അത്ര ചീപ്പല്ല ഇൗ ഹോട്ട്​ വീൽസ്​; നിലവാരത്തിലും സത്യസന്ധതയിലും വിട്ടുവീഴ്​ച്ചയില്ല

ഹോട്ട് വീൽസ് എന്നത്​ പ്രശസ്​തമായ കളിപ്പാട്ട നിർമാതാവാണ്​. പ്രമുഖ വാഹനങ്ങളുടെ സ്കെയിൽഡ് സൈസ് ടോയ് മോഡലുകൾ ഉണ്ടാക്കുന്നതിൽ പ്രശസ്​തരാണിവർ. അമേരിക്കൻ ഇലക്ട്രിക് സൈക്കിൾ നിർമാതാക്കളായ സൂപ്പർ 73-മായി സഹകരിച്ച്​ പുതിയ ഇ.വി നിർമിച്ചിരിക്കുകയാണ്​ ഹോട്ട്​വീൽസ്​ ഇപ്പോൾ. സൂപ്പർ 73-ആർഎക്​സ്​ എന്ന മോഡലാണ്​ പുനർനിർമിച്ചത്​.

ആകെ 24 യൂനിറ്റ് ഹോട്ട് വീൽസ് എക്​സ്​ സൂപ്പർ 73-ആർഎക്​സ്​ ആണ്​ ഹോട്ട്​വീൽസ്​ പുറത്തിറക്കിയത്​. 24 യൂനിറ്റുകളും ഇതിനകം വിറ്റുപോയിട്ടുണ്ട്​. ഓരോ യൂനിറ്റിനും 5,000 ഡോളർ 3.71 ലക്ഷം രൂപ) ആണ്​ വില. സ്റ്റാൻഡേർഡ് മോഡലിനെക്കാൾ മനോഹരമായാണ്​ വാഹനം നിർമിച്ചിരിക്കുന്നത്​. നീലയും ഓറഞ്ച് നിറത്തിലുള്ള ബ്രാൻഡിങും ഫ്രെയിമിൽ സമാനമായ നിറങ്ങളും വരകളും ഉള്ള വാഹനമാണ്​ സൂപ്പർ 73 ആർഎക്‌സ്​. തനതായ പെയിൻറ്​ സ്​കീമും, കസ്റ്റം എംബ്രോയിഡറി സീറ്റും ഹോട്ട് വീൽസ് ബ്രാൻഡി​െൻറ പ്രത്യേകതയാണ്​.

പവർട്രെയിൻ

ഇ-ബൈകിന് കരുത്ത് നൽകുന്നത് 960 വാട്ട് ബാറ്ററിയാണ്. ഇത് പിൻ ചക്രത്തിൽ ഘടിപ്പിച്ചിരിക്കുന്ന മോട്ടോറിന് ഉൗർജ്ജം നൽകുന്നു. 2 kW മോട്ടോർ ഇലക്ട്രിക് പവറിൽ 2.7 bhp ഒൗട്ട്പുട്ട് ലഭിക്കും. ബൈക്കിന് 32 കിലോമീറ്റർ വേഗതയിൽ 65 കിലോമീറ്റർ വരെ സഞ്ചരിക്കാൻ കഴിയും. ഇക്കോ പെഡൽ അസിസ്റ്റ് മോഡിൽ പെഡൽ ഉപയോഗിച്ചുകൊണ്ട്120 കിലോമീറ്റർ വരെ പോകാം. ഉയർന്ന വേഗത 45 കി.മീ ആണ്​. അഞ്ച് ആംമ്പിയർ ചാർജർ ഉപയോഗിച്ച് 3-4 മണിക്കൂർ കൊണ്ട്​ വാഹനം പൂർണമായി ചാർജ്​ ചെയ്യാം. 3 ആമ്പിയർ ആണെങ്കിൽ 6-7 മണിക്കൂറിനുള്ളിൽ ചാർജ്​ ചെയ്യാനാകും.

36 കിലോഗ്രാം ആണ്​ ആകെ ഭാരം. സൈക്കിളി​െൻറ ഓരോ യൂനിറ്റും മുൻകൂർ ഓർഡറിൽ നിർമിച്ചതാണെന്ന്​ ഹോട്ട്​ വീൽസ്​ അധികൃതർ പറയുന്നു. ഒാർഡർ ചെയ്​തുകഴിഞ്ഞാൽ ഒരു യൂനിറ്റ് നിർമിക്കാൻ 12-16 ആഴ്ച എടുക്കും. ഇ-ബൈക്കിന് 5,000 ഡോളർ വളരെ ചെലവേറിയതായി തോന്നുമെങ്കിലും, ഹോട്ട് വീൽസ് പ്രേമികൾ ഇത്രയും പണം മുടക്കാൻ തയ്യാറാണ്​. സൈക്കിൾ വാങ്ങുന്നവർക്ക്​ ഫോർഡ് ബ്രോങ്കോയുടെ ഒരു സ്കെയിൽഡ് സൈസ് ഹോട്ട് വീൽസ് മോഡലും സൗജന്യമായി ലഭിക്കും.