ഡീസല്‍‌ ഓട്ടോകളുടെ കാലപരിധി 22 വര്‍ഷമാക്കി

തിരുവനന്തപുരം: ഡീസല്‍ ഓട്ടോകള്‍ ഹരിത ഇന്ധനങ്ങളിലേക്ക്​ മാറാനുള്ള കാലപരിധി 22 വര്‍ഷമായി നീട്ടി. നിലവില്‍ 15 വര്‍ഷം പൂര്‍ത്തിയായ ഓട്ടോ ഹരിത ഇന്ധനങ്ങളിലേക്ക്​ മാറേണ്ടതുണ്ട്. ഡീസല്‍‌ ഓട്ടോ ഹരിത ഇന്ധനത്തിലേക്ക്​ മാറ്റുന്നതിനുള്ള പശ്ചാത്തല സൗകര്യം സമ്പൂര്‍ണമാകാന്‍ താമസം നേരിടുന്നത് കണക്കിലെടുത്താണ്​ ഗതാഗത വകുപ്പ്​ തീരുമാനം.

കോവിഡ് മഹാമാരി കാലത്ത് രണ്ടു വര്‍ഷം ഓട്ടോകള്‍ നിരത്തിലിറക്കാന്‍ കഴിയാതിരുന്ന സാഹചര്യം പരിഗണിച്ചും ഇതര ഡീസല്‍ വാഹനങ്ങള്‍ക്ക് ഇത്തരം നിയന്ത്രണമില്ല എന്നതിനാലുമാണ് വര്‍ഷം തോറും ഫിറ്റ്നസ് സര്‍ട്ടിഫിക്കറ്റ് നേടുന്ന ഡീസല്‍ ഓട്ടോകളുടെ കാലാവധി 15ൽനിന്ന്​ 22 വര്‍ഷമായി ഉയര്‍ത്തുന്നത്.

ഉപജീവനത്തിനായി ഓട്ടോ ഓടിക്കുന്ന 50,000ത്തിലധികം ആളുകള്‍ക്ക് ഇതിന്റെ പ്രയോജനം ലഭിക്കുമെന്ന് ഗതാഗതമന്ത്രി ആൻറണി രാജു പറഞ്ഞു.