കോടികൾ വിലയുള്ള സൂപ്പർ കാറുകൾ നിരത്തിനിർത്തി ഇടിച്ചു പൊളിച്ചു; ഇതാണ്​ കാരണം

കോടികൾ വിലയുള്ള സൂപ്പർ കാറുകൾ നിരത്തിനിർത്തി ബുൾഡോസർ ഉപയോഗിച്ച്​ ഇടിച്ച്​ തകർക്കുക. കേട്ടുകേൾവിയില്ലാത്ത ഇൗ നടപടി ഉണ്ടായിരിക്കുന്നത്​ ഫിലിപ്പീൻസിലാണ്​. മക്​ലാരൻ 620 ആർ, പോർഷെ 911, ബെൻറ്​ലെ ഫ്ലൈയിംഗ് സ്​പർ ഉൾപ്പടെയുള്ള 21 വാഹനങ്ങളാണ്​ നശിപ്പിച്ചത്​. ഏകദേശം 10 കോടി രൂപ വിലവരും ഇവക്ക്​. ഇൗ നിയമ നടപടിക്കുപിന്നിൽ ഫിലിപ്പീൻസ്​ കസ്​റ്റംസ്​ വിഭാഗമാണ്​. രാജ്യത്തേക്ക്​ അനധികൃതമായി ഇറക്കുമതി ചെയ്​ത വാഹനങ്ങൾ പിടി​െച്ചടുത്ത്​ നശിപ്പിക്കെയാണ്​ കസ്​റ്റംസ്​ അധികൃതർ ചെയ്​തത്​. നേരത്തേയും ഇത്തരത്തിൽ 17 ആഡംബര കാറുകൾ നശിപ്പിച്ച്​ ഫിലിപ്പീൻസ്​ കസ്​റ്റംസ്​ വാർത്തകളിൽ നിറഞ്ഞിരുന്നു.

മെഴ്‌സിഡസ് എസ്‌എൽ‌കെ, ലോട്ടസ് എലിസ്, പരിഷ്​കരിച്ച ഹ്യുണ്ടായ് ജെനസിസ് കൂപ്പെ, ടൊയോട്ട സോളാര, 14 മിത്സുബിഷി എസ്​.യു.വികൾ എന്നിവയും അനധികൃത വാഹനങ്ങളിൽ ഉണ്ടായിരുന്നു. കസ്​റ്റംസ് അധികൃതർ പറയുന്നത്​ അനുസരിച്ച്, ഈ ആഡംബര കാറുകളെല്ലാം വിവിധ കൺസൈമെൻറുകളായാണ് രാജ്യത്തേക്ക് കടത്തിയത്. 2018 മുതൽ 2020 വരെയുള്ള കാലയളവിലാണ്​ ഇവ പിടിച്ചെടുത്തത്. ഫിലിപ്പീൻസ്​ പ്രസിഡൻറ്​ റോഡ്രിഗോ റോ ഡ്യുർട്ടെ കള്ളക്കടത്ത് വാഹനങ്ങൾ നശിപ്പിക്കുമെന്ന്​ നേരത്തേ മുന്നറിയിപ്പ്​ നൽകിയിരുന്നു.

ഇൗ വർഷം ഫെബ്രുവരിയിൽ നശിപ്പിച്ച വാഹനങ്ങളിൽ ബി‌എം‌ഡബ്ല്യു സെഡ് 1, ഫെരാരി 360 സ്പൈഡർ, ലംബോർഗിനി ഗല്ലാർഡോ എന്നിവയുൾപ്പെട്ടിരുന്നു. ആഡംബര വാഹനങ്ങൾ നശിപ്പിക്കുന്നതിനുപകരം ലേലം ചെയ്​ത്​ കിട്ടുന്ന പണം സാമൂഹിക നന്മക്ക്​ ഉപയോഗിക്കണമെന്ന്​ വാദിക്കുന്ന ഒരു വിഭാഗവും രാജ്യത്തുണ്ട്​.