ലെജൻഡ്​സ്​​​ ആർ ബാക്ക്; പുതുവർഷ പ്രതീക്ഷയായി ​ഫോർച്യൂണറും ലെജൻഡറും​

ടൊയോട്ടയുടെ അഭിമാന മോഡലുകളിലൊന്നായ ഫോർച്യുണറിന്‍റെ പരിഷ്​കരിച്ച പതിപ്പ്​ പുറത്തിറക്കി. ഇതോടൊപ്പം ഫോർച്യൂണർ ലെജൻഡർ എന്ന ഉയർന്ന വകഭേദവും വിപണിയിൽ അവതരിപ്പിച്ചിട്ടുണ്ട്​. ഫോർച്യൂണറിന്‍റെ കൂടുതൽ സ്​പോർട്ടിയും സ്​റ്റൈലിഷുമായ വെർഷനാണ്​ ലെജൻഡർ. ഫോർച്യൂണറിന്​ വില 29.98 ലക്ഷത്തിൽ ആരംഭിക്കു​േമ്പാൾ ലെജൻഡർ ഗ്യാരേജിലെത്തിക്കാൻ 37.58 ലക്ഷം മുടക്കണം. 2016 ലാണ്​ പുതിയ തലമുറ ഫോർച്യൂണർ രാജ്യത്ത്​ എത്തിയത്​. അതിനുശേഷമുള്ള പ്രധാന പരിഷ്​കരണമാണ്​​ പുതുവർഷത്തിൽ സംഭവിച്ചിരിക്കുന്നത്​. ഓട്ടോമാറ്റിക്ക്​ മോഡലിൽ ശക്തമായ ഡീസൽ എഞ്ചിൻ ഉൾപ്പെടുത്തിയത്​ ഇത്തവണത്തെ പ്രത്യേകതയാണ്​. ലെജൻഡർ രണ്ട്​ വീൽ ഡ്രൈവിൽ മാത്രമാണ്​ ലഭ്യമാണെന്നതും എടുത്തുപറയേണ്ടതാണ്​.

പുതിയ ഫോർച്യൂണർ

എൽഇഡി ഡേടൈം റണ്ണിങ്​ ലൈറ്റുകൾ, വലിയ മെഷ്-പാറ്റേൺ ഗ്രിൽ, പുനർരൂപകൽപ്പന ചെയ്ത മുൻ ബമ്പർ, 18 ഇഞ്ച് പുതിയ അലോയ് വീലുകൾ എന്നിവ പുതിയ ഫോർച്യൂണറിന്‍റെ പ്രത്യേകതകളാണ്.​ എൽഇഡി ഹെഡ്​ലൈറ്റുകൾ പുനർരൂപകൽപ്പന ചെയ്തിട്ടുണ്ട്​. പിന്നിൽ മെലിഞ്ഞ രൂപത്തിലുള്ള എൽഇഡി ടെയിൽ-ലൈറ്റുകൾ ചേർത്തതാണ് പ്രധാന മാറ്റം. ഇന്‍റീരിയറിൽ പഴയ മോഡലിൽ നിന്ന് ഡിസൈനിന്‍റെ കാര്യത്തിൽ വലിയ മാറ്റമൊന്നും സംഭവിച്ചിട്ടില്ല. ആപ്പിൾ കാർപ്ലേയും ആൻഡ്രോയിഡ് ഓട്ടോയുമുള്ള 8.0 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്‍റ്​ സിസ്റ്റം ഉൾപ്പെടുത്തിയത്​ മാറ്റമാണ്​. ടൊയോട്ട കണക്റ്റഡ്​ കാർ ടെകും നൽകിയിട്ടുണ്ട്​. അപ്‌ഡേറ്റുചെയ്‌ത ഇൻസ്ട്രുമെന്‍റ്​ ക്ലസ്റ്റർ, എട്ടുരീതിയിൽ ക്രമീകരിക്കാവുന്നതും വായുസഞ്ചാരമുള്ളതുമായ ഡ്രൈവർ, കോ-ഡ്രൈവർ സീറ്റുകൾ, 11-സ്പീക്കർ ജെബിഎൽ ഓഡിയോ സിസ്റ്റം, ഫ്രണ്ട് പാർക്കിങ്​ സെൻസറുകൾ എന്നിവയും പ്രത്യേകതയാണ്​. രണ്ട് ഇന്‍റീരിയർ കളർ സ്കീമുകളും ലഭ്യമാണ്.

