ഇന്ത്യക്കാരുടെ സ്വന്തം പറക്കും കാർ, 'വിനാറ്റ'തയ്യാർ; ഒക്​റ്റോബറിൽ വെളിച്ചംകാണും

ഏഷ്യയിലെ ആദ്യത്തെ പറക്കും കാർ നിർമിച്ച്​ ചെന്നൈ ആസ്​ഥാനമായുള്ള കമ്പനി. 'വിനാറ്റ'എയറോമൊബിലിറ്റിയാണ്​ ഹൈബ്രിഡ് ഇലക്ട്രിക് ഫ്ലൈയിങ്​ കാർ നിർമിച്ചത്​. നിർമാണം പൂർത്തിയായ പറക്കും കാറി​െൻറ ടീസറും കമ്പനി പുറത്തുവിട്ടിട്ടുണ്ട്​. രണ്ട് സീറ്റർ ഫ്ലൈയിങ്​ കാറിന് 1100 കിലോഗ്രാം ഭാരമുണ്ട്. 1300 കിലോഗ്രാം ടേക്ക് ഓഫ് ഭാരം കൈകാര്യം ചെയ്യാൻ കഴിയും. പാരച്യൂട്ടും നിരവധി എയർബാഗുകൾ പിടിപ്പിച്ച കോക്​പിറ്റും വാഹനത്തിന്​ ലഭിക്കും.

ഒക്ടോബർ അഞ്ചിന് ലണ്ടനിലെ എക്സൽ, ഹെലിടെക് എക്സിബിഷനിൽ വിനാറ്റ പുറത്തിറക്കും. ഏഷ്യയിലെ ആദ്യത്തെ ഹൈബ്രിഡ് ഫ്ലൈയിംഗ് കാറാണ്​ വിനാറ്റയെന്ന്​ കമ്പനി അധികൃതർ അവകാശപ്പെടുന്നു. ലോകമെമ്പാടുമുള്ള നിരവധി കമ്പനികൾ പറക്കുംകാറുകൾ നിർമിക്കാനുള്ള തയ്യാറെടുപ്പിലാണ്​. അതിൽ ചിലതൊക്കെ പരീക്ഷണ പറക്കലുകളും നടത്തിയിട്ടുണ്ട്​. ആർട്ടിഫിഷ്യൽ ഇൻറലിജൻസ് ഉള്ള ഡിജിറ്റൽ ഇൻസ്ട്രുമെൻറ്​ പാനലുകളാണ്​ വിനാറ്റയിലുള്ളത്​. ആഡംബരപൂർണമായ ഇൻറീരിയറും ആകർഷകമായ ബാഹ്യരൂപവുമാണ്​ വിനാറ്റക്കുള്ളത്​.

300 ഡിഗ്രി കാഴ്ച നൽകുന്ന പനോരമിക് വിൻഡോയാണ്​ കാറിലുള്ളത്​. ഹൈബ്രിഡ് ഫ്ലൈയിങ്​ കാറിന് 100 കിലോമീറ്റർ ദൂരം ഒറ്റ ചാർജിൽ സഞ്ചരിക്കാനാവും. 120 കിലോമീറ്റർ/മണിക്കൂർ വേഗതയാണുള്ളത്​. പരമാവധി ഫ്ലൈറ്റ് സമയം 60 മിനിറ്റാണ്​. 3,000 അടി ഉയരത്തിൽ പറക്കാനാവും. വിമാനത്തിൽ ഒന്നിലധികം പ്രൊപ്പല്ലറുകളും മോട്ടോറുകളും ഉണ്ട്​. ഒന്നോ അതിലധികമോ മോട്ടോറുകളോ പ്രൊപ്പല്ലറുകളോ പരാജയപ്പെടുകയാണെങ്കിൽ, മറ്റുള്ളവ ഉപയോഗിച്ച്​ സുരക്ഷിതമായി വിമാനം ഇറക്കാനാകും.