വാഹനം വാടകക്ക്​ കൊടുക്കുന്ന പദ്ധതി വ്യാപിപ്പിച്ച്​ മാരുതി; കൊച്ചി ഉൾപ്പടെ 19 നഗരങ്ങളിൽ ലഭ്യമാകും

മാരുതിയുടെ വെഹിക്കിൾ സബ്​സ്​ക്രിപ്​​ഷൻ പദ്ധതി കൂടുതൽ നഗരങ്ങളിലേക്ക്​ വ്യാപിപ്പിച്ചു. രാജ്യ​െത്ത നാല് നഗരങ്ങളിലേക്കാണ്​ അവസാനമായി പദ്ധതി വിപുലീകരിച്ചത്​. ജയ്​പുർ, ഇൻഡോർ, മംഗലാപുരം, മൈസൂർ എന്നിവിടങ്ങളിലാണ്​ പുതുതായി സബ്​സ്​ക്രിപ്​ഷൻ വരിക. ഇതോടെ 19 നഗരങ്ങളിൽ മാരുതി സബ്​സ്​ക്രിപ്​ഷൻ ലഭ്യമാകും. മാരുതി സുസുകി അരീന, നെക്സ എന്നിവയിൽ നിന്നുള്ള മോഡലുകൾ പദ്ധതിയിൽ ഉൾപ്പെടുന്നു.

വാഗൺ ആർ, സ്വിഫ്റ്റ്, ഡിസയർ, വിറ്റാര ബ്രെസ്സ, എർട്ടിഗ എന്നിവ മാരുതി സുസുകി അരീന ഡീലർഷിപ്പുകളിലും പ്രീമിയം കാറുകളായ ഇഗ്നിസ്, ബലേനോ, സിയാസ്, എസ്-ക്രോസ്, എക്സ് എൽ 6 എന്നിവ നെക്​സയിൽ നിന്നും സബ്​സ്​ക്രിപ്ഷനായി ലഭ്യമാണ്. ഓറിക്‌സ്, എഎൽഡി ഓട്ടോമോട്ടീവ്, മൈൽസ് എന്നിവരുമായി ചേർന്നാണ്​ മാരുതി പദ്ധതി നടപ്പാക്കുന്നത്​.

എന്താണ്​ സബ്​സ്​ക്രിപ്​ഷൻ?

പുത്തൻ വാഹനം വാടകക്ക്​ സ്വന്തമാക്കുന്ന പദ്ധതിയാണ്​ സബ്​സ്​ക്രിപ്​ഷൻ എന്ന്​ അറിയപ്പെടുന്നത്​. വാഹനം വാടകക്ക്​ എടുക്കുന്നതിനേക്കാൾ കൂടുതൽ നടപടിക്രമങ്ങൾ ഇതിന്​ ഉണ്ടെന്ന്​ മാത്രം. വാഹനം വാങ്ങാതെ തന്നെ ഉപഭോക്താക്കൾക്ക്​ ഉടമസ്ഥാവകാശം സബ്​സ്​ക്രിപ്​ഷൻ വഴി ലഭിക്കും. ഇത്​ ഉപഭോക്താക്കളുടെ സാമ്പത്തിക ഭാരം കുറയ്ക്കുകയും വാഹന നിർമാതാക്കൾക്ക് പുതിയ ബിസിനസ്​ അവസരം നൽകുകയും ചെയ്യും. വാഹന ഉപയോഗ ചാർജുകൾ, രജിസ്ട്രേഷൻ ചാർജുകൾ, മെയിൻറനൻസ്, ഇൻഷുറൻസ് മുതലായവ ഉൾപ്പെടുന്ന പ്രതിമാസ വാടക നൽകിയാണ്​ വാഹനം സ്വന്തമാക്കേണ്ടത്​.

താരതമ്യേന പുതിയ ആശയം ആണെങ്കിലും, കാർ സബ്‌സ്‌ക്രിപ്‌ഷൻ ഇന്ത്യയിൽ നിരവധി നിർമാതാക്കൾ നടപ്പാക്കിയിട്ടുണ്ട്​. മാരുതി 2020 ജൂലൈയിലാണ്​ സബ്​സ്​ക്രിപ്​ഷൻ പ്രോഗ്രാം ആരംഭിച്ചത്​. കേരളത്തിൽ നിന്ന്​ കൊച്ചി മാത്രമാണ്​ നിലവിൽ മാരുതി സബ്​സ്​ക്രിപ്​ഷൻ പദ്ധതിയുള്ള ഒരേയൊരു നഗരം. 24, 36, 48 മാസങ്ങളുള്ള കാലാവധികളിലാണ്​ പണം അടക്കേണ്ടത്​. കാലാവധി പൂർത്തിയായ ശേഷം ഉപഭോക്താവിന് വാഹനം മാറ്റാനോ, നവീകരിക്കാനോ വിപണി വിലയ്ക്ക് കാർ വാങ്ങാനോ ഉള്ള സൗകര്യവുമുണ്ട്​.