ആഢംബരങ്ങളുടെ തമ്പുരാൻ, പുതിയ ബെൻസ്​ ഇ ക്ലാസ്​ അവതരിപ്പിച്ചു

മെഴ്‌സിഡസ് ബെൻസ്, 2021 മോഡൽ ഇ-ക്ലാസ് ഇന്ത്യയിൽ അവതരിപ്പിച്ചു. വില 63.6 ലക്ഷം രൂപയിൽ ആരംഭിക്കും. അകത്തും പുറത്തും അലങ്കാരചാതുരിയിൽ നിരവധി മാറ്റങ്ങളോടെയാണ്​ പുതിയ ബെൻസ്​ വരുന്നത്​. രൂപകൽപ്പനയിലും സമഗ്രമായ പരിഷ്​കാരങ്ങളുണ്ട്​. പുതുതലമുറ എൻ.‌ടി.‌ജി 6 ടെലിമാറ്റിക്സും എം‌ബി‌യു‌എക്സ് സിസ്റ്റവും പുതിയ ഇ-ക്ലാസിൽ ഉൾപ്പെടുത്തിയിട്ടുണ്ട്​. ഏററവും ഉയർന്ന വേരിയന്‍റിന്‍റെ വില 80.9 ലക്ഷം രൂപയാണ്​. 3079 മില്ലിമീറ്റർ വീൽബേസ് കാരണം സെഗ്‌മെന്‍റിലെ ഏറ്റവും വിശാലമായ ക്യാബിനാണ് ഇ-ക്ലാസിന്​. 5075 മില്ലിമീന്‍റാണ്​ വാഹനത്തിന്‍റെ നീളം.

'പുതിയ ഇ-ക്ലാസ് മുമ്പത്തേതിനേക്കാൾ ചലനാത്മകവും സാങ്കേതികവിദ്യകളാൽ നിറഞ്ഞതുമാണ്​. ആഢംബരത്തിൽ വിട്ടുവീഴ്ച ചെയ്യാതെ സ്പോർട്ടി ആയി വാഹനം ഓടിക്കാൻ ആഗ്രഹിക്കുന്നവർക്കായാണ്​ വാഹനം പുറത്തിറക്കിയിരിക്കുന്നത്​' -മെഴ്‌സിഡസ് ബെൻസ് ഇന്ത്യയുടെ എംഡിയും സിഇഒയുമായ മാർട്ടിൻ ഷെങ്ക് പറഞ്ഞു. ബെൻസുകളിൽ സാധാരണ വരുന്നതുപോലുള്ള ഇരട്ട ഹെഡ്​ലൈറ്റും എൽഇഡി ഡിആർഎല്ലും പുതിയ വാഹനത്തിൽ ഇല്ല. സിംഗിൾ എൽഇഡി ഡിആർഎൽ കാഴ്​ച്ചയിൽ കൂടുതൽ മികച്ചതായി തോന്നും. പുതിയ എൽഇഡി ഹെഡ്‌ലാമ്പുകളും ആകർഷകമാണ്​. പിൻഭാഗം പുതുതായി രൂപകൽപ്പന ചെയ്തിട്ടുണ്ട്. പിന്നിലെ സ്പ്ലിറ്റ് ടെയിൽ ലൈറ്റ് ഡിസൈനും പുതുമയാണ്​. പിൻഭാഗത്തെ ക്വാർട്ടർ ഗ്ലാസ് മെഴ്‌സിഡസ്-മെയ്ബാക്കിൽ നിന്ന് പ്രചോദനം ഉൾക്കൊണ്ടാണ്​ നിർമിച്ചിരിക്കുന്നത്​.

ഉള്ളിൽ പ്ലഷ് ആർട്ടിക്കോ ലെതർ ഡാഷ്‌ബോർഡും മുന്നിലും പിന്നിലും വുഡ് ട്രിമ്മുകളുണ്ട്. 37 ഡിഗ്രി വരെ ചരിക്കാൻ കഴിയുന്നതാണ്​ പിൻസീറ്റ്​. ബർമസ്റ്റർ സറൗണ്ട് സൗണ്ട് സിസ്റ്റം, പനോരമിക് സൺറൂഫ്, വയർലെസ് ചാർജർ എന്നിവ പോലുള്ള സൗകര്യ ലഭിക്കും. പുതിയ ബെൻസിൽ യൂസർ എക്സ്പീരിയൻസ് ഇൻഫോടെയ്ൻമെന്‍റ്​ സിസ്റ്റത്തിന്‍റെ സംയോജനത്തോടെ ക്യാബിൻ അനുഭവം മെച്ചപ്പെടുത്തിയിട്ടുണ്ട്​.

ശക്തമായ കമ്പ്യൂട്ടർ, മികച്ച സ്‌ക്രീനുകൾ, ഗ്രാഫിക്സ്, ഇഷ്‌ടാനുസൃതമാക്കാവുന്ന ഡിസ്‌പ്ലേ, മികച്ച സോഫ്​റ്റ്​വെയർ, വോയ്‌സ് അസിസ്റ്റ്,​ ഇരട്ട 12.3 ഇഞ്ച് ഡിസ്‌പ്ലേ സ്‌ക്രീനുകളുള്ള ഡിജിറ്റൽ കോക്​പിറ്റ് തുടങ്ങിയവ വാഹനത്തിൽ ലഭിക്കും. ബെൻസ് ഇ-ക്ലാസിനായി മൂന്ന്​ എഞ്ചിൻ ഓപ്ഷനുകൾ വാഗ്ദാനം ചെയ്യുന്നുണ്ട്​. 2 ലിറ്റർ പെട്രോൾ, 2 ലിറ്റർ ഡീസൽ, എഎംജി ലൈനിൽ 3 ലിറ്റർ ഡീസൽ എന്നിവയാണവ. 2 ലിറ്റർ പെട്രോൾ 194 ബിഎച്ച്പി പുറത്തെടുക്കു​േമ്പാൾ 2 ലിറ്റർ ഡീസൽ 192 ബിഎച്ച്പി കരുത്തുള്ളതാണ്​. കൂടുതൽ കരുത്തുറ്റ 3 ലിറ്റർ ഡീസൽ 282 ബിഎച്ച്പി സൃഷ്​ടിക്കും.

പോളാർ വൈറ്റ്, ഒബ്സിഡിയൻ ബ്ലാക്ക്, ഹൈടെക് സിൽവർ, മൊജാവേ സിൽവർ എന്നിവയാണ് ഇ-ക്ലാസിന് ലഭ്യമായ നിറങ്ങൾ. സെലനൈറ്റ് ഗ്രേ, ഡിസൈനോ ഹൈസിന്ത് റെഡ് എന്നിങ്ങനെ രണ്ട് നിറങ്ങൾകൂടി ഒരു നിശ്ചിത സമയത്തേക്ക് ലഭ്യമാണെന്നും ബെൻസ്​ പറയുന്നു.