ഫോർച്യൂണർ ലെജൻഡർ

ഫോർച്യൂണർ ലൈനപ്പിന്‍റെ ഏറ്റവും ഉയർന്ന വകഭേദമാണ്​ ലെജൻഡർ. സ്പ്ലിറ്റ് ഗ്രില്ലിനൊപ്പം വ്യത്യസ്തമായ മുഖഭാവമാണ്​ ലെജൻഡറിന്​. എൽഇഡി ടേൺ ഇൻഡിക്കേറ്ററുകൾ ഉൾക്കൊള്ളുന്ന വ്യത്യസ്ത ഫ്രണ്ട് ബമ്പർ, എൽഇഡി ഡിആർഎലുകൾക്ക് സവിശേഷമായ പാറ്റേൺ ഉള്ള എൽഇഡി പ്രൊജക്ടർ ഹെഡ്​ലൈറ്റുകൾ, ക്രോം അലങ്കാരങ്ങൾക്ക് പകരം ഗ്ലോസ്സി ബ്ലാക്ക് ഫിനിഷ്, വ്യത്യസ്ത അലോയ് വീലുകൾ എന്നിവ ഇതിൽ ഉൾക്കൊള്ളുന്നു. വിദേശത്ത് നിരവധി കളർ കോമ്പിനേഷനുകളിൽ വാഹനം ലഭ്യമാണെങ്കിലും പേൾ വൈറ്റിൽ കോൺട്രാസ്റ്റ് ബ്ലാക്ക് മേൽക്കൂരയുള്ള പതിപ്പ്​ മാത്രമേ ഇന്ത്യയിൽ വാഗ്ദാനം ചെയ്യുന്നുള്ളൂ. കറുപ്പും മെറൂണും ചേർന്നതാണ്​ ഇന്‍റീരിയർ കളർ. ഹാൻഡ്‌സ് ഫ്രീ ടെയിൽ ഗേറ്റ് ഓപ്പണിങ്​ ഫംഗ്ഷനും ലെജൻഡറിന് ലഭിക്കുന്നു.

എഞ്ചിൻ, ഗിയർബോക്‌സ്

പുറത്തുപോകുന്ന മോഡലിനെപ്പോലെ പുതിയ ഫോർച്യൂണറിനും 2.7 ലിറ്റർ പെട്രോൾ, 2.8 ലിറ്റർ ഡീസൽ എഞ്ചിനും ലഭ്യമാണ്. 166 എച്ച്പി കരുത്തും 245 എൻ‌എം ടോർകും​ ഉത്​പാദിപ്പിക്കുന്ന പെട്രോൾ എഞ്ചിന്​ മാറ്റമില്ല. അഞ്ച്​ സ്പീഡ് മാനുവൽ അല്ലെങ്കിൽ ആറ്​ സ്പീഡ് ഓട്ടോമാറ്റിക് ആണ്​ ഗിയർബോക്​സ്​. അതേസമയം, വലിയ മാറ്റം ഡീസൽ എഞ്ചിനിലാണ്. 2.8 ലിറ്റർ യൂനിറ്റ് ഇപ്പോൾ 204 എച്ച്പി കരുത്ത്​ ഉത്​പാദിപ്പിക്കും. ആറ്​ സ്പീഡ് മാനുവൽ ഗിയർബോക്​സിൽ മുമ്പത്തെപ്പോലെ 420 എൻഎം ടോർക്കാണ്​ എഞ്ചിൻ പുറപ്പെടുവിക്കുന്നത്​.​ എന്നാൽ ആറ്​ സ്പീഡ് ടോർക്​ കൺവെർട്ടർ യൂനിറ്റുമായി ചേരു​േമ്പാൾ 500 എൻ‌എം ടോർകിലേക്ക്​ എഞ്ചിൻ കരുത്ത്​ വർധിക്കും. പെട്രോൾ മോഡൽ രണ്ടുവീൽ ഡ്രൈവ് രൂപത്തിൽ മാത്രമേ ലഭ്യമാകൂ. ഡീസലിന് നാല് വീൽ ഡ്രൈവ് സംവിധാനവും ലഭിക്കും. ഫോർച്യൂണർ ലെജൻഡറിൽ ആറ്​ സ്പീഡ് ഓട്ടോമാറ്റിക് ഗിയർബോക്‌സാണുള്ളത്​. രണ്ടുവീൽ ഡ്രൈവ് രൂപത്തിൽ മാത്രമേ ലെജൻഡർ ലഭ്യമാകൂ.