എക്​സ്​.യു.വി ജാവലിൻ​ എഡിഷൻ യഥാർഥ അവകാശിയെ തേടിയെത്തി; 'ഇതുമായി ഉടൻ കറങ്ങണ'മെന്നും താരം

മഹീന്ദ്ര എക്​സ്​.യു.വി 700​െൻറ ജാവലിൻ ഗോൾഡ്​ എഡിഷൻ ​ഒളിമ്പ്യൻ നീരജ്​ ചോപ്രക്ക്​ കൈമാറി. ടോക്കിയോ ഒളിമ്പിക്‌സ് 2020ലെ സ്വർണമെഡൽ ജേതാക്കൾക്കുവേണ്ടി മഹീന്ദ്ര പ്രത്യേകം തയ്യാറാക്കിയ വാഹനമാണ്​ എക്​സ്​.യു.വി 700​െൻറ ജാവലിൻ ഗോൾഡ്​ എഡിഷൻ. വാഹനത്തിന്​ നീരജ്​ ചോപ്ര മഹീന്ദ്രയോട്​ നന്ദി പറഞ്ഞു. 'നന്ദി ആനന്ദ്​ മഹീന്ദ്ര, ഇത്തരമൊരു വാഹനം സമ്മാനിച്ചതിന്​. ഉടൻ തന്നെ കാറുമായി ഒരു കറക്കം നടത്താൻ ആഗ്രഹമുണ്ട്​'-നീരജ്​ സമൂഹമാധ്യമത്തിൽ പങ്കുവച്ച കുറിപ്പിൽ പറഞ്ഞു.

കാറിന്റെ വശത്ത് ജാവലിൻ എറിയുന്ന നീരജി​െൻറ ചിത്രവും ഒളിമ്പിക്​സിൽ പിന്നിട്ട​ 87.58 മീറ്റർ ദൂരവും രേഖപ്പെടുത്തിയിട്ടുണ്ട്​. നേരത്തേ ഒളിമ്പ്യൻ സുമിത് ആന്റിലിനും വാഹനം കൈമാറിയിരുന്നു. 2020 സമ്മർ പാരാലിമ്പിക്‌സിൽ പുരുഷന്മാരുടെ ജാവലിൻ ത്രോ എഫ്64 വിഭാഗത്തിൽ സുമിത് സ്വർണ്ണം നേടിയിരുന്നു.

ടോക്കിയോ ഒളിമ്പിക്‌സ് 2020ലെ സ്വർണമെഡൽ ജേതാക്കൾക്ക് എക്​സ്​.യു.വി സമ്മാനിക്കുമെന്ന് മഹീന്ദ്ര ഗ്രൂപ്പ് ചെയർമാൻ ആനന്ദ് മഹീന്ദ്ര നേരത്തെ പ്രഖ്യാപിച്ചിരുന്നു. ഇതിനായി ജാവലിൻ എഡിഷൻ എന്ന പേരിൽ പ്രത്യേക വാഹനം പുറത്തിറക്കുകയും ചെയ്​തു. പ്രത്യേക നിറവും ബാഡ്​ജിങ്ങും വാഹനത്തിൽ ഉൾപ്പെടുത്തിയിട്ടുണ്ട്​. കാറിനായി ഗോൾഡൻ തീമും മഹീന്ദ്ര ആവിഷ്​കരിച്ചിരുന്നു. തൊലിപ്പുറത്തെ മാറ്റങ്ങൾ മാത്രമാണ്​ വാഹനത്തിനുള്ളത്​. മറ്റ്​ പ്രത്യേകതകളെല്ലാം സാധാരണ ​മോഡലുകൾക്ക്​ സമാനമാണ്​.

എക്​സ്​.യു.വി 700 ലോഞ്ച് ചെയ്​തതിന് ശേഷം ഇതിനകം 65,000 ബുക്കിങുകൾ ലഭിച്ചതായി കമ്പനി നേരത്തെ പറഞ്ഞിരുന്നു. സാധാരണ ഉപഭോക്തൃ ഡെലിവറികളും ആരംഭിച്ചിട്ടുണ്ട്​. 2022 ജനുവരി 14നകം കുറഞ്ഞത് 14,000 എക്​സ്​.യു.വി700 കൾ നിരത്തിൽ എത്തിക്കാനാണ് മഹീന്ദ്ര ലക്ഷ്യമിടുന്നത്. 12.49 ലക്ഷം മുതൽ 22.89 ലക്ഷംവരെയാണ്​ എക്​സ്​.യു.വിയുടെ എക്​സ്​ഷോറും വില.