എൻട്രി ലെവൽ ഇ.വിയുമായി ബി.വൈ.ഡി; ടിയാഗോയ്ക്ക്​ വെല്ലുവിളി ഉയർത്താനെത്തുന്നത്​ ഡോൾഫിൻ

ചൈനീസ്​ ഇലക്​ട്രിക്​ കാർ നിർമാതാക്കളായ ബി.വൈ.ഡി അവരുടെ ആഗോള വാഹന നിരയിലേക്ക് എൻട്രി ലെവൽ ഇ.വി അവതരിപ്പിച്ചു. ഡോൾഫിൻ എന്ന്​ പേരിട്ടിരിക്കുന്ന വാഹനം ആദ്യം യൂറോപ്പിലാകും വിൽപ്പനക്ക്​ എത്തുക. 400 കിലോമീറ്ററിന്​ മുകളിൽ റേഞ്ചുള്ള വാഹനമാണ്​ ഡോൾഫിൻ. നിലവിൽ ഇന്ത്യയിൽ രണ്ട്​ മോഡലുകളാണ്​ ബി.വൈ.ഡി വിൽക്കുന്നത്​. പുതിയ മോഡൽ രാജ്യത്ത്​ എത്തിയാൽ അത്​ ടാറ്റ തിയാഗോ പോലുള്ള എൻട്രി ലെവൽ ഹാച്ചുകൾക്ക്​ കനത്ത വെല്ലുവിളിയാകും ഉയർത്തുക.

അറ്റോ 3, e6 ഇവി എന്നിങ്ങനെ രണ്ട് ഇലക്ട്രിക് കാറുകളാണ് ബി.വൈ.ഡി ഇന്ത്യയിൽ പുറത്തിറക്കിയിട്ടുള്ളത്. രാജ്യത്ത്​ തങ്ങളുടെ സാന്നിധ്യം വർധിപ്പിക്കാൻ കമ്പനിക്ക്​ പദ്ധതിയുണ്ടെന്നാണ്​ വിവരം. ആക്‌ടീവ്, ബൂസ്റ്റ്, കംഫർട്ട്, ഡിസൈൻ എന്നിങ്ങനെ നാല് വ്യത്യസ്‌ത വേരിയന്റുകളിലാണ് ഡോൾഫിൻ വിപണിയിൽ എത്തുന്നത്. ഈ മോഡലുകൾക്കെല്ലാം വ്യത്യസ്ത ബാറ്ററി പായ്ക്കുകളും വിലകളും ആണുള്ളത്​. കമ്പനിയുടെ സ്വന്തം ലിഥിയം-അയൺ ഫോസ്ഫേറ്റ് ബ്ലേഡ് ബാറ്ററി സാങ്കേതികവിദ്യയാണ് കാറിൽ ഉപയോഗിക്കുക. ഡോൾഫിൻ ആക്ടീവിന് 44.9 kWh ബാറ്ററിയും 95bhp ഇലക്ട്രിക് മോട്ടോറും ലഭിക്കും. ഈ പതിപ്പ് എസി പവർ ഉപയോഗിച്ച് 7 കിലോവാട്ട് വരെയും ഡിസി പവർ ഉപയോഗിച്ച് 60 കിലോവാട്ട് വരെ വേഗത്തലും ഇവി ചാർജ് ചെയ്യാം.

44.9 kWh ബാറ്ററിയും 176 bhp മോട്ടോറും ലഭിക്കുന്ന ഡോൾഫിൻ ബൂസ്റ്റാണ് അടുത്ത വേരിയന്റ്. ഇത് 17 ഇഞ്ച് വീലുകളും മൾട്ടി-ലിങ്ക് റിയർ സസ്പെൻഷനും ചേർക്കുന്നുവെന്നതാണ് പ്രത്യേകത. മൂന്നാമനാണ് 60.4 kWh ബാറ്ററി, 205 bhp മോട്ടോർ, 426 കിലോമീറ്റർ റേഞ്ച് എന്ന അവകാശവാദത്തോടെ ഡോൾഫിൻ കംഫർട്ട് പതിപ്പ് എത്തുന്നത്. ഇതിന്റെ പരമാവധി ചാർജിങ്​ പവർ 88kW ആണ്. വെറും 29 മിനിറ്റിനുള്ളിൽ 30 മുതൽ 80 ശതമാനം വരെ ചാർജ് ചെയ്യാനാവുമെന്ന് സാരം.

ഡിസൈൻ ആണ്​ ടോപ്പ് എൻഡ് വേരിയന്റ്​. ഇത് കംഫർട്ട് മോഡലിന്റെ അതേ സാങ്കേതിക സവിശേഷതകളോടെയാണ് വരുന്നത്. എന്നാൽ പനോരമിക് റൂഫ്, ടു-ടോൺ പെയിന്റ്, ട്രൈ-കളർ അലോയ് വീലുകൾ, വയർലെസ് ചാർജിങ്​ എന്നീ അധിക ഫീച്ചറുകൾ ഈ മോഡലിൽ ഉണ്ടാകും. 60.4 kWh ബ്ലേഡ് ബാറ്ററിയും സ്ഥിരമായ മാഗ്നറ്റ് സിൻക്രണസ് മോട്ടോറുമുള്ള ഡോൾഫിൻ വെറും 7 സെക്കൻഡിൽ 0 മുതൽ 100 കി.മീ വേഗത കൈവരിക്കും.സ്‌പോർട്ട്, നോർമൽ, ഇക്കണോമി, സ്‌നോ എന്നിങ്ങനെ നാല് ഡ്രൈവിങ്​ മോഡുകളും പുതിയ ഇലക്ട്രിക് ഹാച്ച്ബാക്ക് വാഗ്ദാനം ചെയ്യുന്നുണ്ട്​.

ഇന്റീരിയറിൽ 12.8 ഇഞ്ച് ഫ്ലോട്ടിംഗ് സെൻട്രൽ കൺട്രോൾ സ്‌ക്രീൻ, ഫ്ലാറ്റ്-ബോട്ടം മൾട്ടി-ഫംഗ്ഷൻ സ്റ്റിയറിംഗ് വീൽ, 5 ഇഞ്ച് ഫുൾ എൽസിഡി ഇൻസ്ട്രുമെന്റ് ക്ലസ്റ്റർ, ഇലക്ട്രോണിക്കലി ക്രമീകരിക്കാവുന്ന പാസഞ്ചർ സീറ്റുകൾ, കപ്പ് ഹോൾഡറുകൾ, റിയർ സെന്റർ ആംറെസ്റ്റ് എന്നിവയാണ് ഒരുക്കിയിരിക്കുന്നത്.