60 കോൾട്ട് തുടങ്ങിയ ചെറിയ സി.സി മോപ്പഡുകളും ബ്രാൻഡ് നിർമ്മിച്ചു. എന്നിരുന്നാലും, 1978 മുതൽ 1996 വരെ മൈസൂർ പ്ലാന്റിൽ ഉത്പാദിപ്പിച്ച റോഡ്‌കിങ്​ ആയിരിക്കണം ഏറ്റവും ജനപ്രിയമായ യെസ്‌ഡി. 16 എച്ച്‌പിയും 24 എൻഎം ടോർക്കും ഉൽപ്പാദിപ്പിച്ച ടു-സ്ട്രോക്ക് 250 സിസി എഞ്ചിനിലാണ് ഇത് വന്നത്. നാല് സ്പീഡായിരുന്നു ഗിയർബോക്‌സ്. മണിക്കൂറിൽ 120 കി.മീ വേഗതയിൽവരെ ഇവ സഞ്ചരിച്ചിരുന്നു. സെമിഓട്ടോമാറ്റിക് ക്ലച്ച്, ഡ്യുവൽ എക്‌സ്‌ഹോസ്റ്റുകൾ, ഇന്റഗ്രേറ്റഡ് ഗിയർ ഷിഫ്റ്റർ, കിക്ക്‌സ്റ്റാർട്ടർ എന്നിവ റോഡ്​കിങിന്‍റെ എടുത്തുപറയേണ്ട സവിശേഷതകളിൽ ഉൾപ്പെടുന്നു.

റോയൽ എൻഫീൽഡ് ബുള്ളറ്റിനും ക്ലാസിക്കിനുമെതിരെ വമ്പിച്ച മത്സരമായിരുന്നു റോഡ്‌കിങ്​ നടത്തിയത്​. യെസ്ഡികൾ ഇന്ത്യയിൽ വളരെ ജനപ്രിയമായിരുന്നു. എന്നാൽ രാജ്യത്തിന്‍റെ വാഹന നയങ്ങളിൽ വന്ന മാറ്റം ബ്രാൻഡിനെ നിലനിർത്തുന്നത് ബുദ്ധിമുട്ടാക്കി. 90കളുടെ അവസാനമായപ്പോഴേക്ക്​ യെസ്​ഡി ഫാക്ടറി പൂട്ടേണ്ടി വന്നു. ഭാരം കുറഞ്ഞതും കൂടുതൽ ഇന്ധനക്ഷമതയുള്ളതുമായ മോട്ടോർസൈക്കിളുകൾ വിപണിയിൽ എത്തി. ടു-സ്ട്രോക്​ എഞ്ചിൻ നിയമപരമല്ല എന്നുവന്നതോടെ യെസ്​ഡികൾ കാലയവനികക്കുള്ളിൽ മാഞ്ഞു.