വാഹന രേഖകൾ പരിശോധിക്കാൻ വഴിയിൽ തടയരുത്​​; ഉത്തരവ്​ കർശനമാക്കി ഇന്ത്യൻ നഗരം

രേഖകൾ പരിശോധിക്കാൻ ട്രാഫിക്​ പൊലീസുകാർ വാഹനങ്ങളെ വഴിയിൽ തടയുന്നത്​ കർശനമായി വിലക്കി മുംബൈ പൊലീസ്​. ട്രാഫിക്​ ഡിപ്പാർട്ട്​മെൻറിന്​​ മുംബൈ പൊലീസ്​ കമ്മീഷണർ ഹേമന്ത് നഗ്രാലെ ഇതുസംബന്ധിച്ച്​ കർശന നിർദേശം നൽകി​. ട്രാഫിക് പോലീസി​െൻറ അനാവശ്യ വാഹന പരിശോധനകൾ ഗതാഗതക്കുരുക്കിന് ഇടയാക്കുന്നതായുള്ള റിപ്പോർട്ടുകളുടെ അടിസ്​ഥാനത്തിലാണ്​ കമ്മീഷണറുടെ നടപടി. ട്രാഫിക് നിയമങ്ങൾ ലംഘിക്കുന്ന വാഹനങ്ങളെമാത്രം ഇനിമുതൽ ട്രാഫിക് പോലീസ് തടഞ്ഞ്​ പരിശോധിച്ചാൽ മതിയെന്നും ഉത്തരവിൽ പറയുന്നു.

മോട്ടോർ വാഹന നിയമത്തിലെ വ്യവസ്ഥകൾ അനുസരിച്ച് വാഹനങ്ങളുടെയോ രേഖകളുടെയോ പരിശോധന ട്രാഫിക് പോലീസ് ഉദ്യോഗസ്ഥരുടെ അധികാര പരിധിയിൽ വരുന്നില്ലെന്നും കമ്മീഷണർ ഉത്തരവിൽ ചൂണ്ടിക്കാട്ടി.'ചെറിയ കാര്യങ്ങൾക്കുപോലും വാഹനങ്ങൾ തടയുന്ന ട്രാഫിക് ഉദ്യോഗസ്ഥരുടെ നടപടി പലപ്പോഴും ഗതാഗതക്കുരുക്കിന് കാരണമാകുന്നു'-മുംബൈ പോലീസ് കമ്മീഷണർ ഹേമന്ത് നഗ്രാലെ പറഞ്ഞു. ട്രാഫിക് നിയന്ത്രിക്കുന്നതിന് മുൻഗണന നൽകണമെന്നും നിയമലംഘനങ്ങൾ ഉണ്ടായാൽ മാത്രം വാഹനങ്ങൾ തടയണമെന്നുമുള്ള കർശന നിർദേശമാണ്​ നൽകിയിരിക്കുന്നത്​. 'ആർടിഒ ഉദ്യോഗസ്ഥരോ ലോക്കൽ പോലീസോ സംയുക്തമായി പരിശോധന നടത്തുന്നുണ്ടെങ്കിലും, ട്രാഫിക് പോലീസുകാർ തങ്ങളുടെ ഉത്തരവാദിത്വങ്ങളിൽ മാത്രം ശ്രദ്ധിക്കണം. ഉത്തരവ്​ ട്രാഫിക് പോലീസുകാർ പാലിക്കുന്നില്ലെങ്കിൽ, ട്രാഫിക് ഡിവിഷ​െൻറ ഇൻചാർജ് അതി​െൻറ ഉത്തരവാദിത്തം ഏ​െറ്റടുക്കണം'-ഉത്തരവിൽ പറയുന്നു.

'ചില ട്രാഫിക്​ പോലീസുകാർ റോഡ്​ മധ്യത്തിൽ ഡ്രൈവർമാരുടെയോ വാഹനങ്ങളുടെയോ രേഖകൾ പരിശോധിക്കാൻ വാഹനങ്ങൾ നിർത്തുന്നത് കാണാറുണ്ട്​. ഈ പരിശോധന ഗതാഗതക്കുരുക്കിന് കാരണമാകുന്നു. ഇതുമായി ബന്ധപ്പെട്ട് നിരവധി പരാതികൾ ഞങ്ങൾക്ക് ലഭിച്ചിട്ടുണ്ട്. പരിശോധനകൾ തികച്ചും അനാവശ്യമാണ്. ട്രാഫിക് പോലീസുകാർ ട്രാഫിക് നിയന്ത്രിക്കുന്നതിൽ കൂടുതൽ ശ്രദ്ധ കേന്ദ്രീകരിക്കണം'-മുതിർന്ന പോലീസ് ഉദ്യോഗസ്ഥൻ പറഞ്ഞു.