മഹീന്ദ്രയും ഫോർഡും പിരിയുന്നു​; ഇന്ത്യൻ വാഹനപ്രേമികൾക്ക്​ നിരാശ

മഹീന്ദ്രയുമായുള്ള കൂട്ടുകച്ചവടത്തിൽ നിന്നും പിൻമാറുകയാണെന്ന്​ പ്രഖ്യാപിച്ചിരിക്കുകയാണ്​ അമേരിക്കൻ വാഹന നിർമാതാക്കളായ ഫോർഡ്​. മഹീന്ദ്ര-ഫോർഡ്​ കൂട്ടുകെട്ടിൽ പുതിയ വർഷത്തിൽ കൂടുതൽ വാഹനങ്ങളെത്തുമെന്ന്​ പ്രതീക്ഷിച്ചിരുന്ന ഇന്ത്യയിലെ വാഹനപ്രേമികളെ നിരാശരാക്കുന്നതാണ്​ പുതിയ തീരുമാനം. മഹീന്ദ്രയും പ്രത്യേക വാർത്താകുറിപ്പിലൂടെ പങ്കാളിത്തം അവസാനിപ്പിക്കുന്നതായി അറിയിച്ചു.

ഇരു കമ്പനികളും തമ്മിലുളള കരാറി​െൻറ കാലാവധി ഡിസംബര്‍ 31ന് അവസാനിച്ചിരുന്നു. എന്നാൽ ഫോർഡും പിന്നാലെ മഹീന്ദ്രയും​ കരാർ പുതുക്കുന്നില്ലെന്ന തീരുമാനമെടുക്കുകയായിരുന്നു. കോവിഡ്​ മഹാമാരി സൃഷ്​ടിച്ച പ്രതിസന്ധിയും തുടര്‍ന്ന്​ നേരിട്ട ആഗോള സാമ്പത്തിക, വ്യാപാര സാഹചര്യങ്ങളിലെ അടിസ്ഥാനപരമായ മാറ്റങ്ങളുമാണ് പങ്കാളിത്തമൊഴിയാൻ തങ്ങളെ പ്രേരിപ്പിച്ചതെന്ന് ഫോര്‍ഡ് വ്യക്തമാക്കി. അതേസമയം, ഇന്ത്യന്‍ വിപണിയില്‍ സ്വതന്ത്രമായി നില്‍ക്കാനാണ്​ തീരുമാനമെന്നും കമ്പനി കൂട്ടിച്ചേർത്തു.

2019 ഒക്ടോബര്‍ ഒന്നിനായിരുന്നു മഹീന്ദ്ര-ഫോർഡും ഔദ്യോഗികമായി പങ്കാളിത്തത്തിൽ ഒപ്പിട്ടത്. പുതിയ കമ്പനിയില്‍ മഹീന്ദ്രയ്ക്ക് 51 ശതമാനവും ഫോർഡിന് 49 ശതമാനവും ഓഹരിയും എന്നായിരുന്നു ധാരണ. 2019 ല്‍ ഒപ്പിട്ട ഉടമ്പടി പ്രകാരം ഫോർഡ് ഇന്ത്യയുടെ പ്രവര്‍ത്തനങ്ങളുടെ നിയന്ത്രണവും മഹീന്ദ്ര ഏറ്റെടുത്തിരുന്നു. ഈ പങ്കാളിത്തത്തിന് കീഴില്‍ ഏകദേശം 2,000 കോടി രൂപയുടെ നിക്ഷേപം, എസ്.യു.വി - എം.പി.വി സെഗ്മെൻറ്​ ഉള്‍പ്പെടെ പുതിയ കാറുകളുടെ വികസനം, സാങ്കേതികവിദ്യകള്‍ പങ്കുവയ്ക്കല്‍ തുടങ്ങിയ ധാരണകളായിരുന്നു ഉണ്ടായിരുന്നത്​.