Begin typing your search above and press return to search.
exit_to_app
exit_to_app
Homechevron_rightHot Wheelschevron_rightOverdrivechevron_rightകാത്തിരിക്കാൻ...

കാത്തിരിക്കാൻ കാരണങ്ങളുണ്ട്​, ഓല ഇലക്​ട്രിക്കൽസ്​ ജൂലൈയിൽ എത്തും

text_fields
bookmark_border
Ola to launch its electric scooter in July in India
cancel

രാജ്യത്തെ പ്രമുഖ ഓൺലൈൻ ടാക്​സി സർവിസ്​ കമ്പനിയായ ഓല തങ്ങളുടെ ആദ്യത്തെ ഇലക്​ട്രിക്​ സ്​കൂട്ടർ ഈ വർഷം ജൂലൈയിൽ വിപണിയിലെത്തിക്കുമെന്ന്​ പ്രഖ്യാപിച്ചു. 400 നഗരങ്ങളിലായി ഒരു ലക്ഷം ചാർജിങ്​ പോയിന്‍റുകൾ ഉൾപ്പെടുത്തി ഹൈപ്പർചാർജർ നെറ്റ്‌വർക്ക് സ്ഥാപിക്കാനുള്ള ശ്രമത്തിലാണ് നിലവിൽ ഓല. തമിഴ്‌നാട്ടിൽ ആദ്യത്തെ ഇലക്ട്രിക് സ്‌കൂട്ടർ ഫാക്ടറി സ്ഥാപിക്കുന്നതിന് 2,400 കോടി രൂപ നിക്ഷേപവും കമ്പനി പ്രഖ്യാപിച്ചിരുന്നു. ഫാക്​ടറി പൂർത്തിയാകുമ്പോൾ പതിനായിരത്തോളം തൊഴിലവസരങ്ങൾ സൃഷ്ടിക്കുമെന്നാണ്​ പ്രതീക്ഷ.


ലോകത്തിലെ ഏറ്റവും വലിയ സ്കൂട്ടർ നിർമാണ കേന്ദ്രമായിരിക്കുമിത്​. തുടക്കത്തിൽ വാർഷിക ശേഷി 2 ദശലക്ഷം യൂനിറ്റ് ആയിരിക്കും. 'ജൂണിൽ ഞങ്ങൾ ഫാക്ടറി തുറക്കും. 2 ദശലക്ഷം വാഹനങ്ങൾ നിർമിക്കാനുള്ള ശേഷി ഫാക്​ടറിക്കുണ്ടാകും. ഫാക്ടറി സ്ഥാപിച്ചശേഷം ഒരു മാസത്തിനുള്ളിൽ സ്​കൂട്ടർ വിപണിയിൽ എത്തിക്കും'- ഓല ചെയർമാനും ഗ്രൂപ്പ് സിഇഒയുമായ ഭവിഷ് അഗർവാൾ പറഞ്ഞു.


ഓല ഇ.വി

സ്​റ്റൈലിഷ്​ ഇ.വി സ്​കൂട്ടറാണ്​ ഓല. 1860 എം.എം ആണ്​ വാഹനത്തിന്‍റെ നീളം. 700 എം.എം വീതിയും 1155 എം.എം ഉയരവുമുണ്ട്​. 1345 എം.എം ആണ്​ വീൽബേസ്​. ആറ്​ കിലോവാട്ടിന്‍റെ ഇലക്​ട്രിക്​ മോ​േട്ടാറാണ്​ സ്​കൂട്ടറിനെ ചലിപ്പിക്കുക. ഊരിമാറ്റാൻ സാധിക്കുന്ന ബാറ്ററിയുടെ പരമാവധി റേഞ്ച്​ 240 കിലോമീറ്ററാണ്​. 3.9 സെക്കൻഡ്​ കൊണ്ട്​ പൂജ്യത്തിൽനിന്ന്​ 45 കി.മീറ്റർ വേഗത കൈവരിക്കാനാകും. 100 കിലോമീറ്ററാണ്​ പരമാവധി വേഗത. എൽ.ഇ.ഡി ഹെഡ്‌ലാമ്പും എൽ.ഇ.ഡി ടേൺ ഇൻഡിക്കേറ്ററുകളുമെല്ലാം വാഹനത്തെ കൂടുതൽ സ്​റ്റൈലിഷാക്കി മാറ്റുന്നു.

