ട്രെയിനിൽ മോശം ഭക്ഷണം വിളമ്പി; യാത്രക്കാരന്‍റെ പരാതിയിൽ കേറ്ററിങ്​ ഏജൻസിക്ക്​ പിഴ

യാത്രക്കാരന്‍റെ പരാതിയിൽ കേറ്ററിങ്​ കമ്പനിക്ക്​ പിഴശിക്ഷ വിധിച്ച്​ റെയിൽവേ കാറ്ററിങ്​ ആൻഡ് ടൂറിസം കോർപ്പറേഷൻ (ഐആർസിടിസി). അനൂജ് കുമാർ ഗുപ്ത (35) നൽകിയ പരാതിയിലാണ് നടപടി. 5000 രൂപയാണ്​ പിഴയായി ചുമത്തിയത്​.

കുടുംബാംഗങ്ങൾക്കൊപ്പം പുരിയിൽ നിന്ന് മുംബൈയിലേക്ക്​ ട്രെയിനിൽ യാത്ര ചെയ്യുന്നതിനിടെയാണ്​ യുവാവിന്​ ദുരനുഭവം ഉണ്ടായത്​. അച്ഛൻ ദീപക് ഗുപ്ത, അമ്മ രമാ ഗുപ്ത, സഹോദരൻ അനേഷ് ഗുപ്ത എന്നിവർക്കൊപ്പമാണ് കോപാർ ഖൈരാനെ നിവാസിയായ അനൂജ് കുമാർ ഗുപ്ത യാത്ര ചെയ്തത്. നാലംഗ കുടുംബം ട്രെയിനിൽവച്ച്​ വാങ്ങിയ വെജിറ്റേറിയൻ ഭക്ഷണത്തിന്​ ഗുണനിലവാരമില്ലെന്നായിരുന്നു പരാതി. കൂടാതെ ഭക്ഷണത്തിനൊപ്പം നൽകുന്ന തൈര്​ നൽകിയില്ലെന്നും പരാതിയിൽ പറഞ്ഞിരുന്നു. കാണാതായ തൈര് 30 രൂപയ്ക്ക് കച്ചവടക്കാർ പ്രത്യേകം വിൽക്കുകയാണെന്നും ഗുപ്ത ആരോപിച്ചിരുന്നു.

‘പുരിയിൽ നിന്ന് ലോകമാന്യ തിലക് ടെർമിനസിലേക്ക് (LTT) സെപ്തംബർ 27നാണ്​ ഞങ്ങൾ യാത്ര ചെയ്തത്​. ഐആർസിടിസി വെബ്‌സൈറ്റ് പ്രകാരം ഭക്ഷണത്തിന്‍റെ നിരക്ക് 80 രൂപയായിരുന്നു. എന്നാൽ ട്രെയിനിൽ ഇതേ ഭക്ഷണം 150 രൂപയ്ക്കാണ്​ വിറ്റിരുന്നത്​. തുടർന്ന്​ പാൻട്രി കാർ മാനേജർ സന്തോഷ് റാത്തോഡിനെ സമീപിക്കുകയും അദ്ദേഹം ഭക്ഷണം 80 രൂപയ്ക്ക് നൽകുകയും യയ്തു. ഞങ്ങൾ നാല്​ പൊതികളാണ്​ വാങ്ങിയത്​’-അനൂജ് കുമാർ ഗുപ്ത പറയുന്നു.

‘ഭക്ഷണം മോശം നിലവാരമുള്ളതായിരുന്നു. ഐആർസിടിസി മെനുവിൽ ഓരോ പൊതിയിലും നാല് ചപ്പാത്തി എന്നാണ്​ പറഞ്ഞിരുന്നത്​. എന്നാൽ ഞങ്ങളുടെ താലിയിൽ രണ്ട് ചപ്പാത്തി മാത്രമേ ഉണ്ടായിരുന്നുള്ളൂ. മെനുവിൽ കട്ടിയുള്ള പരിപ്പിന് പകരം വെള്ളമുള്ള പരിപ്പാണ് ലഭിച്ചത്. തൈര് ഉണ്ടായിരുന്നില്ല. ഈ ട്രെയിനിൽ രണ്ട് ചപ്പാത്തി മാത്രമാണ് നൽകിയതെന്നും തൈര് സ്റ്റോക്ക് തീർന്നെന്നും കച്ചവടക്കാരൻ ഞങ്ങളോട് പറഞ്ഞു. പയറ്​ ആവശ്യത്തിന്​ ലഭിക്കാത്തതിനാൽ പരിപ്പ് വെള്ളമാണെന്നും പറയുകയായിരുന്നു. വിൽപ്പനക്കാരൻ തന്റെ പേര് വെളിപ്പെടുത്താൻ വിസമ്മതിക്കുകയും ചെയ്തു’-ഗുപ്ത പറഞ്ഞു. കാണാതായ തൈര് 30 രൂപയ്ക്ക് ഒറ്റ ഇനമായി വിൽക്കുന്ന കച്ചവടക്കാരെ പിന്നീട് കണ്ടതായും ഗുപ്ത പറയുന്നു.

ഗുണനിലവാരമില്ലാത്ത ഭക്ഷണത്തിനും തൈര് നൽകാത്തതിനും കരാറുകാരനെതിരെ കർശന നടപടി സ്വീകരിക്കണമെന്ന് ആവശ്യപ്പെട്ടാണ് ഗുപ്ത​ ഐആർസിടിസി വെബ്‌സൈറ്റിൽ പരാതി നൽകിയത്​.