നാല്​ കോടിയുടെ ആഡംബരം; പുതിയ റേഞ്ച് റോവർ സ്വന്തമാക്കി തെന്നിന്ത്യൻ നടി ​

തമിഴ്​, തെലുങ്ക്, ഹിന്ദി സിനിമ രംഗത്ത് തിളങ്ങുന്ന താരമാണ് പൂജ ഹെഗ്‌ഡെ. മോഡലിങ്​ രംഗത്ത് നിന്നാണ് പൂജ സിനിമയിലേക്ക് എത്തുന്നത്. തന്റെ യാത്രകൾക്കായി നടി പുത്തനൊരു കാർ വാങ്ങിയിരിക്കുകയാണ്​. നാല്​ കോടി വിലമതിക്കുന്ന പുതിയ ലാൻഡ് റോവർ റേഞ്ച് റോവർ എസ്‌.യു.വിയാണ് പൂജ സ്വന്തമാക്കിയത്​.

പൂജാ ഹെഗ്‌ഡെ തന്റെ പുതിയ എസ്‌.യു.വിയിൽ വന്നിറങ്ങുന്ന വിഡിയോ ഓൺലൈനിൽ ആരാധകർ ഏറ്റെടുത്തിട്ടുണ്ട്. സെലിബ്രിറ്റികൾക്കിടയിൽ ഏറ്റവും കൂടുതൽ ഫാൻസുള്ള കാർ കൂടിയാണിത്. ഈ ആഡംബര എസ്‌.യു.വി വാങ്ങുന്ന ആദ്യത്തെ സെലിബ്രിറ്റിയല്ല പൂജ ഹെഗ്‌ഡെ. നിമ്രത് കൗർ, രൺബീർ കപൂർ, ആദിത്യ റോയ് കപൂർ, സോനം കപൂർ, തെലുങ്ക് നടൻ മഹേഷ് ബാബു, മോഹൻലാൽ, മലൈക അറോറ തുടങ്ങിയവർ ഇതിനകം ഈ എസ്‌യുവി സ്വന്തമാക്കിയിട്ടുണ്ട്.

റേഞ്ച് റോവർ പെട്രോൾ, ഡീസൽ എഞ്ചിൻ ഓപ്ഷനുകളിൽ ലഭ്യമാണ്. എസ്‌.യു.വിയുടെ ലാന്റൗ ബ്രോൺസ് നിറത്തിൽ അണിഞ്ഞൊരുങ്ങിയ പതിപ്പാണ് താരം സ്വന്തമാക്കിയിരിക്കുന്നത്​. പുതിയ റേഞ്ച് റോവർ എസ്‌.യു.വിയുടെ വില 2.39 കോടി രൂപ മുതൽ 4.17 കോടിവരെയാണ്. അപ്​ഡേറ്റുകൾ അനുസരിച്ചാണ്​ വാഹനത്തിന്​ വിലവർധിക്കുന്നത്​.

മികച്ച യാത്രാ സുഖവും സേഫ്റ്റിയും പെർഫോമൻസുമെല്ലാം കോർത്തിണക്കി ഒരുക്കിയിരിക്കുന്ന സ്പോർട് യൂട്ടിലിറ്റി വാഹനമാണിത്​. 35-സ്പീക്കർ മെറിഡിയൻ സൌണ്ട് സിസ്റ്റം, 13.1 ഇഞ്ച് ഫ്ലോട്ടിംഗ് ഇൻഫോടെയ്ൻമെന്റ് സ്‌ക്രീനും പൂർണ ഡിജിറ്റൽ ഇൻസ്ട്രുമെന്റ് ക്ലസ്റ്ററും, ഹെഡ്-അപ്പ് ഡിസ്‌പ്ലേ, മൾട്ടി-സോൺ ക്ലൈമറ്റ് കൺട്രോൾ, ഫോർ സ്‌പോക്ക് സ്റ്റിയറിംഗ് വീൽ, പിൻസീറ്റ് എന്റർടെയ്ൻമെന്റ് സ്‌ക്രീൻ എന്നിവയാണ് എസ്‌യുവിയിലെ മറ്റ് പ്രധാന സവിശേഷതകൾ.