ഇന്ധന വിലയിൽ വലഞ്ഞിരിക്കുകയാണോ​? സി.എൻ.ജി ബ്രെസ്സ ഒന്ന്​ പരീക്ഷിച്ച്​ നോക്കിയാലോ?

വാഹന നിർമാതാക്കളെല്ലാം വൈദ്യുതിയുടെ പിന്നാലെ പായു​േമ്പാഴും 'സമയമായിട്ടില്ല' എന്ന കടുംപിടിത്തത്തിലാണ്​ മാരുതി സുസുക്കി. വൈദ്യുതിക്ക്​ പകരം സി.എൻ.ജി ആണ്​ മാരുതി കാണുന്ന ബദൽ. മാറ്റത്തിനോടൊപ്പം നിന്നില്ലെങ്കിൽ കാലം നിങ്ങളെ എടുത്തുമാറ്റും എന്ന മുന്നറിയിപ്പ്​ ഇതിനകംതന്നെ വാഹന മേഖലയിലെ വിദഗ്​ധർ മാരുതിക്ക്​ നൽകിയിട്ടുമുണ്ട്​. എന്നാൽ തങ്ങളുടെ നിലപാടിലുറച്ച്​ കൂടുതൽ വാഹനങ്ങളെ സി.എൻ.ജി ആക്കാനാണ്​ മാരുതിയുടെ തീരുമാനം.

സ്വിഫ്റ്റ്, ഡിസയർ, ബ്രെസ്സ പോലുള്ള പ്രീമിയം മോഡലുകളുടെ സി.എൻ.ജി പതിപ്പുകൾ ഉടൻ നിരത്തിലിറക്കാനാണ്​ ഇന്ത്യൻ വാഹനഭീമ​െൻറ നീക്കം. സി‌എൻ‌ജി പവർട്രെയിൻ വാഗ്​ദാനം ചെയ്യുന്ന രാജ്യത്തെ ആദ്യ എസ്‌യുവിയായിരിക്കും ബ്രെസ്സ. അരീന ഡീലർഷിപ്പ് വഴി വിൽക്കുന്ന എല്ലാ വാഹനങ്ങൾക്കും സി.എൻ.ജി പതിപ്പ്​ നൽകാനും​ മാരുതിക്ക്​ പദ്ധതിയുണ്ട്​.

ബ്രെസ്സ സി‌എൻ‌ജി

ബ്രെസ്സ സി‌എൻ‌ജിക്ക്​ കരുത്തും ടോർക്കും പെട്രോൾ മോഡലിനേക്കാൾ കുറവായിരിക്കും​. 1.5 ലിറ്റർ, നാല് സിലിണ്ടർ നാച്ചുറലി ആസ്​പിറേറ്റഡ് എഞ്ചിൻ തന്നെയായിരിക്കും വാഹനത്തിൽ ഉൾപ്പെടുത്തുക​. 105എച്ച്​.പി കരുത്തും 138എൻ.എം ടോർക്കും പെട്രോൾ ബ്രെസ്സക്ക്​ ലഭിക്കുന്നുണ്ട്​. ഇത്രയും കരുത്ത്​ സി.എൻ.ജിയിൽ ഉണ്ടാകില്ല. മിഡ്-സ്പെക്ക് എൽഎക്​സ്​ഐ, വിഎക്​സ്​ഐ ട്രിമ്മുകളിലാവും സി.എൻ.ജി ഉൾപ്പെടുത്തുക.

2020 ൽ വിറ്റാര ബ്രെസ്സ പുതുക്കിയപ്പോൾ, ചെറിയ സ്റ്റൈലിംഗ് മാറ്റങ്ങൾ വരുത്തിയിരുന്നു. സിഎൻജി പതിപ്പിൽ കൂടുതൽ മാറ്റങ്ങൾ ഉണ്ടാകുമോ എന്ന കാര്യം വ്യക്​തമല്ല.

'ഭാഗ്യവശാൽ, വിപണിയിൽ സിഎൻജി ഉപയോഗം, പ്രത്യേകിച്ച് ചെറിയ കാറുകൾക്ക് ഏറെ സാധ്യതയുള്ളതാണ്​. ഉപഭോക്താക്കൾക്ക് ഇത്​ വളരെ സ്വീകാര്യവുമാണ്​'-മാരുതി ചെയർമാൻ ആർ.സി. ഭാർഗവ പറഞ്ഞു.

ഇന്ധന ഉപഭോഗവും മലിനീകരണവും ഗണ്യമായി കുറയ്ക്കാൻ കഴിയുന്ന സിഎൻജി, ഹൈബ്രിഡ് കാറുകളാണ്​ മാരുതിയുടെ ലക്ഷ്യമെന്നും അദ്ദേഹം കൂട്ടിച്ചേർത്തു. 2020-21 സാമ്പത്തിക വർഷത്തിൽ ആഭ്യന്തര വിപണിയിൽ മൊത്തത്തിലുള്ള വിൽപ്പന എട്ട് ശതമാനം കുറഞ്ഞെങ്കിലും സിഎൻജി വാഹനങ്ങളുടെ വിൽപ്പന 50 ശതമാനത്തോളം വർധിച്ചതായി മാരുതിയുടെ വാർഷിക റിപ്പോർട്ടിലും ചൂണ്ടിക്കാണിച്ചിരുന്നു.