Begin typing your search above and press return to search.
exit_to_app
exit_to_app
Homechevron_rightHot Wheelschevron_rightOverdrivechevron_rightവമ്പൻ ഓഫറുമായി ബെൻസ്...

വമ്പൻ ഓഫറുമായി ബെൻസ് അധികൃതർ വന്നിട്ടും കൊടുത്തില്ല; ഉത്രാടം തിരുനാളിന്റെ അപൂർവ കാർ എം.എ. യൂസഫലിക്ക്

text_fields
bookmark_border
Mercedes  Benz 180 t car
cancel
Listen to this Article

തിരുവനന്തപുരം: ഉത്രാടം തിരുനാൾ മാർത്താണ്ഡ വർമ ഉപയോഗിച്ചിരുന്ന ബെൻസ്​ കാർ അപൂർവ സൗഹൃദത്തിന്‍റെയും ആത്മബന്ധത്തി​ന്‍റെയും പ്രതീകമായി ലുലു ഗ്രൂപ്പ് ചെയര്‍മാന്‍ എം.എ. യൂസഫലിക്ക്​​ കൈമാറും. കാർ യൂസഫലിക്ക്​ കൈമാറാൻ മാർത്താണ്ഡവർമ ആഗ്രഹിച്ചിരുന്നു.

അബൂദബിയിലെ വസതിയി​ലെത്തി സന്ദർശിച്ച വേളയിൽ എം.എ. യൂസഫലിയെ മാർത്താണ്ഡ വർമ കൊട്ടാരത്തിലേക്ക്​ ക്ഷണിച്ചിരുന്നു. ക്ഷണം സ്വീകരിച്ച്​ 2012ൽ യൂസഫലി പട്ടം കൊട്ടാരത്തിലെത്തിയപ്പോഴാണ്​ ത‍ന്‍റെ പ്രിയ​പ്പെട്ട 'ബെൻസ്​ 180 T' കാർ സമ്മാനിക്കാനുള്ള ആഗ്രഹം ഉത്രാടം തിരുനാൾ നേരിട്ടറിയിച്ചത്​.

അദ്ദേഹം വിടവാങ്ങിയോടെ ഏറെക്കാലമായി കാർ മകൻ പത്മനാഭ വർമയുടെയും ഉത്രാടം തിരുനാൾ മാർത്താണ്ഡ വർമ ഫൗണ്ടേഷ‍ന്‍റെയും സംരക്ഷണയിലാണ്​. ഉത്രാടം തിരുനാളി​​ന്‍റെ ആഗ്രഹം പോലെ വൈകാതെ തന്നെ കാർ യൂസഫലിക്ക്​ സമ്മാനിക്കാനാണ്​ രാജകുടുംബത്തിന്‍റെ തീരുമാനം.

ചരിത്രത്തിനപ്പുറം നിറമുള്ള നിരവധി ഓർമകളുടെ പ്രതീകമായാണ്​ ആറ്​ പതിറ്റാണ്ടിലധികം പഴക്കമുള്ള സി.എ.എൻ -42 ബെൻസ്​ കാറിനെ രാജകുടുംബം കാണുന്നത്​.

1950 കളിൽ 12,000 രൂപക്കാണ്​ ജർമനിയിലെ സ്റ്റുട്ട്​ഗർട്ടിൽ നിർമിതമായ ഈ കാർ രാജകുടുംബം സ്വന്തമാക്കുന്നത്​.

കർണാടകയിലായിരുന്നു രജിസ്​ട്രേഷൻ. ഒരു മിനിറ്റിനുളളിൽ ഒരു മൈൽ വേഗത്തിൽ യാത്ര നടത്തിയിരുന്ന മാർത്താണ്ഡ വർമക്ക്​​ 'മൈൽ എ മിനിറ്റ്​' എന്ന വിളിപ്പേര്​ നേടിക്കൊടുത്തതും ഈ ബെൻസ്​ തന്നെ. സ്വയമോടിച്ചും യാത്രക്കാരനായുമടക്കം 40 ലക്ഷം മൈലുകൾ മാർത്താണ്ഡ വർമ സഞ്ചരിച്ചെന്നാണ്​ കണക്ക്​. ഇതിൽ 23 ലക്ഷം മൈലുകളും ഈ ബെൻസ്​ കാറിലാണ്​.


താണ്ടിയ ദൂരം അടയാളപ്പെടുത്തി ബെൻസ്​ കമ്പനി നൽകിയ മെഡലുകളും കാറിനു മുന്നിൽ പതിപ്പിച്ചിട്ടുണ്ട്​. 85-ാം വയസ്സിലും മാർത്താണ്ഡ വർമ ഈ കാർ ഓടിച്ചിരുന്നു.

മോഹവില നൽകി കാർ​ വാങ്ങാൻ അക്കാലത്ത്​ പലരും എത്തിയിരുന്നു. ന്യൂജൻ കാറുകളെ വരെ പിന്നിലാക്കി റെക്കോഡ്​ ദൂരം സഞ്ചരിച്ച ഈ ബെൻസി​നെ അഭിമാന ചിഹ്നമാക്കി മാറ്റാൻ ബെൻസ്​ കമ്പനി തന്നെ ആഗ്രഹിച്ചു. കാർ തിരിച്ചെടുത്ത്​ പകരം രണ്ട്​ കാറുകൾ നൽ​കാമെന്നറിയിച്ച്​ ജർമൻ ആസ്ഥാനമായ കമ്പനിയിലെ ഉന്നതർ തന്നെ സമീപിച്ചിരുന്നു.

അതേസമയം, കാര്‍ അമൂല്യമായി സൂക്ഷിക്കുമെന്ന് എം.എ. യൂസഫലി പറഞ്ഞു. കാര്‍ തിരുവനന്തപുരത്ത് സൂക്ഷിച്ച് പൊതുജനങ്ങള്‍ക്ക് കാണാനുള്ള സൗകര്യമൊരുക്കുമെന്നും അദ്ദേഹം കൂട്ടിച്ചേർത്തു.

Show Full Article
TAGS:benz​ 180 T uthradam thirunal Yusuff Ali MA 
News Summary - Rare benz car of Uthradam Thirunal M.A. To Yusufali
Next Story