ഫ്രഞ്ച്​ കമ്പനിയായ സിട്രോൺ ഇന്ത്യയിലേക്ക്​; എയര്‍ക്രോസ് എസ്​​.യു.വി നിർമാണം ആരംഭിച്ചു;

ഫ്രഞ്ച്​ വാഹന നിർമാതാവായ സിട്രോണിന്‍റെ രാജ്യത്തെ ആദ്യ മോഡലിന്‍റെ നിർമാണം ആരംഭിച്ചു. തമിഴ്നാട്ടിലെ തിരുവള്ളൂരിലെ പ്ലാന്‍റിലാണ്​ ആദ്യ എസ്.യു.വി ആയ സിട്രോണ്‍ സി5 എയര്‍ക്രോസ് നിര്‍മിക്കുന്നത്​. കമ്പനിയുടെ ഫ്ലാഗ്ഷിപ്പ് എസ്.യു.വി ഇന്ത്യന്‍ ഉപഭോക്താക്കള്‍ക്കുള്ള ആദ്യ സിട്രോണ്‍ ബ്രാന്‍ഡ് വാഹനമാണ്. ഈ ത്രൈമാസം തന്നെ വാഹനം വിപണിയിൽ എത്തുമെന്നാണ്​ കമ്പനിവൃത്തങ്ങൾ പറയുന്നത്​.

ഇന്ത്യയിൽ വിവിധ ഭൂപ്രദേശങ്ങളില്‍ 2.5 ലക്ഷം കിലോമീറ്റര്‍ പരീക്ഷണങ്ങള്‍ നടത്തിയ ശേഷമാണ് സിട്രോണ്‍ സി 5 എസ് യുവി ഇന്ത്യയില്‍ നിര്‍മാണം ആരംഭിച്ചത്. തങ്ങളുടെ ബ്രാന്‍ഡ് ഇന്ത്യയ്ക്കു വേണ്ടി പുറത്തിറക്കുന്ന വ്യത്യസ്തമായ നിരവധി വാഹനങ്ങളില്‍ ആദ്യത്തേതായിരിക്കും സി5 എയര്‍ക്രോസ് എന്ന് സ്​റ്റെല്ലാന്‍റിസ് എക്സിക്യൂട്ടീവ് വൈസ് പ്രസിഡന്‍റും പിസിഎ ഓട്ടോമോബൈല്‍ ഇന്ത്യ ചെയര്‍മാനുമായ ഇമ്മാനുവല്‍ ഡെലെ പറഞ്ഞു.

സിട്രോൺ എന്ന വമ്പൻ

100 വർഷത്തെ പാരമ്പര്യമുള്ള ഫ്രഞ്ച്​ വാഹന നിർമാതാവാണ്​ സിട്രോൺ. 1919ലാണ്​ കമ്പനി ആരംഭിക്കുന്നത്​. യൂറോപ്പിന്‍റെ പ്രിയ വാഹനനിർമാതാക്കളിൽ ഒരാളാണിവർ. 'അംബാസഡർ' നിർമാതാക്കളായിരുന്ന ഹിന്ദുസ്ഥാൻ മോട്ടോഴ്സിന്‍റെ ഉടമസ്ഥരായ സി.കെ ബിർല ഗ്രൂപ്പുമായി കൈകോർത്താണ്​ സിട്രോൺ ഇന്ത്യയിൽ പ്രവർത്തനം ആരംഭിക്കുന്നത്​. ആദ്യ സിട്രോൺ ഷോറൂം ഡൽഹിയിലെ നരൈയ്ന ഇൻഡസ്ട്രിയൽ എസ്റ്റേറ്റ് മേഖലയിലാണ്​ പ്രവർത്തനം ആരംഭിക്കുക.

180 എച്ച്പി ഉത്പാദിപ്പിക്കുന്ന 2.0 ലിറ്റർ ടർബോ-ഡീസൽ എഞ്ചിനാവും പുതിയ എസ്​.യു.വിയിൽ വരിക. 8 സ്പീഡ് ടോർക്​ കൺവെർട്ടർ ഓട്ടോമാറ്റിക് ഗിയർബോക്‌സാണ്​ വാഹനത്തിന്​. ഇന്ധനക്ഷമത പരമാവധി വർധിപ്പിക്കുന്നതിന് വാഹനം നിത്തിയിടു​േമ്പാൾ എഞ്ചിൻ ഓഫാവുകയും പിന്നീട്​ താനേ ഓണാവുകയും ചെയ്യുന്ന സംവിധാനവും വാഹനത്തിൽവരും. പ്രോഗ്രസ്സീവ് ഹൈഡ്രോളിക് കുഷ്യൻ സജ്ജീകരിച്ച സസ്പെൻഷൻ സിസ്റ്റം മികച്ചതാണ്​.

തിരഞ്ഞെടുത്ത മോഡിനെ ആശ്രയിച്ച് ചക്രങ്ങളിലേക്ക് ഡ്രൈവ് ഫലപ്രദമായി മാറ്റുന്ന ഗ്രിപ്പ് കൺട്രോൾ സിസ്റ്റം എന്ന് വിളിക്കുന്ന സാ​ങ്കേതികതയും സിട്രോണിലുണ്ട്​. സുരക്ഷാ കിറ്റിൽ ഓഫർ സ്പോട്ട് മോനിറ്ററിങ്​ സിസ്റ്റവും പാർക്കിംഗ് അസിസ്റ്റും ഉൾപ്പെടും. പനോരമിക് സൺറൂഫ്, ഹാൻഡ്സ് ഫ്രീ ബൂട്ട് ഓപ്പണിങ്​, 12.3 ഇഞ്ച് ഡിജിറ്റൽ ഇൻസ്ട്രുമെന്‍റ്​ ക്ലസ്റ്റർ, 8.0 ഇഞ്ച് ടച്ച്സ്ക്രീൻ ഇൻഫോടെയ്ൻമെന്‍റ്​ സിസ്റ്റം എന്നിവയുമായാണ് സി 5 എയർക്രോസിന്‍റെ ടോപ്പ്-സ്പെക്ക് പതിപ്പുകൾ പുറത്തിറങ്ങുക. വാഹനത്തിന്​ പ്രതീക്ഷിക്കപ്പെടുന്ന വില 30 ലക്ഷമാണ്​.