Begin typing your search above and press return to search.
proflie-avatar
Login
exit_to_app
exit_to_app
cars saying ‘Goodbye India’ in 2021: Ford EcoSport to Mahindra XUV500
cancel
Homechevron_rightHot Wheelschevron_rightOverdrivechevron_rightഉടമകൾ ജാഗ്രത...

ഉടമകൾ ജാഗ്രത പുലർത്തുക, ഇൗ 10 കാറുകൾ അടുത്തവർഷം മുതൽ ഇന്ത്യയിൽ ഉണ്ടാകില്ല

text_fields
bookmark_border

മനുഷ്യർ മരിക്കുന്നതുപോലെ വാഹനങ്ങൾക്കും മരണമുണ്ടോ? ഉണ്ടെന്നുവേണം കരുതാൻ. ഇന്ത്യയിലെ ഏതൊരു വാഹനത്തി​േൻറയും പരമാവധി ജീവിത ചക്രം ഇപ്പോൾ 20 വർഷമാണ്​. അതിനുശേഷം നിർബന്ധിത മരണമാണ്​ ഇവയെ കാത്തിരിക്കുന്നത്​. ഇതിൽ നിന്ന്​ വ്യത്യസ്​തമായി വർഷാവർഷം ചില വാഹനങ്ങൾ അകാല ചരമം പ്രാപിക്കാറുണ്ട്​. 2021നെ സംബന്ധിച്ച്​ ഇങ്ങിനുള്ള വാഹനങ്ങളുടെ എണ്ണം കൂടുതലാണ്​. അതിനുള്ള പ്രധാന കാരണം ഫോർഡ്​ മോ​േട്ടാഴ്​സ്​ എന്ന അമേരിക്കൻ വാഹന ഭീമ​െൻറ ഇന്ത്യവിട്ടുള്ള മടങ്ങി​പ്പോക്കാണ്​. ഒറ്റയടിക്ക്​ നാല്​ മോഡലുകളാണ്​ ഫോർഡിനൊപ്പം നാടുവിടുന്നത്​. അതോടൊപ്പം, വിൽപ്പനയില്ലാത്തതിനാലും പുതിയ മോഡലുകൾ പകരം വന്നതിനാലുമൊക്കെ നിരവധി കാറുകൾ 2021 ൽ രാജ്യത്ത്​ അന്ത്യകൂദാശക്ക്​ വി​ധേയമാക്കപ്പെടും.

1. ഫോർഡ് ഫിഗോ, ആസ്​പയർ, ഇക്കോസ്​പോർട്ട്​, എൻഡവർ

മുകളിൽ പറഞ്ഞതുപോലെ നാല്​ ഫോർഡ്​ കാറുകളാണ്​ രാജ്യത്തി​െൻറ വാഹനഭൂപടത്തിൽനിന്ന്​ മാഞ്ഞുപോകുന്നത്​. ഫോർഡി​െൻറ ഹോട്ട്​ സെല്ലിങ്​ ഹാച്ച്​ബാക്കായിരുന്നു ഫിഗോ.പെട്രോൾ ഡീസൽ എഞ്ചിൻ ഓപ്ഷനുകളിലും ഓട്ടോമാറ്റിക് ട്രാൻസ്​മിഷനിലും ലഭ്യമായ ഫോർഡ് ഫിഗോ മികച്ച ഡ്രൈവബിലിറ്റിയുള്ള​ കാർ എന്നായിരുന്നു അറിയപ്പെട്ടിരുന്നത്​. ഫിഗോക്ക്​ ഫ്രീസ്റ്റൈൽ എന്ന ക്രോസ്ഓവർ പതിപ്പും ​ഫോർഡ്​ നൽകിയിരുന്നു.


