ഇനിമുതൽ ബി.​െഎ.എസ്​ ഹെൽമറ്റുകൾ മാത്രം; ഉത്തരവുമായി കേന്ദ്ര മന്ത്രാലയം

രാജ്യത്ത്​ ഇനിമുതൽ ബി.​െഎ.എസ്​ നിലവാരമുള്ള ​െഹൽമറ്റുകൾ മാത്രം നിർമിക്കുകയും വിൽക്കുകയും ചെയ്​താൽ മതിയെന്ന്​ സർക്കാർ. റോഡ് ഗതാഗത, ദേശീയപാത മന്ത്രാലയമാണ്​ ഇതുസംബന്ധിച്ച ഉത്തരവ്​ പുറപ്പെടുവിച്ചത്​. ​സുപ്രീം കോടതിയുടെ നിർദേശപ്രകാരം റോഡ് സുരക്ഷ സംബന്ധിച്ച കമ്മിറ്റി 2018 മാർച്ചിൽ രാജ്യത്ത് ഭാരം കുറഞ്ഞ ഹെൽമെറ്റുകൾ ശുപാർശ ചെയ്​തിരുന്നു. വെള്ളിയാഴ്​ചയാണ്​ രാജ്യത്തെ ഇരുചക്ര വാഹനയാത്രികർ​ ബ്യൂറോ ഒാഫ്​ ഇന്ത്യൻ സ്​റ്റാ​േൻറർഡ്​ അനുസരിച്ചുള്ള ഹെൽമറ്റുകൾ മാത്രം ഉപയോഗിക്കണമെന്ന ഉത്തരവ്​ കേന്ദ്ര മന്ത്രാലയം പുറപ്പെടുവിച്ചത്​. ഇനിമുതൽ ഇത്തരം ഹെൽമറ്റുകൾ മാത്രമേ​ രാജ്യത്ത്​ നിർമിക്കാൻ പാടുള്ളൂ എന്നും ഉത്തരവിൽ പറയുന്നു.

'ക്വാളിറ്റി കൺട്രോൾ ഓർഡർ പ്രകാരം ഇരുചക്ര വാഹന യാത്രികർക്കുള്ള സംരക്ഷണ ഹെൽമെറ്റുകൾക്ക്​ ഇനിമുതൽ ബി.​െഎ.എസ്​ സർട്ടിഫിക്കറ്റ്​ നിർബന്ധമാണ്​'-ഉത്തരവ്​ പറയുന്നു. രാജ്യത്ത് നിലവാരം കുറഞ്ഞ ഹെൽമറ്റ് വിൽക്കുന്നത് ഒഴിവാക്കാൻ ഇത് സഹായിക്കുമെന്നും അപകടങ്ങളിൽപ്പെടുന്നവരെ മാരകമായ പരിക്കുകളിൽ നിന്ന് സംരക്ഷിക്കുമെന്നും മന്ത്രാലയം പ്രസ്​താവനയിൽ പറഞ്ഞു. റോഡ് സുരക്ഷ സംബന്ധിച്ച സുപ്രീം കോടതി സമിതി, രാജയത്ത്​ ഭാരം കുറഞ്ഞതും കാലാവസ്ഥാ സാഹചര്യങ്ങൾക്ക് അനുയോജ്യമായതുമായ ഹെൽമറ്റുകൾ നിർമിക്കുന്നത്​ ഉറപ്പാക്കണമെന്ന്​ നിർദേശിച്ചിരുന്നു. എയിംസിൽ നിന്നുള്ള ഡോക്​ടർമാർ ഉൾപ്പെടെ വിവിധ മേഖലകളിൽ നിന്നുള്ള വിദഗ്​ധർ സമിതിയിൽ ഉൾപ്പെട്ടിരുന്നു.

വിശദമായ വിശകലനത്തിനുശേഷം, രാജ്യത്ത് ഭാരം കുറഞ്ഞ ഹെൽമറ്റുകൾ കമ്മിറ്റി ശുപാർശ ചെയ്​തിരുന്നു. സമിതിയുടെ ശുപാർശകൾ അനുസരിച്ച് ബിസ് മാനദണ്ഡങ്ങൾ പരിഷ്​കരിച്ചിരുന്നു. ഇന്ത്യയിൽ പ്രതിവർഷം നിർമിക്കുന്ന ഇരുചക്ര വാഹനങ്ങളുടെ എണ്ണം ഏകദേശം 1.7 കോടിയാണ്​. ലോകമെമ്പാടുമുള്ള രാജ്യങ്ങളിൽ മെച്ചപ്പെട്ടതും സുരക്ഷിതവുമായ റോഡുകൾക്കായി പ്രവർത്തിക്കുന്ന ജനീവ ആസ്ഥാനമായുള്ള ആഗോള റോഡ് സുരക്ഷാ സ്ഥാപനമായ ഇൻറർനാഷണൽ റോഡ് ഫെഡറേഷൻ ഇന്ത്യയിൽ ബി.ഐ.എസ് ഹെൽമറ്റ് കൊണ്ടുവരാനുള്ള നീക്കത്തെ സ്വാഗതം ചെയ്​തിട്ടുണ്ട്​.