റോയലാവാൻ ഇനി ചിലവ്​ കൂടും; 350 സി.സി ബൈക്കു​കൾക്ക്​ വിലവർധിപ്പിച്ച്​ റോയൽ എൻഫീൽഡ്​

2021 ഏപ്രിൽ മുതൽ ഒട്ടുമിക്ക ഇരുചക്ര വാഹന നിർമാതാക്കളും തങ്ങളുടെ മോഡലുകൾക്ക്​ വില വർധിപ്പിച്ചിരുന്നു. ഇതേ പാത പിന്തുടർന്ന്​ റോയൽ എൻഫീൽഡും 350 സി.സി ശ്രേണിയിലുള്ള തങ്ങളുടെ ഇരുചക്ര വാഹനങ്ങളുടെ വില വർധിപ്പിക്കുകയാണ്​. ചില മോഡലുകൾക്ക്​ 10000 രൂപയിലധികം വർധിക്കുന്നുണ്ട്​.

ഈ വർഷം ജനുവരിയിൽ പരിഷ്​കരിച്ച ചില മോഡലുകൾക്ക്​ കമ്പനി 3000 രൂപ വർധിപ്പിച്ചിരുന്നു. ഹിമാലയൻ, 650 സി.സി ട്വിൻ മോഡലുകളായ ഇന്‍റർസെപ്​റ്റർ, കോണ്ടിനന്‍റൽ ജി.ടി എന്നിവയുടെ അപ്​ഡേറ്റഡ്​ മോഡലുകൾക്കായിരുന്നു​ വിലവർധനവ്​.

350 സി.സി ബുള്ളറ്റുകൾക്കാണ്​ ഏറ്റവും കൂടുതൽ വില വർധിച്ചിരിക്കുന്നത്​. വേരിയന്‍റുകൾക്കനുസരിച്ച്​ 7000 രൂപ മുതൽ 13000 രൂപ വരെയാണ്​ വർധിച്ചത്​. ഡ്യൂവൽ ചാനൽ എ.ബി.എസ്​ സംവിധാനമുള്ള ക്ലാസിക്​ 350 മോഡലിന്​ 10,000 രൂപയാണ്​ വർധിക്കുന്നത്​. മെറ്റിയോറിന്​ 6000 രൂപ വർധിക്കുന്നു.

പുത്തൻ നിറങ്ങളോട്​ കൂടി ഫെബ്രുവരിയിൽ അവതരിപ്പിച്ച ഇന്‍റർസെപ്​റ്റർ, കോണ്ടിനന്‍റൽ ജി.ടി മോഡലുകൾക്ക്​ 2,75,467 രൂപ മുതൽ 3,13,367 വരേയാണ്​ വിലവരുന്നത്​. ജനുവരിയിലുള്ള വിലയേക്കാൾ 6000 രൂപ കൂടുതലാണ്​ ഇത്​. 2021മോഡൽ ഹിമാലയൻ 2.01 ലക്ഷം (എക്​സ്​ ഷോറൂം, ഡൽഹി) വിലയിട്ടാണ്​ വിപണിയിലെത്തിയത്​.

മോഡലുകളും ഓൺറോഡ്​ വിലയും (ഡൽഹി)

ക്ലാസിക്​ 350 (ഡ്യുവൽ ചാനൽ എ.ബി.എസ്​) - 2,05,004 രൂപ

ബുള്ളറ്റ്​ 350 -1,61,385

ബുള്ളറ്റ്​ 350 ഇ.എസ്​ - 1,77,342

മെറ്റിയോർ 350 (ഫയർബാൾ) -2,08,751

മെറ്റിയോർ 350 (സ്​റ്റെല്ലർ) -2,15,023

മെറ്റിയോർ 350 (സൂപ്പർനോവ) -2,25,478