ഫിഗോയുടെ സെഡാൻ പതിപ്പായിരുന്നു ആസ്​പയർ. മാരുതി സുസുക്കി ഡിസയർ, ഹ്യുണ്ടായ് ഓറ, മറ്റ് കോംപാക്റ്റ് സെഡാനുകൾ എന്നിവയുമായി ആസ്​പയർ വിപണിയിൽ മത്സരിച്ചു. ആസ്​പയറും പെട്രോൾ, ഡീസൽ എഞ്ചിൻ ഓപ്ഷനുകൾ വാഗ്​ദാനം ചെയ്​തിരുന്നു. സോളിഡ് ബിൽഡ് ക്വാളിറ്റിയും വിലക്കുറവുമായിരുന്നു ആസ്​പയറിനെ ആകർഷകമാക്കിയിരുന്നത്​.

​ഫോർഡി​െൻറ ആദ്യത്തെ കോംപാക്റ്റ് എസ്‌യുവിയായിരുന്നു ഇക്കോസ്​പോർട്ട്​. ഈ വിഭാഗത്തെ ഇന്ത്യയിൽ ജനപ്രിയമാക്കിയതിൽ ഇക്കോസ്​പോർട്ടിന്​ വലിയ പങ്കുണ്ട്​. ഇന്ത്യയിൽ ഫോർഡ് ഏറ്റവും കൂടുതൽ വിറ്റഴിച്ച വാഹനമാണ് ഇക്കോസ്‌പോർട്ട്. ഇവയുടെ ഫെയ്‌സ്‌ലിഫ്റ്റ്​ മോഡൽ പുറത്തിറക്കാനിരിക്കെയാണ്​ ഫോർഡി​െൻറ ചരിത്രപരമായ തീരുമാനം ഉണ്ടാകുന്നത്​.


ടൊയോട്ട ഫോർച്യൂണറിനെ വെല്ലുവിളിക്കുന്ന ഇന്ത്യയിലെ ഏക എസ്​.യു.വിയായിരുന്നു എൻഡവർ. മികച്ച വാഹനമെന്ന്​ പേരെടുത്തെങ്കിലും വിൽപ്പനയിൽ വിപ്ലവം സൃഷ്​ടിക്കാനൊന്നും എൻഡവറിന്​ ആയില്ല. യാത്രാസുഖമുള്ള എസ്​.യു.വി എന്നതായിരുന്നു ഫോർഡി​െൻറ ഉപഭോക്​താക്കൾക്കുള്ള വാഗ്​ദാനം. രാജ്യത്തെ ആദ്യത്തെ 10 സ്പീഡ് ഓട്ടോമാറ്റിക് ട്രാൻസ്​മിഷൻ യൂനിറ്റ് ഉപയോഗിച്ച വാഹനവും എൻഡവർ ആയിരുന്നു.

5, ടൊയോട്ട യാരിസ്

ഒട്ടും ജനപ്രിയമല്ലായിരുന്നു ടൊയോട്ട യാരിസ്​. വിപണിയിൽ അവതരിപ്പിച്ച്​ വെറും മൂന്ന്​ വർഷത്തിനുള്ളിലാണ്​ യാരിസ്,​ ഇന്ത്യയിൽ നിന്ന്​ ജപ്പാനിലേക്ക്​ വണ്ടികയറുന്നത്​. 2018 ലാണ് ടൊയോട്ട, യാരിസിനെ ഇന്ത്യയിൽ അവതരിപ്പിച്ചത്. മുന്നുവർഷംകൊണ്ട്​ 19,784 യൂനിറ്റ് മാത്രമാണ് വിറ്റുപോയത്. ചില വേരിയൻറുകളിൽ ഏഴ് എയർബാഗുകൾ ഉൾക്കൊള്ളുന്ന, നീണ്ട ഫീച്ചർ ലിസ്റ്റും സുരക്ഷാ കിറ്റും ഉള്ള മികച്ച വാഹനമായിരുന്നു യാരിസ്​.


