അദ്​​ഭുത സുരക്ഷയുമായി ലോകത്തെ ആദ്യ റഡാർ ബൈക്ക്​;​ ഡുകാട്ടി മൾട്ടിസ്​ട്രാഡ നവംബറിലെത്തും

അടുത്തിടെയാണ്​ ടൂറിങ്​ വിഭാഗത്തിൽ​പെട്ട മൾട്ടിസ്ട്രാഡ വി 4 മോട്ടോർസൈക്കിളി​െൻറ ഉത്പാദനം ആരംഭിച്ചതായി ഡുകാട്ടി പ്രഖ്യാപിച്ചത്​. നവംബർ നാലിനാണ്​ വാഹനം ഒൗദ്യോഗികമായി ലോകത്തിന് മുന്നിൽ അവതരിപ്പിക്കുന്നത്​. മൾട്ടിസ്ട്രാഡയിൽ തങ്ങൾ നവീനമായൊരു സാ​േങ്കതികവിദ്യ ഇണക്കിച്ചേർത്തിട്ടുണ്ടെന്നാണ്​ ഡുകാട്ടി ഇപ്പോൾ വെളിപ്പെടുത്തിയിരിക്കുന്നത്​. ലോകത്തിൽ ആദ്യമായി മുന്നിലും പിന്നിലും റഡാർ സാങ്കേതികവിദ്യയുമായിട്ടായിരിക്കും മൾട്ടിസ്​ട്രാഡ​ നിരത്തിലെത്തുക.

ബോഷുമായി സഹകരിച്ചാണ്​ റഡാർ സാ​േങ്കതികവിദ്യ ഡുകാട്ടി വികസിപ്പിച്ചെടുത്തത്​. ദേശീയപാതകളിലെ ദീർഘദൂര യാത്രകളിൽ പുതിയ സാങ്കേതികവിദ്യ ഉപയോഗപ്രദമാകുമെന്ന്​​ ഡുകാട്ടി പറയുന്നു. 2016 മുതൽ റഡാർ അധിഷ്ഠിത സംവിധാനങ്ങളിൽ ശ്രദ്ധ പുലർത്തുന്നുണ്ടെന്നും ബോഷിനൊപ്പം മൾട്ടിസ്ട്രാഡയ്ക്കായി ഇത് വികസിപ്പിക്കാൻ നാല് വർഷമെടുത്തുവെന്നും കമ്പനി അധികൃതർ അറിയിച്ചു. വാഹനത്തി​െൻറ മുൻവശത്ത് സ്ഥാപിച്ചിരിക്കുന്ന റഡാർ, അഡാപ്റ്റീവ് ക്രൂയിസ് കൺട്രോൾ പ്രവർത്തനത്തെ നിയന്ത്രിക്കുകയാണ്​ ചെയ്യുന്നത്​. നിയന്ത്രിത ബ്രേക്കിങിലൂടെയും ആക്​സിലറേഷനിലൂടെയും റൈഡർക്ക്​ ബൈക്കിൽ കൂടുതൽ നിയന്ത്രണം നൽകുകയാണ്​ റഡാറുകൾ ചെയ്യുക.

30 മുതൽ 160 കിലോമീറ്റർ വേഗതക്കിടയിൽ റഡാർ പ്രവർത്തിക്കും. ബൈക്കി​െൻറ ബ്ലൈൻഡ്​ സ്​പോട്ടുകൾ കണ്ടെത്താനും പിന്നിൽ നിന്ന്​ ഉയർന്ന വേഗതയിൽ വരുന്ന വാഹനങ്ങൾ കണ്ടെത്തി മുന്നറിയിപ്പ്​ നൽകാനും പിന്നിലെ റഡാർ സഹായിക്കും. റഡാർ സാങ്കേതികവിദ്യ യാത്രികർക്ക്​ സമാനതകളില്ലാത്ത സുരക്ഷ പ്രദാനം ചെയ്യുമെന്നും അപകടങ്ങൾ തടയാൻ കഴിയുമെന്നും ഡുകാട്ടി പറയുന്നു. ടൂറിംഗ് ആവശ്യങ്ങൾക്കായി പ്രത്യേകം രൂപകൽപ്പന ചെയ്​ത ലൈറ്റ് ആൻറ്​ കോംപാക്റ്റ് വി 4 എഞ്ചിനാണ് ബൈക്കിനുള്ളത്​. ഒക്ടോബർ 15ന്​ എഞ്ചിൻ വിവരങ്ങൾ കമ്പനി ഒൗദ്യോഗികമായി വെളിപ്പെടുത്തും.