Begin typing your search above and press return to search.
exit_to_app
exit_to_app
CNG price hiked for fourth time this year
cancel
Homechevron_rightHot Wheelschevron_rightOverdrivechevron_rightകാർ വിൽപ്പന...

കാർ വിൽപ്പന ഇരട്ടിയായി, സി.എൻ.ജി വില നാലാമതും വർധിപ്പിച്ച്​ കമ്പനികൾ; ഇരുട്ടടി

text_fields
bookmark_border

പെട്രോൾ, ഡീസൽ വില വർധനവ്​ കാരണം സി.എൻ.ജി കാറുകൾ വാങ്ങാൻ തുടങ്ങിയ പൗരന്മാരെ വലച്ച്​ വിലവർധന. ഇൗ വർഷം നാലാമതും സി.എൻ.ജിക്ക്​ വിലവർധിപ്പിച്ചിരിക്കുകയാണ് കമ്പനികൾ​. രാജ്യത്തെ പ്രമുഖ സി.എൻ.ജി വിതരണക്കാരായ മഹാനഗർ ഗാസ്​ ലിമിറ്റഡ്​ ഒരു കിലോ സി.എൻ.ജിയുടെ വില 61.50 രൂപയായാണ്​ വർധിപ്പിച്ചത്​. ഇൗ വർഷം ഫെബ്രുവരിയിൽ 49.40 രൂപയുണ്ടായിരുന്ന സി.എൻ.ജിയാണ്​ ഇപ്പോൾ 61.50 ൽ എത്തിയിരിക്കുന്നത്​.


ഉയർന്ന ഉപഭോഗം കാരണം സി.എൻ.ജി കുടുതലായി ഇറക്കുമതി ചെയ്യാനാണ്​ വിലവർധനയെന്നാണ്​ കമ്പനികളുടെ വാദം. അഞ്ച് മാസത്തിനിടെ മൂന്നാമത്തെയും, ഈ വർഷം നാലാമത്തെയും വിലവർധനയാണ് ഇപ്പോൾ നിലവിൽ വന്നിരിക്കുന്നത്​. ഒക്ടോബറിലാണ്​ ഇതിനുമുമ്പ്​ വില വർധിപ്പിച്ചത്​. അന്ന്​ കിലോഗ്രാമിന് 57.54 രൂപയിൽ നിന്ന് 7 ശതമാനം വർധനയാണ് വരുത്തിയത്​.

ഇൗ കലണ്ടർ വർഷത്തിൽ, സിഎൻജി വില മുംബൈയിൽ 28 ശതമാനം വരെ ഉയർന്നു. പെട്രോൾ, ഡീസൽ കാറുകൾ വിറ്റ് സി.എൻ.ജി വാങ്ങിയ സാധാരണക്കാരും ടാക്​സി ഡ്രൈവർമാരും വാണിജ്യ വാഹന ഉടമകളുമാണ് ഇതോടെ പ്രതിസന്ധിയിലായത്​​.​ മാരുതി പോലെ സിഎൻജി വാഹനങ്ങൾക്ക്​ മുൻതൂക്കം കൊടുക്കുന്ന നിർമ്മാതാക്കൾക്കും ഇത് നല്ല വാർത്തയല്ല.


സി.എൻ.ജി വാഹന വിൽപ്പന കുതിക്കുന്നു

ഈ സാമ്പത്തിക വർഷം സി.എൻ.ജി കാർ വിൽപ്പന കുതിച്ചുയർന്നിരുന്നു. പെട്രോൾ, ഡീസൽ വിലയിൽ നിന്നുള്ള മോചനമായാണ്​ ആളുകൾ സി.എൻ.ജിയിലേക്ക്​ മാറിയത്​. ഹരിത ഇന്ധനം എന്ന മേന്മയും സി.എൻ.ജിക്കുണ്ട്​. 2022 സാമ്പത്തിക വർഷത്തിലെ ആദ്യ ഏഴ് മാസങ്ങളിൽ (ഏപ്രിൽ-ഒക്ടോബർ) സിഎൻജിയിൽ പ്രവർത്തിക്കുന്ന പാസഞ്ചർ വാഹനങ്ങളുടെ വിൽപ്പന 66 ശതമാനം വർധിച്ച് 1,19,372 യൂനിറ്റുകളായിരുന്നു. 77,451 യൂനിറ്റുകളുമായി കാറുകളുടെ വിഭാഗം 57 ശതമാനം വളർച്ചയാണ്​ കൈവരിച്ചത്​. 15,138 വാനുകളും വിറ്റഴിഞ്ഞു.

രാജ്യത്തെ മൊത്തത്തിലുള്ള പാസഞ്ചർ വെഹിക്കിൾ (പി.വി​ ) സെഗ്‌മെന്റിൽ സി.എൻ.ജി വിഹിതം ഗണ്യമായി വർധിച്ചിട്ടുണ്ട്​. കാറുകൾ 9.87 ശതമാനമായും യൂട്ടിലിറ്റി വെഹിക്കിളുകൾ 3.50 ശതമാനമായും വാനുകൾ 24 ശതമാനമായും ഇക്കാലയളവിൽ വർധിച്ചു. മൊത്തത്തിൽ പിവി വിപണിയിലെ സിഎൻജി വിഹിതം ഒരു വർഷം മുമ്പ് 6.03 ശതമാനമായിരുന്നത്​ 7.40 ആയി ഉയർന്നു.


മാരുതി സുസുകിയും ഹ്യുണ്ടായ് ഇന്ത്യയുമാണ് പി.വി​ വിൽപ്പനയിൽ മുന്നിൽ നിൽക്കുന്ന കമ്പനികൾ. ഏറ്റവും വിൽപ്പനയുള്ള 11 മോഡലുകളിൽ ഏഴും മാരുതിയുടേതാണ്​. ആൾട്ടോ, എസ്-പ്രസ്സോ, സെലേരിയോ, വാഗൺ ആർ, ഡിസയർ, എർട്ടിഗ, ഇക്കോ എന്നിവയാണാ മോഡലുകൾ. നിലവിലെ സാമ്പത്തിക വർഷത്തിൽ വിറ്റഴിഞ്ഞ 1,01,412 യൂനിറ്റുകളിൽ 82,351 എണ്ണവും മാരുതി വാഹനങ്ങളാണ്​.

ഗ്രാൻഡ് ഐ10, സാൻട്രോ, ഓറ, എക്‌സെന്റ് എന്നീ 4 ഹ്യൂണ്ടായ്​ മോഡലുകളാണ്​ രണ്ടാം സ്​ഥാനത്തുള്ളത്​. 19,061 യൂനിറ്റുകളാണ്​ ഹ്യുണ്ടായ് വിറ്റത്​. ടാറ്റ മോട്ടോഴ്‌സ്​ ഇനിയും സി.എൻ.ജി വിപണിയിൽ എത്തിയിട്ടില്ല. ഇ.വികളിലാണ്​ അവർ ശ്രദ്ധകേന്ദ്രീകരിക്കുന്നത്​. സിഎൻജി വിഭാഗത്തിലേക്കുള്ള ടാറ്റയുടെ പ്രവേശനം ആസന്നമാണെന്നാണ്​ വിവരം.

Show Full Article
TAGS:CNG price hike PM Modi petrol 
News Summary - CNG price hiked for fourth time this year
Next Story