ലോകത്തിലെ ഏറ്റവും വലിയ ഇരുചക്രവാഹന ഫാക്ടറി തമിഴ്‌നാട്ടിൽ നിർമിക്കുകയാണ് ഓല. 500 ഏക്കറിലായാണ്​ ഫാക്​ടറി ഒരുക്കുന്നത്​. പ്രാരംഭഘട്ടത്തിൽ പ്രതിവർഷം രണ്ട്​ ദശലക്ഷം യൂനിറ്റ് വാഹനങ്ങൾ ഇവിടെ നിർമിക്കും. ഓലയുടെ ഇലക്ട്രിക് സ്കൂട്ടറുകളുടെയും ഇരുചക്ര വാഹനങ്ങളുടെയും ആഗോള ഉൽ‌പാദന കേന്ദ്രമായി ഇവിടം​ മാറും. യൂറോപ്പ്, യു.കെ, ലാറ്റിൻ അമേരിക്ക, ഏഷ്യ പസഫിക്, ആസ്‌ട്രേലിയ, ന്യൂസിലൻഡ് എന്നിവയുൾപ്പെടെ അന്താരാഷ്​ട്ര വിപണികളിലേക്ക്​ ഇവിടെനിന്ന്​ വാഹനം കയറ്റുമതി ചെയ്യും. ആംസ്റ്റർഡാം ആസ്ഥാനമായ ഏറ്റെർഗൊ ബി.വി എന്ന കമ്പനിയെ കഴിഞ്ഞ മേയിൽ ഓല ഇലക്ട്രിക് സ്വന്തമാക്കിയിരുന്നു. ഇതോടെയാണ്​ വൈദ്യുത സ്കൂട്ടർ രൂപകൽപ്പനക്കും നിർമാണത്തിനുമുള്ള അധികശേഷി ഓലക്ക്​ ലഭിച്ചത്​.


ഹൈപ്പർ ചാർജർ ശൃഘല

400 നഗരങ്ങളിൽ ഒരു ലക്ഷം ചാർജിങ്​ പോയിന്‍റുകൾ സ്​ഥാപിക്കുന്ന വമ്പൻ പദ്ധതിയും ഓല പ്രഖ്യാപിച്ചിട്ടുണ്ട്​​. അഞ്ച് വർഷത്തിനുള്ളിൽ ഇന്ത്യയിലുടനീളം ഹൈപ്പർചാർജർ ശൃംഖല സ്ഥാപിക്കാനാണ്​ ഓലയുടെ നീക്കം. ചാർജിങ്​ സ്റ്റേഷനുകൾ ഓല ഇലക്ട്രിക് വാഹനങ്ങൾക്ക് മാത്രമായുള്ളതായിരിക്കും. വെറും 18 മിനുട്ട്​കൊണ്ട്​ ഓല സ്​കൂട്ടറുകൾ 50 ശതമാനം ചാർജ്​ ചെയ്യാൻ ഹൈപ്പർ ചാർജർ പോയിന്‍റുകൾവഴി സാധിക്കും.

ഹൈപ്പർചാർജർ ശൃംഖലയുടെ ഭാഗമായി ഇന്ത്യയിലെ 400 നഗരങ്ങളിലായി 1,00,000 ചാർജിംഗ് സ്റ്റേഷനുകൾ സ്ഥാപിക്കാനാണ്​ ഓല ഇലക്ട്രിക് ലക്ഷ്യമിടുന്നത്​. ലോകത്തിലെ ഏറ്റവും വലുതും സാന്ദ്രവുമായ വൈദ്യുത ഇരുചക്ര വാഹന ചാർജിങ്​ ശൃംഖല ഇതായിരിക്കുമെന്ന് കമ്പനി അവകാശപ്പെടുന്നു. ആദ്യ വർഷത്തിൽ 100 നഗരങ്ങളിലായി 5,000 ചാർജിങ്​ പോയിന്‍റുകൾ ആരംഭിക്കും. പിന്നീടിത്​ ഘട്ടംഘട്ടമായി വർധിപ്പിക്കും. രാജ്യത്ത് നിലവിലുള്ള ഇലക്ട്രിക് വെഹിക്കിൾ ചാർജിങ്​ ഇൻഫ്രാസ്ട്രക്ചറിനെ ഇത്​ ഇരട്ടിയാക്കുമെന്ന് ഓല പറയുന്നു. തങ്ങളുടെ ഹൈപ്പർചാർജർ ശൃംഖല അതിവേഗ ഇരുചക്ര വാഹന ചാർജിങ്​ നെറ്റ്‌വർക്കായിരിക്കുമെന്നും ഓല അവകാശപ്പെടുന്നുണ്ട്​.


ചാർജിങ്​ പോയിന്‍റിന് 18 മിനിറ്റിനുള്ളിൽ ഒരു ഓല ഇലക്ട്രിക് സ്കൂട്ടറിൽ 50 ശതമാനം ചാർജ്​ ചെയ്യാൻ സാധിക്കും. ഇതിലൂടെ വാഹനത്തിനെ 75 കിലോമീറ്റർ പരിധിയിലേക്ക് എത്തിക്കാനും കഴിയും. ഐടി പാർക്കുകൾ, മാളുകൾ, കഫേകൾ തുടങ്ങിയ സ്ഥലങ്ങളിൽ ചാർജിങ്​ സ്റ്റേഷനുകൾ സ്ഥാപിക്കാനാണ് പദ്ധതിയിടുന്നത്​. ബാറ്ററിയുടെ ചാർജിങ്​ നില ഓല ഇലക്ട്രിക് ആപ്ലിക്കേഷൻ വഴി സ്മാർട്ട്‌ഫോണിൽ കാണാൻ കഴിയും. ആപ്പ്​ ഉപയോഗിച്ച്​ വൈദ്യുതിക്ക്​ പണമടയ്ക്കാനുള്ള സൗകര്യവും ഉണ്ടാകും.

Show Full Article
TAGS:Ola ola electric scooter ola ev 
Next Story