യാരിസ്​ സെഡാൻ ഇന്ത്യയിൽ ഇനി വിൽക്കുന്നില്ലെന്ന്​ ടൊയോട്ട; കാരണം ഇതാണ്​

ഒട്ടും ജനപ്രിയമല്ലാത്ത യാരിസ്​ സെഡാനെ ഇന്ത്യൻ വിപണിയിൽനിന്ന്​ പിൻവലിച്ച്​ ടൊയോ​ട്ട. അത്രയൊന്നും അപ്രതീക്ഷിതമല്ലാത്ത നീക്കത്തിലൂടെയാണ്​ ടൊയോട്ട തങ്ങൾക്ക്​ ബാധ്യതയായി മാറിയ മോഡലിനെ വാഹനനിരയിൽ നിന്ന്​ ഒഴിവാക്കുന്നത്​. വിപണിയിൽ അവതരിപ്പിച്ച്​ വെറും മൂന്ന്​ വർഷത്തിനുള്ളിലാണ്​ യാരിസ്,​ ഇന്ത്യയിൽ നിന്ന്​ ജപ്പാനിലേക്ക്​ വണ്ടികയറിയത്​. യാരിസി​െൻറ മടക്കം സംബന്ധിച്ച്​ നേരത്തേതന്നെ വാഹനലോകത്ത്​ മുറുമുറുപ്പുകൾ ഉണ്ടായിരുന്നു. ഇതോടെ ടൊയോട്ടയുടെ മിഡ്​സൈസ്​ സെഡാൻ വിഭാഗം അനാഥമാകും. അതുമാത്രമല്ല 10 ലക്ഷത്തിൽ താഴെ വിലയിൽ ടൊയോട്ടയുടെ തനത്​ വാഹനങ്ങളൊന്നും ഇന്ത്യയിൽ ലഭ്യമാകില്ല എന്നതും എടുത്തുപറയേണ്ടതാണ്​. സുസുകി നിർമിച്ച്​ ടൊയോട്ട ഉടുപ്പിട്ടുവരുന്ന അർബൻ ക്രൂസറും ഗ്ലാൻസയും ആയിരിക്കും ടൊയോട്ടയുടെ ഇന്ത്യയിലെ ചെറുകാറുകൾ. ഇവർക്ക്​ കൂട്ടായും യാരിസിന്​ പകരമായും സുസുകി സിയാസി​െൻറ ടൊയോട്ട വെർഷൻ ഉടൻ വിപണി​യിലെത്തുകയും ചെയ്യും.

2018 ലാണ് ടൊയോട്ട, യാരിസ് ഇന്ത്യയിൽ അവതരിപ്പിച്ചത്. മുന്നുവർഷംകൊണ്ട്​ 19,784 യൂനിറ്റ് മാത്രമാണ് വിറ്റുപോയത്. ചില വേരിയൻറുകളിൽ ഏഴ് എയർബാഗുകൾ ഉൾക്കൊള്ളുന്ന, നീണ്ട ഫീച്ചർ ലിസ്റ്റും സുരക്ഷാ കിറ്റും ഉള്ള മികച്ച വാഹനമായിരുന്നു യാരിസ്​. 5-സ്പീഡ് മാനുവൽ അല്ലെങ്കിൽ സിവിടി ഗിയർബോക്‌സുമായി ബന്ധിപ്പിച്ചിട്ടുള്ള 1.5 ലിറ്റർ പെട്രോൾ എഞ്ചിൻ മാത്രമാണ് യാരിസിൽ ടൊയോട്ട വാഗ്​ദാനം ചെയ്​തത്. ഡീസൽ എഞ്ചിൻ ഇല്ല എന്നതിൽ തുടങ്ങുന്നു യാരിസി​െൻറ പരാജയ കാരണം. ഹോണ്ട സിറ്റി, ഹ്യുണ്ടായ് വെർന, മാരുതി സുസുകി സിയാസ് തുടങ്ങിയ ഘടാഘടിയന്മാരായ എതിരാളികൾ ഉൾപ്പെടുന്ന വിഭാഗത്തിൽ തുടക്കംമുതൽ തന്നെ കിതച്ചു യാരിസ്​. മൂല്യവർധിത ഉത്​പന്നമല്ല എന്നതാണ്​ യാരിസിൽ ഉപഭോക്താക്കൾ കണ്ടെത്തിയ പ്രശ്​നം.

10 ലക്ഷം രൂപവരെ വിലവരുന്ന വാഹന ഉപവിഭാഗത്തിൽ സുസുകിയിൽ നിന്നുവാങ്ങുന്ന മോഡലുകൾ മതിയെന്ന ടൊയോട്ടയുടെ പദ്ധതിയും യാരിസി​െൻറ മടക്കം വേഗത്തിലാക്കി. യാരിസി​െൻറ സ്പെയർ പാർട്ട് ലഭ്യത കുറഞ്ഞത് 10 വർഷമെങ്കിലും ഉറപ്പാക്കുമെന്നും നിലവിലുള്ള എല്ലാ ഉപഭോക്താക്കൾക്കും സർവ്വീസ്​ ലഭ്യമാക്കുമെന്നും ടൊയോട്ട ഉറപ്പ് നൽകിയിട്ടുണ്ട്​. ടൊയോട്ടയുടെ ഇന്ത്യ ലൈനപ്പ് അനുസരിച്ച്, കമ്പനി അടുത്ത മാസം ആദ്യം അപ്ഡേറ്റ് ചെയ്​ത ഫോർച്യൂണർ വേരിയൻറുകൾ അവതരിപ്പിക്കുമെന്നാണ്​ പ്രതീക്ഷിക്കപ്പെടുന്നത്​. ഫോർച്യൂണർ ലെജൻഡറി​െൻറ ഫോർവീൽ വേരിയൻറും ഇതിൽ ഉൾപ്പെടും.