5-സ്പീഡ് മാനുവൽ അല്ലെങ്കിൽ സി.വി.ടി ഗിയർബോക്‌സുമായി ബന്ധിപ്പിച്ചിട്ടുള്ള 1.5 ലിറ്റർ പെട്രോൾ എഞ്ചിൻ മാത്രമാണ് യാരിസിൽ ടൊയോട്ട വാഗ്​ദാനം ചെയ്​തിരുന്നത്. ഡീസൽ എഞ്ചിൻ ഇല്ല എന്നതിൽ തുടങ്ങുന്നു യാരിസി​െൻറ പരാജയ കാരണം. ഹോണ്ട സിറ്റി, ഹ്യുണ്ടായ് വെർന, മാരുതി സുസുകി സിയാസ് തുടങ്ങിയ ഘടാഘടിയന്മാരായ എതിരാളികൾ ഉൾപ്പെടുന്ന വിഭാഗത്തിൽ തുടക്കംമുതൽ തന്നെ കിതച്ചു യാരിസ്​. മൂല്യവർധിത ഉത്​പന്നമല്ല എന്നതാണ്​ യാരിസിൽ ഉപഭോക്താക്കൾ കണ്ടെത്തിയ പ്രശ്​നം. യാരിസിനുപകരം മാരുതി സുസുക്കി സിയാസിനെ അടിസ്ഥാനമാക്കിയുള്ള ബെൽറ്റയെ ഇന്ത്യൻ വിപണിയിൽ അവതരിപ്പിക്കാനാണ്​ നീക്കം നടക്കുന്നത്​.


6. മഹീന്ദ്ര എക്​സ്​.യു.വി 500

മഹീന്ദ്രയുടെ ജനപ്രിയ എസ്​.യു.വിയായ എക്​സ്​.യു.വി 500​െൻറ നിർബന്ധിത പിൻവാങ്ങലിനുകാരണം വിൽപ്പനക്കുറവോ മറ്റ്​ മോശം പ്രകടനങ്ങളോ അല്ല. എക്​സ്​.യു.വി 700 എന്ന കൂടുതൽ മെച്ചപ്പെട്ട മോഡൽ വന്നതോടെയാണ്​ 500 തിരശ്ശീലയിലേക്ക്​ മായുന്നത്​. നിലവിൽ വാഹനം മഹീന്ദ്ര ഷോറൂമുകളിൽ ലഭ്യമാണെങ്കിലും, പതിയെ പിൻവലിക്കും. ഹ്യുണ്ടായ് ക്രെറ്റ, കിയ സെൽറ്റോസ് എന്നിവയുമായി മത്സരിക്കാൻ എക്​സ്​.യു.വി 500​െൻറ പുതിയൊരു അവതാരം വിപണിയിൽ എത്തിക്കാനും സാധ്യതയുണ്ട്​.


7. ഹോണ്ട സിവിക്

ജപ്പാനിലും യൂറോപ്പിലുമെല്ലാം വലിയ വിജയ ചരിത്രമുള്ള വാഹനമാണ്​ ഹോണ്ട സിവിക്​. ആദ്യ വരവിൽ ഇന്ത്യക്കാരുടെ മനസുകവരാനും ഇൗ വാഹനത്തിനായി. എന്നാൽ 2019ൽ ഹോണ്ട ഇന്ത്യൻ വിപണിയിലേക്ക് കൊണ്ടുവന്ന പത്താം തലമുറ സിവിക് ഒരു ദുരന്തമായിരുന്നു. ടൊയോട്ട കൊറോളയും സ്​കോഡ ഒക്​ടാവിയയും ഹ്യൂണ്ടായ്​ എലാൻഡ്രയുമെല്ലാം അരങ്ങുവാഴുന്ന പ്രീമിയം സെഡാൻ വിഭാഗത്തിൽ സിവിക്​ ഒട്ടും ക്ലച്ചുപിടിച്ചില്ല. കോവിഡ്​ തരംഗത്തിലും കുടുങ്ങിയതോടെ ഗ്രേറ്റർ നോയിഡ പ്ലാന്റിൽ സിവികുകളുടെ നിർമ്മാണം നിർത്താനും വിൽപ്പന രാജ്യത്ത്​ അവസാനിപ്പിക്കാനും ഹോണ്ട തീരുമാനിക്കുകയായിരുന്നു.


