ചരിത്രത്തിലാദ്യമായി ചൊവ്വയിൽ ഒരു ടെസ്റ്റ്​ ഡ്രൈവ്​; റോവർ സഞ്ചരിച്ചത്​ 6.5 മീറ്റർ, വീഡിയോ വൈറൽ

ചരിത്രത്തിലാദ്യമായി ചൊവ്വയിൽ ഒരു വാഹനം ടെസ്റ്റ്​ ഡ്രൈവ്​ നടത്തി. ഫെബ്രുവരി 18ന്​ ലാൻഡ്​ ചെയ്​ത റോവർ ആണ്​ ചൊവ്വയുടെ ഉപരിതലത്തിലൂടെ സഞ്ചരിച്ചത്​. 33 മിനിട്ട്​ എടുത്ത്​ 6.5 മീറ്റർ ദൂരമാണ്​ ​േറാവർ ടെസ്റ്റ്​ ഡ്രൈവ്​ നടത്തിയത്​. അമേരിക്കൻ ബഹിരാകാശ ഏജൻസിയായ നാസയുടെ ആറ് ചക്ര വാഹനമാണ്​ റോവർ. റോവറിലെ ശാസ്ത്രീയ ദൗത്യം ആരംഭിക്കുന്നതിനുമുമ്പ് എല്ലാ സിസ്റ്റങ്ങളും സബ്സിസ്റ്റവും പരിശോധിക്കാനും കാലിബ്രേറ്റ് ചെയ്യാനും ആദ്യത്തെ ടെസ്റ്റ് ഡ്രൈവിലൂടെ സാധിച്ചതായി നാസയിലെ വിദഗ്​ധർ പറയുന്നു.

ആദ്യ ഡ്രൈവിൽ റോവർ നാല് മീറ്റർ മുന്നോട്ട് നീങ്ങി. തുടർന്ന് 150 ഡിഗ്രി ഇടത്തേക്ക് തിരിഞ്ഞ്​ 2.5 മീറ്റർ പിന്നിലേക്ക്​ സഞ്ചരിക്കുകയും ചെയ്​തു. നിലവിൽ വാഹനം ചൊവ്വയുടെ താൽക്കാലിക പാർക്കിങ്​ സ്ഥലത്ത് നിർത്തിയിട്ടിരിക്കുകയാണെന്ന്​ നാസ പറയുന്നു. 'മറ്റ് ഗ്രഹങ്ങളിലെത്തുന്ന ചക്ര വാഹനങ്ങളുടെ കാര്യമെടുത്താൽ, ആദ്യത്തെ ഡ്രൈവിന്​ വലിയ പ്രാധാന്യമുണ്ട്​. റോവറിലെ എല്ലാ സിസ്റ്റങ്ങളും സബ്സിസ്റ്റവും പരിശോധിക്കാനും കാലിബ്രേറ്റ് ചെയ്യാനും ഇതിലൂടെ സാധിച്ചു. വാഹനത്തിന്‍റെ ഡ്രൈവ് സിസ്റ്റം കാര്യക്ഷമമാണെന്ന്​ ഞങ്ങൾക്ക് ഇപ്പോൾ ഉറപ്പുണ്ട്' -നാസയുടെ മാർസ് 2020 റോവർ മൊബിലിറ്റി ടെസ്റ്റ് എഞ്ചിനീയർ അനൈസ് സരിഫിയാൻ പറഞ്ഞു.

പാറ സാമ്പിളുകൾ ശേഖരിച്ച് അണുവിമുക്തമാക്കിയ ടൈറ്റാനിയം ട്യൂബുകളിൽ അടയ്ക്കുന്നത്​ റോവറിന്‍റെ ദൗത്യങ്ങളിൽ ഒന്നാണ്​. ശാസ്ത്രജ്ഞർക്ക് ചൊവ്വയിലെ സൂക്ഷ്മജീവികളുടെ സാന്നിധ്യം പഠിക്കാൻ ഇതിലൂടെ കഴിയും. ഇത് ഗ്രഹത്തിന്‍റെ ഭൂമിശാസ്ത്രത്തെയും മുൻകാല കാലാവസ്ഥയെയും അറിയാൻ സഹായിക്കും. ഇത് ചൊവ്വയിലേക്കുള്ള മനുഷ്യന്‍റെ നേരിട്ടുള്ള പര്യവേക്ഷണത്തിന് വഴിയൊരുക്കുകയും ചെയ്യും. ദൗത്യം ആരംഭിച്ചുകഴിഞ്ഞാൽ റോവർ 200 മീറ്ററിലധികം യാത്ര ചെയ്യുമെന്നാണ്​ ശാസ്​ത്രജ്ഞരുടെ പ്രതീക്ഷ.

ഫെബ്രുവരി 18ന് ചൊവ്വയിൽ ഇറങ്ങിയ വാഹനത്തിൽ ആദ്യംചെയ്​തത്​ സോഫ്റ്റ്​വെയർ അപ്ഡേറ്റ് പോലുള്ള പതിവ് പരിശോധനകളാണ്​. ചൊവ്വയിലേക്ക് ഇറങ്ങാൻ സഹായിച്ച കമ്പ്യൂട്ടർ പ്രോഗ്രാമിനെ മാറ്റിസ്ഥാപിച്ച് നാസ ഗ്രഹത്തെ വിശകലനം ചെയ്യാനുള്ള സോഫ്​റ്റ്​വെയർ ഇടുകയാണ്​ ആദ്യം ചെയ്​തത്​. മാർച്ച് രണ്ടിന് രണ്ട്​ മീറ്റർ നീളമുള്ള റോബോട്ടിക് കൈകൾ ആദ്യമായി പ്രവർത്തിപ്പിച്ചു. റോവർ അതിന്‍റെ 25 ക്യാമറകൾ ഉപയോഗിച്ചാണ്​ ചൊവ്വയിൽ നിന്നുള്ള ദൃശ്യങ്ങളും ചിത്രങ്ങളും അയയ്ക്കുന്നത്​.