ലോകത്തിലെ ആദ്യ പറക്കും കാർ, പാൽ വി ലിബർട്ടി തയ്യാർ; ഇന്ത്യയിലും നിർമിക്കാൻ ധാരണ

പറക്കും കാർ നിർമാണത്തിൽ ഗവേഷണം നടത്തിയിരുന്ന ഡച്ച്​ കമ്പനിയായ പാൽ വി തങ്ങളുടെ ആദ്യ ഉത്​പന്നം വിപണിക്കായി തയ്യാറായതായി അറിയിച്ചു. ലോകത്തിലെ ആദ്യ പറക്കും കാറായ ലിബർട്ടിയാണ്​ പാൽ വി റോഡുകൾ‌ക്കായി സജ്ജമാക്കിയത്​. ലിബർട്ടി അടുത്തിടെ കർശനമായ യൂറോപ്യൻ റോഡ് പ്രവേശന പരീക്ഷണങ്ങളിൽ വിജയിച്ചിരുന്നു. ഇപ്പോൾ ഒൗദ്യോഗിക ലൈസൻസ് പ്ലേറ്റ് ഉപയോഗിച്ച് റോഡിലിറങ്ങാൻ വാഹനത്തിന്​ അനുമതി ലഭിച്ചിരിക്കുകയാണ്​.ഇരട്ട എഞ്ചിനുകളാണ് ഫ്ലൈയിംഗ് കാറി​െൻറ കരുത്ത്. ഒരേ സമയം രണ്ടുപേർക്ക് വാഹനത്തിൽ യാത്രചെയ്യാനുമാകും.

പരീക്ഷണ നാളുകൾ

2020 ഫെബ്രുവരി മുതൽ ടെസ്റ്റ് ട്രാക്കുകളിൽ നടത്തിയ കർശനവും വിപുലവുമായ ഡ്രൈവ് ടെസ്റ്റ് പ്രോഗ്രാമിനെ തുടർന്നാണ്​ വാഹനത്തിന് റോഡിലിറങ്ങാൻ അനുമതി ലഭിച്ചത്​. ​ അതിവേഗ സഞ്ചാരം, ബ്രേക്ക്, ശബ്ദ മലിനീകരണ പരിശോധന എന്നിവ പരിശോധനകളിൽ ഉൾപ്പെട്ടിരുന്നു. 'ഞങ്ങൾ വർഷങ്ങളായി റോഡ് അധികൃതരുമായി സഹകരിക്കുന്നു. അതി​െൻറ വിജയമാണ്​ ഇപ്പോൾ ലഭിച്ച അനുമതി'-പാൽ വി സി.ടി.ഒ മൈക്ക് സ്റ്റെക്കലെൻബർഗ് പറയുന്നു.

നികുതിയൊഴികെ 399,000 ഡോളർ (ഏകദേശം 2.52 കോടി രൂപ) ആണ്​ ലിബർട്ടിയുടെ വില. 2012 ൽ വാഹനത്തി​െൻറ ടെസ്റ്റ് പ്രോട്ടോടൈപ്പ് പറന്നുയർന്നിരുന്നു. 2015 മുതൽ യൂറോപ്യൻ ഏവിയേഷൻ സേഫ്റ്റി ഏജൻസി(EASA)യുടെ ഏവിയേഷൻ സർട്ടിഫിക്കേഷനിലൂടെ കടന്നുപോകുന്നുണ്ട്​. വാഹനത്തി​െൻറ അന്തിമരൂപം 2022 ൽ മാത്രമേ പുറത്തിറക്കുകയുള്ളൂ. വാഹനത്തി​െൻറ ഡെലിവറികൾ അതിനുശേഷം മാത്രമേ ആരംഭിക്കൂ. വാഹനത്തിനായി ഇനിയും 1,200-ലധികം ടെസ്റ്റ് റിപ്പോർട്ടുകൾ പൂർത്തിയാക്കേണ്ടതുണ്ട്. അവസാന 150 മണിക്കൂർ ഫ്ലൈറ്റ് ടെസ്റ്റിംഗ് നടക്കുന്നത്​ ഇതിനുശേഷമായിരിക്കും.

ഇന്ത്യയിലും നിർമിക്കും

ഡ്രൈവ് മോഡിൽ പരമാവധി 160 കിലോമീറ്റർ വേഗതയാണ് വാഹനത്തിനുള്ളത്​. ഒമ്പത് സെക്കൻഡിൽ പൂജ്യത്തിൽ നിന്ന് 100 കിലോമീറ്റർ വേഗം കൈവരിക്കാൻ കഴിയും. ഫ്ലൈറ്റ് മോഡിൽ പരമാവധി 180 കിലോമീറ്റർ വേഗതയിൽ സഞ്ചരിക്കും. 500 കിലോമീറ്റർ പറക്കാനും കഴിയും. 660 കിലോഗ്രാം മാത്രം ഭാരമുള്ളതിനാൽ ഒരു സ്പോർട്​സ്​ കാർ പോലെയാണ് ലിബർട്ടി പ്രവർത്തിക്കുന്നതെന്ന്​ ടെസ്റ്റ് ഡ്രൈവർ ഹാൻസ് ജൂർ പറയുന്നു.

വാഹനത്തിനായി ബുക്ക്​ചെയ്​ത്​ കാത്തിരിക്കുന്നവർ നിരവധിയാണ്​. അവരിൽ ചിലർ ഇതിനകം പാൽ വി ഫ്ലൈഡ്രൈവ് അക്കാദമിയിൽ ഒരു 'ഗൈറോപ്ലെയ്ൻ' ഫ്ലൈയിംഗ് ലൈസൻസിനായി പരിശീലനം ആരംഭിച്ചിട്ടുമുണ്ട്​. പാൽ വി ഗുജറാത്ത്​ സംസ്​ഥാനവുമായി ഇതിനകം ഒരു ധാരണാപത്രം ഒപ്പുവെച്ചിട്ടുണ്ട്​. 2021 മുതൽ സംസ്​ഥാനത്ത്​ വാഹനം ഉത്​പാദിപ്പിക്കുകയാണ്​ ലക്ഷ്യം. സംസ്ഥാനത്ത് നിന്ന് നിരവധി യൂറോപ്യൻ രാജ്യങ്ങളിലേക്ക് വാഹനം കയറ്റുമതി ചെയ്യുമെന്നാണ് റിപ്പോർട്ട്.