അതുല്യം ഈ നേട്ടം, 100 ദശലക്ഷം ബൈക്കുകൾ നിരത്തിലെത്തിച്ച്​ ഹീറോ

ലോകത്തെ ഏറ്റവും വലിയ ഇരുചക്ര വാഹന നിർമാതാക്കളായ ഹീറോ മോട്ടോകോർപ്പ് സവിശേഷമായൊരു നേട്ടം കൈവരിച്ചു. ലോകത്താകമാനം 100 ദശലക്ഷം (10 കോടി) ഇരുചക്രവാഹനങ്ങളെ നിരത്തിലെത്തിക്കുകയെന്ന നാഴികക്കല്ലാണ്​ കമ്പനി പിന്നിട്ടത്​. ഉത്തരാഖണ്ഡിലെ ഹരിദ്വാർ പ്ലാന്‍റിൽ നിന്നാണ്​ 10 കോടി തികക്കുന്ന ബൈക്ക്​ പുറത്തിറക്കിയത്​. ഹീറോ എക്‌സ്ട്രീം 160 ആർ ആണ്​ സുവർണബൈക്കായി മാറിയത്​. ബോളിവുഡ്​ നടൻ ഷാരൂഖ്​ ഖാനും ബൈക്ക്​ പുറത്തിറക്കൽ ചടങ്ങിൽ എത്തിയിരുന്നു.

1984 ലാണ്​ ഹീറോ കമ്പനി ഇന്ത്യയിൽ പ്രവർത്തനം ആരംഭിച്ചത്​. അന്ന്​ ഹീറോയും ഹോണ്ടയും ചേർന്ന്​ ഒറ്റ കമ്പനിയായിരുന്നു. 2013ൽ 50 ദശലക്ഷം ബൈക്കുകൾ വിപണിയിൽ എത്തിച്ചു. 2017 ആയപ്പോഴേക്കും കമ്പനി 75 ദശലക്ഷം ഇരുചക്രവാഹനങ്ങൾ നിർമ്മിച്ചിരുന്നു. അടുത്ത മൂന്ന് വർഷത്തിനുള്ളിൽ കമ്പനി 100 മില്ല്യൺ മാർക്കിലെത്തി. 2013ലെ 50 ദശലക്ഷത്തിൽ നിന്ന് 2021 ന്‍റെ തുടക്കത്തിൽ 100 ​​ദശലക്ഷമായി കമ്പനിയുടെ നിർമാണ കണക്ക്​ കുതിക്കുകയായിരുന്നു. ഈ നാഴികക്കല്ലിലെത്തിയ അതിവേഗ വാഹന നിർമാതാക്കളിൽ ഒരാളാണ് ഹീറോ.

'ലോകമെമ്പാടുമുള്ള ദശലക്ഷക്കണക്കിന് ആളുകളുടെ അഭിലാഷങ്ങൾക്ക് ചലനാത്മകത നൽകുന്നതിൽ ഹീറോ മോട്ടോകോർപ്പ് മുൻപന്തിയിലാണ്. ഹീറോയോടുള്ള സ്നേഹവും വിശ്വാസവും തുടരുന്ന ഉപഭോക്താക്കളുടെ ആഘോഷമാണിത്. ലോകത്തിനായി ഞങ്ങൾ ഇന്ത്യയിൽ നിർമ്മിക്കുന്നു എന്ന ആപ്​തവാക്യത്തിനുള്ള അംഗീകാരമാണിത്​' -ഹീറോ മോട്ടോകോർപ്പ് ചെയർമാനും സിഇഒയുമായ ഡോ. പവൻ മുഞ്ജാൽ പറഞ്ഞു.

ഇക്കാലയളവിൽ തുടർച്ചയായി 20 വർഷമാണ്​ ലോകത്തിലെ ഏറ്റവും വലിയ ഇരുചക്രവാഹന നിർമാതാക്കളായി ഹീറോ മോട്ടോകോർപ്പ് നിലനിന്നത്​. അടുത്ത അഞ്ച് വർഷക്കാലയളവിൽ പത്തിലധികം ഉൽപ്പന്നങ്ങൾ അവതരിപ്പിക്കുമെന്ന് ഹീറോ പറഞ്ഞു. ഇന്ത്യക്ക് പുറത്തുള്ള വിപണികളും കമ്പനി ലക്ഷ്യമിടുന്നുണ്ട്​. 100 ദശലക്ഷം ഉൽ‌പാദന അവസരം ആഘോഷിക്കാൻ കമ്പനി ആറ് സെലിബ്രേഷൻ പതിപ്പുകൾ പുറത്തിറക്കിയിട്ടുണ്ട്​. സ്പ്ലെൻഡർ +, എക്‌സ്ട്രീം 160 ആർ, പാഷൻ പ്രോ, ഗ്ലാമർ 125, ഡെസ്റ്റിനി 125, മാസ്ട്രോ എഡ്ജ് 110 എന്നിവ ഇതിൽ ഉൾപ്പെടുന്നു. ഈ മോഡലുകൾ 2021 ഫെബ്രുവരി മുതൽ വിൽപ്പനയ്‌ക്കെത്തും.