ഫീച്ചറുകളാൽ സമ്പന്നം, തിയാഗോക്ക്​ പുതിയൊരു ഓ​ട്ടോമാറ്റിക്​ വേരിയന്‍റുകൂടി അവതരിപ്പിച്ച്​ ടാറ്റ

തിയാഗോ ഹാച്ച്​ബാക്കിന്​ പുതിയൊരു വേരിയന്‍റുകൂടി അവതരിപ്പിച്ച്​ ടാറ്റ. വാഹനത്തിന്‍റെ എക്സ് ടി മോഡലിനെ അടിസ്ഥാനമാക്കിയുള്ളതാണ് പുതിയ എക്സ് ടി എ വേരിയന്‍റ്​. ഇതോടെ തിയാഗോക്ക്​ മൊത്തം നാല് ഓട്ടോമാറ്റിക് മോഡലുകളാകും. റെവട്രോൺ 1.2 ലിറ്റർ, 3-സിലിണ്ടർ, പെട്രോൾ എഞ്ചിനാണ്​ വാഹനത്തിന്​. പുതിയ വേരിയൻറിന്​ 5.99 ലക്ഷം രൂപയാണ്​ വില (എക്സ്ഷോറൂം, ന്യൂഡൽഹി).

ക്രോം ഗ്രിൽ, ബൂമറാങ് ആകൃതിയിലുള്ള ടെയിലാമ്പുകൾ, എൽഇഡി ടേൺ ഇൻഡിക്കേറ്ററുകളുള്ള ബോഡി-കളർ ഒആർവിഎം, ഡ്യുവൽ ടോൺ ഇന്റീരിയർ, ഓഡിയോ, ഫോൺ നിയന്ത്രണങ്ങളുള്ള മൾട്ടി-ഫംഗ്ഷൻ സ്റ്റിയറിംഗ് വീൽ, ഹാർമൻ കണക്റ്റ് നെക്സ്റ്റ് ഇൻഫോടെയ്ൻമെന്‍റ്​ സിസ്റ്റം, ഡിജിറ്റൽ ഇൻസ്ട്രുമെന്‍റ്​ പാനൽ, ഡ്യുവൽ ഫ്രണ്ട് എയർബാഗുകൾ, ഇബിഡിയും കോർണറിംഗ് സ്ഥിരത നിയന്ത്രണവുമുള്ള എബിഎസ്, സ്പീഡ് അലേർട്ട് സിസ്റ്റം, ഡ്രൈവർ, കോ-ഡ്രൈവർ സീറ്റ് ബെൽറ്റ് വാണിങ്​, റിയർ പാർക്കിങ്​ സെൻസറുകളും ഡിസ്പ്ലേയും, ഫോളോ-മി-ഹോം ഹെഡ്​ലാമ്പ്​ തുടങ്ങി സവിശേഷതകളാൽ സമ്പന്നമാണ്​ പുതിയ തിയാഗോ. തിയാഗോ എക്സ്‌ടിഎയുടെ റെവട്രോൺ 1.2 ലിറ്റർ, 3 സിലിണ്ടർ എഞ്ചിൻ 86 ബി.എച്ച്​.പി കരുത്ത്​ ഉത്​പാദിപ്പിക്കും. 113 എൻഎം പീക്ക് ടോർക്കാണ്​ വാഹനത്തിന്​. അഞ്ച്​ സ്പീഡ് എ‌എം‌ടിയുമായി എഞ്ചിൻ ഇണക്കിച്ചേർത്തിരിക്കുന്നു.

പുതിയ വേരിയന്‍റിന്​ തുടക്കമിടുന്നതിനൊപ്പം കമ്പനി അതിന്‍റെ ഓട്ടോമാറ്റിക് ലൈൻ അപ് കൂടുതൽ ശക്തിപ്പെടുത്തുകയാണ്. 4 എഎംടി ഓപ്ഷനുകൾ വരുന്നതോടെ തിയോഗോ കൂടുതൽ ആകർഷകമാകുമെന്നാണ്​ ടാറ്റയുടെ പ്രതീക്ഷ. വാഹനത്തിന്‍റെ ബിഎസ്6 വെർഷൻ 2020ൽ പുറത്തിറക്കിയിരുന്നു. സുരക്ഷയുടെ കാര്യത്തിൽ നാല്​ സ്റ്റാർ റേറ്റിങാണ് തിയാഗോക്ക്​. 15 ഇഞ്ച് അലോയ് വീൽ, ഓട്ടോമാറ്റിക് ക്ലൈമറ്റ് കൺട്രോൾ എന്നിങ്ങനെയുള്ള സവിഷേതകളും തിയാഗോക്കുണ്ട്​.