നെക്​സോൺ ഇ.വി റേഞ്ച്​​​ വിവാദം: ഡൽഹി സർക്കാറിനെതിരേ ഹൈകോടതിയെ സമീപിച്ച്​ ടാറ്റ

ന്യൂഡൽഹി: നെക്സൺ ഇവിക്ക് നൽകുന്ന സബ്സിഡി താൽക്കാലികമായി നിർത്തിവയ്ക്കാനുള്ള ഡൽഹി സർക്കാരിന്‍റെ തീരുമാനത്തിനെതിരെ ടാറ്റ മോട്ടോഴ്‌സ് ഹൈക്കോടതിയെ സമീപിച്ചതായി റിപ്പോർട്ട്. ഒറ്റപ്പെട്ട പരാതിയുടെ അടിസ്​ഥാനത്തിലാണ്​ സർക്കാർ നടപടിയെന്നാണ്​ ഡൽഹി ഹൈകോടതിയിൽ ടാറ്റ സമർപ്പിച്ച ഹരജിയിൽ പറയുന്നത്​. കോടതിയിൽ റിട്ട് ഫയൽ ചെയ്തതായി ടാറ്റ മോട്ടോഴ്‌സ് വക്താവ് സ്ഥിരീകരിച്ചു.

'ഡൽഹി ട്രാൻസ്പോർട്ട് കമ്മീഷനിൽ നിന്ന് ഇത്തരമൊരു ഉത്തരവ്​ ലഭിക്കുന്നത് നിർഭാഗ്യകരമാണ്. ഉപഭോക്താക്കളുടെ താൽപ്പര്യങ്ങൾ സംരക്ഷിക്കുന്നതിനായി ഞങ്ങൾ ക്രിയാത്മകമായി ഇടപെടും. നെക്സൺ ഇവി മാത്രമാണ് കർശനമായ എഫ്​.എ.എം.ഇ മാനദണ്ഡങ്ങൾ പാലിക്കുന്ന ഇ.വി'-ടാറ്റ പ്രതിനിധി പറഞ്ഞു. ടാറ്റയുടെ​ വൈദ്യുത വാഹനമായ നെക്​സോൺ ഇ.വിക്കെതിരേ പരാതികൾ വ്യാപകമായതോടെയാണ്​ ഇ.വി സബ്​സിഡി താൽക്കാലികമായി നിർത്തിവയ്​ക്കാൻ തീരുമാനിച്ചതെന്നാണ്​ ആപ്​ സർക്കാർ പറയുന്നത്​​. ഇതുസംബന്ധിച്ച്​ ഡൽഹി ഗതാഗത മന്ത്രി കൈലാഷ് ഗലോട്ട് ട്വീറ്റ് ചെയ്തിരുന്നു. ഇ.വികളുടെ കാര്യത്തിൽ പ്രതിജ്ഞാബദ്ധമാണെങ്കിലും ഉപഭോക്​തൃ താൽപ്പര്യം കണക്കിലെടുക്കാനാവില്ലെന്നും മന്ത്രി ട്വീറ്റിൽ പറഞ്ഞിരുന്നു.

Delhi govt has decided to suspend subsidy on a EV car model, pending final report of a Committee, due to complaints by multiple users of sub-standard range performance. We r committed to support EVs, but not at the cost of trust & confidence of citizens in claims by manufacturers pic.twitter.com/R81S3kH6vT

