ലോങ്​ വീൽബേസ്​ ഇവോക്​ അവതരിപ്പിച്ച്​ റേഞ്ച്​റോവർ; കൂടുതൽ ലെഗ്​ സ്​പെയ്​സും സൗകര്യങ്ങളും

അടുത്തിടെ പുറത്തിറക്കിയ റേഞ്ച്​റോവർ ഇവോക്​ എസ്​.യു.വിക്ക്​​ ലോങ്​ വീൽബേസ്​ പതിപ്പ്​ അവതരിപ്പിച്ചു. ഇവോക്​ എൽ എന്നാണ്​ ​വാഹനത്തിന്​ പേരിട്ടിരിക്കുന്നത്​. ചൈനയിലാണ്​ പുതിയ വകഭേദം ലഭ്യമാവുക. സാധാരണ ഇവോക്കിലുള്ളത്​ 4,371 മില്ലിമീറ്റർ വീ​ൽബേസാണ്​. ഇതിനു​ പകരം 4,531 മില്ലിമീറ്റർ വീൽബേസ് ഇവോക്​ എല്ലിന്​ ലഭിക്കും. വർധിച്ച വീൽബേസ് കാരണം എസ്‌യുവിക്ക് കൂടുതൽ ഇടം ലഭിക്കും. പിൻഭാഗത്ത് 125 എംഎം അധിക ലെഗ് റൂം ആണ്​ വാഹനത്തിന്​ വാഗ്​ദാനം ചെയ്യുന്നത്​. കൂടാതെ ഇലക്ട്രോണിക് ക്രമീകരിക്കാവുന്ന പിൻ സീറ്റുകളും ഉൾപ്പെടുത്തിയിട്ടുണ്ട്​. തൽക്കാലം വാഹനം ചൈനയിൽ മാത്രമാവും ലഭ്യമാവുക. ചൈനയിൽ ഇത്തരം വാഹനങ്ങൾക്ക്​ വലിയ ജനപ്രിയത ആണുള്ളത്​.

വിലകുറഞ്ഞ റേഞ്ച്​ റേവർ

റേഞ്ച്​ റോവർ മോഡലുകളിൽ ഏറ്റവും വിലകുറഞ്ഞ വാഹനമാണ്​ ഇവോക്​. കുഞ്ഞൻ റേഞ്ച്​ റോവർ എന്നും ഇവോക്​ അറിയപ്പെടുന്നു​. വെലാർ, സ്​പോർട്​, സ്​പോർട്​ എസ്​.വി.ആർ തുടങ്ങിയ മോഡലുകളെ അപേക്ഷിച്ച്​ കയ്യിലൊതുങ്ങുന്ന വാഹനമാണിത്​. ​ 64.12 ലക്ഷമാണ്​ ഇവോകി​െൻറ എക്​സ്​ ഷോറും വില. പുതിയ ഇവോകിൽ കൂടുതൽ കരുത്തുള്ള ഡീസൽ എഞ്ചിനും അധിക ഫീച്ചറുകളും ലഭിക്കും. പിവി പ്രോ ഇൻഫോടൈൻമെൻറ്​ സിസ്​റ്റം, ഡ്യൂവൽ ടോൺ ഇൻറീരിയർ തുടങ്ങിയ സവിശേഷതകളും ഇവോകിലുണ്ട്​.

മാറ്റങ്ങൾ

2021 ഇവോക്കി​െൻറ ഏറ്റവും വലിയ പരിഷ്​കരണങ്ങളിലൊന്ന് അതി​െൻറ ഡീസൽ എഞ്ചിനവണ്​. 2.0 ലിറ്റർ, നാല് സിലിണ്ടർ ഇഞ്ചീനിയം ഡീസൽ എഞ്ചിൻ 204 എച്ച്പി പുറത്തെടുക്കും. നേരത്തേ ഇത്​ 180 എച്ച്പി മാത്രമായിരുന്നു. ടോർകിൽ മാറ്റമില്ല. 430 എൻഎം ടോർകാണ്​ എഞ്ചിനുള്ളത്​. 2.0 ലിറ്റർ ഇഞ്ചീനിയം പെട്രോൾ എഞ്ചിൻ മാറ്റമില്ലാതെ തുടരുന്നു. 250 എച്ച്പി, 365 എൻ‌എം ടോർക്​ ഉത്പാദിപ്പിക്കുന്ന എഞ്ചിനാണിത്​. രണ്ട് എഞ്ചിനുകളും ഒമ്പത്​ സ്പീഡ് ഓട്ടോമാറ്റിക് ഗിയർബോക്​സുമായാണ്​ ഇണക്കിച്ചേർത്തിരിക്കുന്നത്​. ഓൾ-വീൽ ഡ്രൈവ് സ്​റ്റാൻഡേർഡായും നൽകിയിട്ടുണ്ട്​.

എസ്‌യുവിയുടെ ഇൻറീരിയറിലും ശ്രദ്ധേയമായ അപ്‌ഗ്രേഡുകൾ ഉണ്ട്​. 2021 ഇവോകിന് ജെ‌എൽ‌ആറി​െൻറ ഏറ്റവും പുതിയ പിവി പ്രോ ഇൻ‌ഫോടെയ്ൻ‌മെൻറ്​ സിസ്​റ്റം ലഭിക്കും. പുതിയ 3 ഡി സറൗണ്ട് ക്യാമറ സിസ്റ്റം (ഇതിന് മുമ്പ് റിയർ വ്യൂ ക്യാമറ മാത്രമേ ഉണ്ടായിരുന്നുള്ളൂ), എയർ അയോണൈസേഷൻ സിസ്റ്റത്തിനായുള്ള പിഎം 2.5 ഫിൽട്ടർ, ഫോൺ സിഗ്നൽ ബൂസ്റ്റർ, വയർലെസ് ചാർജർ എന്നിവയാണ് മറ്റ് സവിശേഷതകൾ. ലാൻഡ് റോവർ ആദ്യമായി ഡ്യുവൽ-ടോൺ ഡീപ് ഗാർനെറ്റ്/എബോണി ഇൻറീരിയർ കളർ സ്​കീമും ഇവോക്കിൽ അവതരിപ്പിച്ചിട്ടുണ്ട്​.

വേരിയൻറുകൾ

ഇന്ത്യയിലെ ഇവോക്കി​െൻറ വേരിയൻറുകളിൽ ലാൻഡ്​റോവർ കുറവുവരുത്തിയിട്ടുണ്ട്​. പെട്രോൾ, ഡീസൽ പതിപ്പുകൾ മുമ്പ് എസ്, ആർ-ഡൈനാമിക് എസ്ഇ എന്നിങ്ങനെ രണ്ട് ട്രിമ്മുകളിൽ ലഭ്യമായിരുന്നു. ഫേസ്​ലിഫ്​റ്റ്​ പതിപ്പിൽ പെട്രോൾ ഇപ്പോൾ ആർ-ഡൈനാമിക് എസ്ഇ ട്രിമ്മിൽ മാത്രമാകും ലഭ്യമാവുക. ഡീസൽ എസ് ട്രിമിൽ മാത്രം ലഭിക്കും. മെഴ്‌സിഡസ് ബെൻസ് ജി‌എൽ‌സി, ബി‌എം‌ഡബ്ല്യു എക്സ് 3 എന്നിവയാണ്​ ഇവോകി​െൻറ പ്രധാന എതിരാളികൾ.