ടെസ്​ലയുടെ ഡ്രൈവറില്ലാ കാർ നിയന്ത്രണം വിട്ട്​ മറിഞ്ഞ്​ രണ്ട്​ മരണം; ഓ​ട്ടോണമസ്​ സംവിധാനം ത്രിശങ്കുവിൽ?

അമേരിക്കൻ ​ൈവദ്യുത വാഹന നിർമാതാക്കളായ ടെസ്​ലയുടെ ഡ്രൈവറില്ലാ കാർ അപകടത്തിൽപെട്ട്​ രണ്ട്​ മരണം. 2019 ടെസ്​ല മോഡൽ എസ്​ ആണ്​ ഹൂസ്റ്റണിൽ നിയന്ത്രണംവിട്ട്​ മറിഞ്ഞത്​. റോഡിൽ നിന്ന്​ തെന്നിമാറിയ വാഹനം മരത്തിലിച്ച്​ കത്തുകയായിരുന്നു. ശനിയാഴ്ച രാത്രിയാണ്​ അപകടമുണ്ടായത്​. വാഹനത്തിന്‍റെ ഡ്രൈവിങ്​ സീറ്റിൽ ആരും ഉണ്ടായിരുന്നില്ലെന്ന്​ അപകടസ്​ഥലത്തുനിന്നുള്ള ദൃക്​സാക്ഷികൾ പറഞ്ഞതായി പ്രാദേശിക ടെലിവിഷൻ ചാനൽ റിപ്പോർട്ട്​ ചെയ്​തു.

തീ കെടുത്തിയ ശേഷം പൊലീസ്​ അധികൃതർ വാഹനത്തിനുള്ളിൽ രണ്ടുപോരെ കണ്ടെത്തുകയായിരുന്നു. ഒരാൾ മുൻ പാസഞ്ചർ സീറ്റിലും മറ്റൊരാൾ പിൻ സീറ്റിലുമായി ഇരിക്കുന്ന നിലയിലായിരുന്നെന്ന്​ ഹാരിസ് കൗണ്ടി കോൺസ്റ്റബിൾ മാർക്ക് ഹെർമൻ പറയുന്നു. ടെസ്‌ലയും അമേരിക്കൻ ദേശീയപാതാ ഗതാഗത സുരക്ഷാ അഡ്‌മിനിസ്‌ട്രേഷനും സംഭവത്തോട്​ പ്രതികരിച്ചിട്ടില്ല. അടുത്തിടെയുണ്ടായ ചില അപകടങ്ങളെത്തുടർന്ന് ടെസ്‌ലയുടെ സെമി ഓട്ടോമേറ്റഡ് ഡ്രൈവിങ്​ സിസ്റ്റത്തെക്കുറിച്ച് കൂടുതൽ പരിശോധനകൾ നടക്കുന്നതിനിടയിലാണ് പുതിയ സംഭവം.

നിലവിൽ ടെസ്​ല, കൂടുതൽ ഉപഭോക്താക്കൾക്ക് അപ്‌ഡേറ്റുചെയ്‌ത 'ഫുൾ സെൽഫ് ഡ്രൈവിങ്​' സോഫ്​റ്റ്​വെയർ നൽകാനുള്ള ഒരുക്കത്തിലാണ്​. ടെസ്‌ല വാഹനങ്ങൾ അപകടത്തിൽ തകർന്ന 27 സംഭവങ്ങളിൽ അന്വേഷണം ആരംഭിച്ചതായി യുഎസ് ഓട്ടോ സുരക്ഷാ ഏജൻസി പറയുന്നു. കുറഞ്ഞത് മൂന്ന് കൂട്ടിയിടികളും ടെസ്​ലക്ക്​ അടുത്തിടെ സംഭവിച്ചിരുന്നു. സമ്പൂർണ്ണ ഓ​ട്ടോ ഡ്രൈവിംഗ് സോഫ്റ്റ്​വെയറിൽ നിന്ന് വലിയ ലാഭം പ്രതീക്ഷിക്കുന്നതായി ടെസ്‌ല സിഇഒ എലോൺ മസ്‌ക് ജനുവരിയിൽ പറഞ്ഞിരുന്നു.

2019ൽ മനുഷ്യനേക്കാൾ കൂടുതൽ വിശ്വാസ്യതയോടെ കാറിന് സ്വയം ഓടിക്കാൻ കഴിയുമെന്നും അദ്ദേഹം ആത്മവിശ്വാസം പ്രകടിപ്പിച്ചിരുന്നു. വാണിജ്യ വിജയം നേടുന്നതിന് സ്വയം ഡ്രൈവിങ്​ സാങ്കേതികവിദ്യ കുടുതൽ സുരക്ഷിതമാകേണ്ടതുണ്ടെന്ന്​ വാഹനരംഗത്തെ വിദഗ്​ധർ പറഞ്ഞു.