ഒാട്ടത്തിനിടെ പറന്നുയർന്ന്​ കാർ; ഇത്​ ക്ലീൻ വിഷൻ എയർ കാർ

ഒാട്ടത്തിനിടെ ചിറകുവിരിച്ച്​ പറന്നുയരുന്ന കാർ കണ്ടിട്ടു​ണ്ടോ? കഥകളിലും സിനിമകളിലും നാം കണ്ടിരുന്ന അത്തരമൊരു സാങ്കൽപ്പിക വാഹനം യാഥാർഥ്യമാക്കിയിരിക്കുകയാണ്​ സ്ലോവാക്യൻ കമ്പനിയായ ക്ലീൻ വിഷൻ. വാഹനത്തിന്​ പേരിട്ടിരിക്കുന്നത്​ എയർ കാർ എന്നാണ്​. കാറിൽ നിന്ന്​ വിമാനമായി പരിണമിക്കാൻ എയർ കാറിന്​ മൂന്ന്​ മിനിട്ട്​ മതി. 30 വർഷമായി പറക്കും കാർ വികസിപ്പിക്കുന്നതിന് കഠിനമായി പരിശ്രമിക്കുന്ന കമ്പനിയാണ് ക്ലീൻ വിഷൻ​. എയർകാർ ഉപയോഗിച്ച് അവരുടെ സ്വപ്​നം യാഥാർഥ്യമാക്കുമെന്നാണ്​ സൂചന.

കരയിലും വായുവിലും പ്രവർത്തിക്കാൻ എയർകാർ പ്രാപ്​തമാണ്. 1,100 കിലോഗ്രാം ഭാരമുള്ള വാഹനത്തിന്​ 200 kg ഭാരംവഹിക്കാനുമാവും. 300 മീറ്ററിൽ ടേക്ക് ഓഫിന്​ വാഹനം സജ്ജമാകും. മണിക്കൂറിൽ 200 കിലോമീറ്റർ വേഗത കൈവരിച്ചാൽ എയർകാറിന്​ നിങ്ങളെ നിലത്തു നിന്ന് ആകാശത്തേക്ക് കൊണ്ടുപോകാനുമാകും. 'ക്ലീൻവിഷൻ കമ്പനി വികസിപ്പിച്ച പുതിയ തലമുറ ഫ്ലൈയിംഗ് കാർ 3 മിനിറ്റിൽ വിമാനമായി മാറും'-ക്ലീൻവിഷൻ അവരുടെ വാഹനത്തി​െൻറ വീഡിയോ പങ്കിട്ട് യൂട്യൂബിൽ എഴുതി.

വിമാനമായി മാറുന്നതിനും പറന്നുനുയരുന്നതിനുംമുമ്പ് എയർകാർറോഡിലൂടെ ഓടുന്നതും വീഡിയോയിൽ കാണാം. അവസാന എയർകാർ പ്രോട്ടോടൈപ്പ് 2019 ലാണ്​ പൊതുജനങ്ങൾക്കായി അവതരിപ്പിച്ചത്​. സ്ലൊവാക്യയിലെ പിയസ്റ്റാനി വിമാനത്താവളത്തിൽ അടുത്തിടെ അതി​െൻറ പരീക്ഷണ പറക്കലുകൾ നടത്തി. അതിൽ രണ്ട് ടേക്ക്ഓഫുകളും രണ്ട് ലാൻഡിംഗുകളും ഉൾപ്പെടുന്നു. നാലെണ്ണവും വിജയിച്ചിരുന്നു.പ്രൊഫസർ സ്റ്റെഫാൻ ക്ലീൻ നടത്തുന്ന കമ്പനിയാണ്​ ക്ലീൻ‌വിഷൻ.