8. ഹോണ്ട സി.ആർ.വി

മോണോകോക്ക്​ ഷാസിയിൽ മികച്ച യാത്രാസുഖവുമായി ഹോണ്ട അവതരിപ്പിച്ച വാഹനമായിരുന്നു സി.ആർ.വി. എസ്​.യു.വി എന്നതിനേക്കാൾ ക്രോസ്​​ ഒാവർ എന്നാണ്​ സി.ആർ.വിയെ വിളിക്കേണ്ടത്​. വിൽപ്പനക്കുറവ്​ തന്നെയാണ്​ ഇൗ മികച്ച വാഹനത്തിനും തിരിച്ചടിയായത്​. യൂറോപ്യൻ ഫിറ്റും ഫിനിഷുമെല്ലാം ഉണ്ടായിട്ടും ഇന്ധനക്ഷമതയില്ലായ്​മയും സർവ്വീസ്​ പരാധീനതകളും വിലക്കൂടുതലും സി.ആർ.വിക്ക്​ തിരിച്ചടിയായി. ഇതോടെ ഹോണ്ട വാഹനത്തി​െൻറ വിൽപ്പന ഇന്ത്യയിൽ നിർത്തലാക്കുകയായിരുന്നു.


9. ഹ്യുണ്ടായ് ഗ്രാൻഡ് ​െഎ 10

ഈ വർഷം ആദ്യം ഹ്യുണ്ടായ് വാഹന നിരയിൽ നിന്ന് നിശബ്​ദമായി നീക്കം ചെയ്​ത മോഡലാണ്​ ഗ്രാൻഡ് ​െഎ 10. ഹാച്ച്​ബാക്കുകളുടെ വിഭാഗത്തിൽ മാരുതിയോട്​ ഏറ്റുമുട്ടാൻ ഹ്യുണ്ടായെ സഹായിച്ച മോഡലുകളിൽ ഒന്നായിരുന്നു ഇത്​. ജനുവരിയിൽ, ഗ്രാൻഡ്​ െഎ10 നിയോസ്​ വരികയും ഗ്രാൻഡ് ​െഎ 10 പിന്നിലേക്ക്​ മാറ്റപ്പെടുകയും ചെയ്​തു. നിയോസ്​ വിൽപ്പന വർധിപ്പിച്ചതോടെ ഗ്രാൻഡിന്​ തിരശ്ശീല വീഴുകയായിരുന്നു.


10. മഹീന്ദ്ര ആൾട്ടുറാസ് ജി 4

മഹീന്ദ്രയുടെ പതാകവാകൻ എസ്​.യു.വിയായ ആൾട്ടുറാസ് ജി 4 ഉടൻ ഇന്ത്യൻ വിപണിയിൽ നിർത്തലാക്കുമെന്നാണ് വിവരം​. വിൽപ്പനയില്ലായ്​മയാണ്​ ആൾട്ടൂറസിന്​ വിനയായത്​. എക്​സ്​.യു.വി 700 വരുന്നതോടെ മറ്റൊരു ഫുൾസൈസ്​ എസ്​.യു.വിക്ക്​ വിപണിയിൽ ഇടമില്ല എന്നാണ്​ മഹീന്ദ്രയുടെ വിലയിരുത്തൽ. നിലവിൽ നിർമാണം പൂർത്തിയായ വാഹനങ്ങൾ വിറ്റുകഴിഞ്ഞാൽ മഹീന്ദ്ര ആൾട്ടൂറസുകളുടെ അധ്യായത്തിന്​ അവസാനം കുറിക്കും.

Show Full Article
Girl in a jacket

Don't miss the exclusive news, Stay updated

Subscribe to our Newsletter

By subscribing you agree to our Terms & Conditions.

Thank You!

Your subscription means a lot to us

Still haven't registered? Click here to Register

TAGS:carsIndia NewsGoodbyesaying
News Summary - 10 cars & SUVs saying ‘Goodbye India’ in 2021: Ford EcoSport to Mahindra XUV500
Next Story