വാഹനങ്ങൾ മറ്റു സംസ്​ഥാനത്തുനിന്ന്​ കൊണ്ടുവരു​േമ്പാൾ വീണ്ടും രജിസ്റ്റർ ചെയ്യേണ്ട; ബി.എച്ച്​ സീരീസുമായി കേന്ദ്രം

ന്യൂഡൽഹി: സ്വകാര്യ വാഹനങ്ങൾ മറ്റു സംസ്​ഥാനങ്ങളിൽനിന്ന്​ കൊണ്ടുവരു​േമ്പാൾ വീണ്ടും രജിസ്റ്റർ ചെയ്യുന്നത്​ ഒഴിവാക്കാൻ പുതിയ സംവിധാനം വരുന്നു. ഇതിനായി ഭാരത്​ സീരിസ്​ (BH) അവതരിപ്പിച്ചിരിക്കുകയാണ്​ കേന്ദ്ര സർക്കാർ.

പ്രതിരോധ ഉദ്യോഗസ്ഥർ, കേന്ദ്ര-സംസ്ഥാന സർക്കാറുകളിലെ ജീവനക്കാർ, പൊതുമേഖലാ സ്ഥാപനങ്ങൾ, സംഘടനകൾ, നാലോ അതിലധികമോ സംസ്ഥാനങ്ങളിലും കേന്ദ്രഭരണപ്രദേശങ്ങളിലും ഓഫിസുകളുള്ള സ്വകാര്യമേഖലയിലെ കമ്പനികളിൽ ജോലി ചെയ്യുന്നവർ എന്നിവരുടെ വ്യക്തിഗത വാഹനങ്ങൾക്കാണ്​ ഈ സൗകര്യം ഉപയോഗിക്കാൻ കഴിയുക. താൽപ്പര്യമുള്ളവർക്ക്​ മാത്രം ഈ സൗകര്യം ഉപയോഗപ്പെടുത്തിയാൽ മതി. ഇത്തരം വ്യക്തികൾ ഇടക്കിടെ ജോലി​ സ്​ഥലത്തുനിന്ന്​ ട്രാൻസ്​ഫറാകാൻ സാധ്യതയുള്ളതിനാലാണ്​ ഇവർക്ക് ഈ​ സൗകര്യം നൽകുന്നത്​.

നിലവിൽ, ഒരു വ്യക്തി രജിസ്റ്റർ ചെയ്ത സംസ്ഥാനം ഒഴികെയുള്ള ഏത് സംസ്ഥാനത്തും പരമാവധി 12 മാസം മാത്രമാണ്​ വാഹനം ഉപയോഗിക്കാൻ കഴിയുക. 12 മാസം കഴിയുന്നതിന് മുമ്പ് വാഹനം പുതിയ സംസ്​ഥാനത്ത്​ വീണ്ടും രജിസ്റ്റർ ചെയ്യണം.

മറ്റ് സംസ്ഥാനങ്ങളിലേക്ക് ഇത്തരം വാഹനങ്ങളുടെ കൈമാറ്റം എളുപ്പമാക്കുക എന്ന ലക്ഷ്യത്തോടെയാണ്​ ഭാരത്​ സീരീസിന്‍റെ പ്രാരംഭ പദ്ധതി വിജ്ഞാപനം ചെയ്തത്. ഭാരതത്തെ സൂചിപ്പിക്കുന്ന BH സീരീസിൽ രജിസ്റ്റർ ചെയ്ത വാഹനങ്ങൾ ഒരു പുതിയ സംസ്ഥാനത്തിലേക്ക് മാറ്റുമ്പോൾ വീണ്ടും രജിസ്ട്രേഷന്​ ആവശ്യമില്ല.

വാഹന ഉടമകൾ 'ബി.എച്ച്' സീരീസ്​ തെരഞ്ഞെടുക്കുകയാണെങ്കിൽ ചുരുങ്ങിയ രണ്ട് വർഷത്തേക്കോ ​അല്ലെങ്കിൽ രണ്ടിന്‍റെ ഗുണിതങ്ങളായി വരുന്ന വർഷങ്ങളിലേക്കോ റോഡ് നികുതി അടക്കണം. എല്ലാ പ്രക്രിയകളും ഓൺലൈൻ വഴിയായിരിക്കും.

