ഫോർച്യൂണറിന്‍റെ പുതിയ അവതാരവുമായി ടൊയോട്ട; ഫ്ലക്സ്​ ഫ്യൂവൽ എഞ്ചിൻ വേരിയന്‍റ്​ അവതരിപ്പിച്ചു

ഇന്ത്യയിലെ ആദ്യ ഫ്ലക്സ്​ ഫ്യൂവൽ വാഹനം അവതരിപ്പിച്ച നിർമാതാക്കളാണ്​ ടൊയോട്ട. കൊറോളയാണ്​ ഇത്തരത്തിൽ ടൊയോട്ട ഇന്ത്യയിൽ എത്തിച്ചത്​. ഇപ്പോഴിതാ തങ്ങളുടെ മറ്റൊരു ബെസ്റ്റ്​ സെല്ലർകൂടി ടൊയോട്ട ഫ്ലക്സ്​ ഫ്യൂവലിലേക്ക്​ മാറ്റുകയാണ്​. ഫോർച്യൂണർ ആണ്​ ആ വാഹനം. 2023 ഗൈകിൻഡോ ഇന്തോനേഷ്യ ഇന്റർനാഷണൽ ഓട്ടോ ഷോയിലാണ്​ (GIIAS) ഫോർച്യൂണറിന്റെ ഫ്ലെക്‌സ് ഫ്യുവൽ പതിപ്പിനെ അവതരിപ്പിച്ചത്​.

100 ശതമാനം ബയോ എഥനോൾ ഉപയോഗിച്ച് പ്രവർത്തിക്കാൻ രൂപകൽപ്പന ചെയ്‌തിരിക്കുന്ന വാഹനമാണിത്​. പരിഷ്‌ക്കരിച്ച 2.7 ലിറ്റർ, 4-സിലിണ്ടർ പെട്രോൾ എഞ്ചിനോടെയാണ് ഫോർച്യൂണറിന്റെ ഫ്ലെക്‌സ് ഫ്യുവൽ മോഡൽ വരുന്നത്​. നാച്ചുറലി ആസ്പിരേറ്റഡ്, ഫോർ സിലിണ്ടർ പെട്രോൾ എഞ്ചിന്റെ ഇന്ധന സംവിധാനത്തിലും എഞ്ചിൻ കൺട്രോൾ യൂണിറ്റ് (ECU) പ്രോഗ്രാമിംഗിലും മാറ്റങ്ങൾ വരുത്തിയിട്ടുണ്ടെന്ന് കമ്പനി പറയുന്നു.

ഫ്ലെക്‌സ് ഫ്യുവലിൽ പ്രവർത്തിക്കുമ്പോൾ എസ്‌യുവിക്ക് മതിയായ പവർ ലഭിച്ചേക്കില്ലെന്നുള്ള ചിന്തകൾക്കിടെയാണ്​ ലക്ഷണമൊത്ത ഒരു എസ്​.യു.വി ഫ്ലക്സ്​ ടെകിലേക്ക്​ മാറുന്നത്​. ബയോ എഥനോളിൽ ഓടുമ്പോൾ ഫോർച്യൂണർ പരമാവധി 163 bhp കരുത്തും പരമാവധി 243 Nm ടോർക്കും പുറത്തെടുക്കും. പെട്രോൾ മോഡലിനെ അപേക്ഷിച്ച് അൽപം കുറവ് പവറും (3bhp) ടോർക്കു (2 Nm)മാണിത്​.

ഓട്ടോമാറ്റിക് ട്രാൻസ്മിഷൻ ഉപയോഗിച്ചാണ് ഫ്ലെക്‌സ് ഫ്യുവൽ ഫോർച്യൂണറും പ്രവർത്തിക്കുന്നത്. കൂടാതെ 4X4 സംവിധാനം ഒഴിവാക്കി റിയർ വീൽ ഡ്രൈവ് വാഹനമായാണ് ഇതിനെ അവതരിപ്പിച്ചിരിക്കുന്നത്​. വാഹനത്തിന്‍റെ ഡിസൈനും സ്റ്റൈലിംഗും സ്റ്റാൻഡേർഡ് മോഡലുകൾക്ക് സമാനമാണ്. വെള്ളയും പച്ചയും കലർന്ന കളർ ഓപ്ഷൻ ഉപയോഗിച്ചാണ് ഹരിത ബദലിനെ ടൊയോട്ട ഓട്ടോ ഷോയിൽ പ്രദർശിപ്പിച്ചിരിക്കുന്നത്.