— Kailash Gahlot (@kgahlot) March 1, 2021

'ഒരു ഇവി കാർ മോഡലിന് നൽകിയിരുന്ന സബ്സിഡി താൽക്കാലികമായി നിർത്തിവയ്ക്കാൻ ദില്ലി സർക്കാർ തീരുമാനിച്ചു. ഒന്നിലധികം ഉപഭോക്താക്കളുടെ പരാതികൾ കാരണം പരിശോധനാ കമ്മിറ്റിയുടെ അന്തിമ റിപ്പോർട്ട് ഇനിയും ലഭിച്ചിട്ടില്ല​. ഇ.വികളെ പിന്തുണയ്ക്കാൻ ഞങ്ങൾ പ്രതിജ്ഞാബദ്ധരാണ്. പക്ഷെ നിർമ്മാതാക്കളുടെ വാഗ്​ദാനങ്ങൾക്കും മുകളിലാണ്​ പൗരന്മാരുടെ വിശ്വാസ്യതയും വിശ്വാസവും'-മന്ത്രി ട്വീറ്റിൽ കുറിച്ചു. തന്‍റെ വാഹനത്തിന്​ കമ്പനി വാഗ്​ദാനം ചെയ്യുന്ന റേഞ്ച്​ നൽകുന്നില്ലെന്ന്​ പറഞ്ഞ്​ ഒരു മാസത്തിന്​ മുമ്പാണ്​ ഒരു ഉപഭോക്​താവ്​ പരാതി നൽകിയത്​.​ പരാതിയുമായി ബന്ധപ്പെട്ട് ഡൽഹി ഗതാഗത വകുപ്പ് ടാറ്റാ മോട്ടോഴ്‌സിന് കാരണം കാണിക്കൽ നോട്ടീസ് നൽകിയിരുന്നു. 2020 ഡിസംബർ മൂന്നിന് രജിസ്റ്റർ ചെയ്ത നെക്സൺ ഇവിയാണ് ​പരാതിക്ക്​ കാരണമായത്​.

സഫ്​ദർജംഗിലെ ഡീലർഷിപ്പിൽ നിന്ന്​ വാങ്ങിയ വാഹനം ഒറ്റ ചാർജിൽ 312 കിലോമീറ്റർ സഞ്ചരിക്കുമെന്നായിരുന്നു നിർമാതാക്കൾ വാഗ്​ദാനം ചെയ്​തിരുന്നത്​. എന്നാൽ വാഹനം 200 കിലോമീറ്റർ പോലും സഞ്ചരിക്കുന്നില്ലെന്ന്​ പരാതിക്കാരൻ പറയുന്നു. മൈലേജിനായി ഡീലർ നൽകിയ വിവിധ ഉപദേശങ്ങൾ കൃത്യമായി പാലിച്ചെങ്കിലും ഒരു പുരോഗതിയും കണ്ടില്ലെന്ന്​ നജഫ്ഗഡ്​ സ്വദേശിയായ വാഹന ഉടമയുംപറയുന്നു. സർക്കാർ അ​ന്വേഷിക്കാൻ തീരുമാനിച്ചതോടെ കൂടുതൽപേർ പരാതിയുമായി രംഗത്തുവരികയായിരുന്നു. ഉപഭോക്​താവിന്‍റെ ആശങ്ക പരിഹരിക്കുന്നതിന്​ സാധ്യമായ എല്ലാ നടപടികളും സ്വീകരിക്കുമെന്ന്​ അന്ന്​ ടാറ്റ മോട്ടോഴ്‌സ് വ്യക്​തമാക്കിയിരുന്നു. ഓട്ടോമോട്ടീവ് റിസർച്ച് അസോസിയേഷൻ ഓഫ് ഇന്ത്യ (ARAI) ൽ നിന്ന് ലഭിച്ച സർട്ടിഫിക്കേഷന്‍റെ അടിസ്ഥാനത്തിലാണ് നെക്‌സൺ ഇവിക്കായി ഫുൾ ചാർജിൽ 312 കിലോമീറ്റർ വാഗ്​ദാനം ചെയ്യുന്നത്​.

എയർ കണ്ടീഷന്‍റെ ഉപയോഗം, വ്യക്തിഗത ഡ്രൈവിംഗ് രീതി, റോഡിന്‍റെ അവസ്ഥ എന്നിവയെ ആശ്രയിച്ച്​ റേഞ്ച്​ മാറിമറിയും. ഡൽഹി ഇലക്ട്രിക് വെഹിക്കിൾ (ഇവി) പോളിസി പ്രകാരം 1,50,000 രൂപയുടെ മൂലധനമുള്ള ഇലക്ട്രിക് ഫോർ വീലർ വാങ്ങുന്നതിന് ഒരു കിലോവാട്ട് ബാറ്ററി ശേഷിക്ക് 10,000 രൂപ പ്രോത്സാഹനം നൽകുന്നുണ്ട്​.