നേരത്തെ മന്ത്രാലയം 'IN' സീരീസായിരുന്നു നിർദേശിച്ചിരുന്നത്​. കുറഞ്ഞത് അഞ്ച് സംസ്ഥാനങ്ങളിൽ ഓഫിസുകളുള്ള സ്വകാര്യ സ്ഥാപനങ്ങളിലെ ജീവനക്കാർക്ക് യോഗ്യതയുണ്ടെന്നും അന്ന്​ വ്യക്​തമാക്കിയിരുന്നു. അന്തിമ വിജ്ഞാപനത്തിൽ, 'IN' സീരീസ് 'BH' ആയി മാറുകയായിരുന്നു.

നിലവിൽ സ്വകാര്യ വാഹനങ്ങൾ രജിസ്റ്റർ ചെയ്യുമ്പോൾ 15 വർഷത്തെ റോഡ് നികുതി മുൻകൂറായി അടക്കേണ്ടതുണ്ട്. ഈ വാഹനങ്ങൾ മറ്റേതെങ്കിലും സംസ്ഥാനത്തേക്ക് മാറ്റുകയാണെങ്കിൽ വീണ്ടും രജിസ്റ്റർ ചെയ്യണം. ഇതുവരെ ഉപയോഗിച്ച കാലം കഴിഞ്ഞ്,​ 15 വർഷം ആകുന്നത്​ വരേക്കുള്ള റോഡ്​ നികുതിയും അടക്കണം. മുമ്പ്​ ഈ കാലയളവിലേക്ക്​ അടച്ച നികുതി നേരത്തെ രജിസ്റ്റ്​ർ ചെയ്​ത സംസ്​ഥാനത്തുനിന്ന്​ ​െക്ലയിം ചെയ്​ത്​ എടുക്കാവുന്നതാണ്​. ഈ നൂലാമാലകൾ അവസാനിപ്പിക്കുകയാണ് പുതിയ നീക്കത്തിലൂടെ സർക്കാർ ലക്ഷ്യമിടുന്നത്.

സംസ്​ഥാനങ്ങൾ തമ്മിൽ റോഡ്​ നികുതി തുക സ്വയമേവ കൈമാറുന്ന സംവിധാനത്തെ കുറിച്ച് നേരത്തെ​ ആലോചനയുണ്ടായിരുന്നു. എന്നാൽ, വിവിധ സംസ്​ഥാനങ്ങളിൽ ടാക്​സ്​ സ്ലാബ്​ വ്യത്യസ്​തമാണെന്നതും എല്ലാ സംസ്​ഥാനങ്ങളും പ്രസ്​തുത ബോർഡിൽ വരാത്തതും പദ്ധതിക്ക്​ വിഘാതമായി.

പുതിയ 'ബി.എച്ച്' സീരീസിൽ, 10 ​​ലക്ഷം രൂപ വരെ വിലയുള്ള വാഹനങ്ങൾക്ക് എട്ട്​ ശതമാനമാണ്​ റോഡ് നികുതി. 10-20 ലക്ഷം രൂപ വരെ വിലയുള്ളവക്ക് 10ഉം 20 ലക്ഷത്തിന് മുകളിൽ വിലയുള്ള വാഹനങ്ങൾക്ക് 12ഉം ശതമാനമാണ്​ റോഡ്​ ടാക്​സ്​. ഡീസൽ വാഹനങ്ങൾക്ക് രണ്ട്​ ശതമാനം അധികവ​ും ഇലക്ട്രിക് വാഹനങ്ങൾക്ക് രണ്ട്​ ശതമാനം കുറവും നികുതിയിൽ വ്യത്യാസമുണ്ടാകും.

14 വർഷം കഴിഞ്ഞാൽ മോട്ടോർ വാഹന നികുതി വർഷം തോറും ഈടാക്കും. ഇത് വാഹനത്തിന് നേരത്തെ ഈടാക്കിയ തുകയുടെ പകുതിയായിരിക്കും.