വിലകുറഞ്ഞ മോഡൽ ഉൾപ്പടെ മൂന്ന് പുതിയ ഇലക്ട്രിക് സ്കൂട്ടറുകൾ പുറത്തിറക്കി ഏഥർ

വിലകുറഞ്ഞ മോഡൽ ഉൾപ്പടെ മൂന്ന് പുതിയ ഇലക്ട്രിക് സ്കൂട്ടറുകൾ പുറത്തിറക്കി ഏഥർ എനർജി. 450 സീരീസിലെ പുതിയ മൂന്ന് വേരിയന്റുകളാണ് വിപണിയിൽ എത്തിയത്​. 450 എസ്​ എന്ന വിലക്കുറവുള്ള ഇവിക്ക് പുറമെ 450 എക്സ്​ പതിപ്പിന്റെ രണ്ട്​ വകഭേദങ്ങളും ഏഥർ അവതരിപ്പിച്ചിട്ടുണ്ട്​.

450 എസിന്‍റെ വില 1,29,999 രൂപയാണ്​. 450 എക്സിന്‍റെ 2.9 kWh പതിപ്പിന് 1,38,000 രൂപയും 3.7 kWh പതിപ്പിന് 1,44,921 രൂപയുമാണ്​ വിലവരുന്നത്​. 450എസും 450 എക്സും അവയുടെ രൂപകൽപ്പനയിൽ ഒരുപോലെയാണ്. 2.9 kWh ബാറ്ററിയാണ് 450 എസ്​ സ്‌കൂട്ടറിന് കരുത്തുപകരുന്നത്. ഒറ്റ ചാർജിൽ 115 കിലോമീറ്റർ റേഞ്ച് വാഗ്ദാനം ചെയ്യുന്നു. 3.9 സെക്കൻഡിൽ 0-40 കിലോമീറ്റർ വേഗത കൈവരിക്കും. 90 കിലോമീറ്റർ ആണ് പരമാവധി വേഗത. 5.4 kW പീക്ക് പവറിൽ പരമാവധി 22 Nm ടോർക്​​ വരെ വികസിപ്പിക്കാനും ഈ എൻട്രി ലെവൽ മോഡലിനാവും.

ഡീപ്‌വ്യൂ ടി.എം ഡിസ്‌പ്ലേ, പുതിയ സ്വിച്ച് ഗിയർ, എമർജൻസി സ്റ്റോപ്പ് സിഗ്നൽ (ESS), 7 ശതമാനം വരെ റേഞ്ച് മെച്ചപ്പെടുത്തുന്ന കോസ്റ്റിങ്​ റീജൻ എന്നീ സവിശേഷതകൾ 450 എസിന്​ ലഭിക്കും. ഏഥർ ഗ്രിഡ് ഫാസ്റ്റ് ചാർജർ ഉപയോഗിച്ചാൽ 450 എസിന്​ 1.5 കി.മീ./മിനിറ്റ് വേഗതയിൽ ചാർജ് ചെയ്യാൻ കഴിയും.

ഏഥർ 450 എക്സ്​ കോർ, പ്രോ എന്നീ രണ്ട് ഓപ്ഷനുകളിൽ ലഭ്യമാണ്. വാഹനത്തിന്‍റെ വില യഥാക്രമം 1.38, 1.53 ലക്ഷം രൂപയാണ്​. വില നിർണയത്തിൽ ഫെയിം II ആനുകൂല്യങ്ങളും ചാർജറിന്റെ വിലയും ഉൾപ്പെടുന്നുവെന്നതും ശ്രദ്ധേയമാണ്. ഏഥറിന്റെ ഔദ്യോഗിക വെബ്സൈറ്റിൽ 450S, 450X എന്നിവയ്ക്കുള്ള ബുക്കിങ്​ ആരംഭിച്ചു കഴിഞ്ഞു.

ഏഥർ 450എക്സ്​ ഇപ്പോൾ 2.9 kWh, 3.7 kWh ബാറ്ററി ഓപ്ഷനുകളിൽ ലഭ്യമാണ്. ഇത് യഥാക്രമം 115 കിലോമീറ്ററും 150 കിലോമീറ്ററും റേഞ്ചാണ് വാഗ്‌ദാനം ചെയ്യുന്നത്. 3.3 സെക്കൻഡിൽ 0-40 കിലോമീറ്റർ വേഗത കൈവരിക്കാൻ 450 എക്സ് ഇലക്ട്രിക് സ്‌കൂട്ടറിനാവും. മണിക്കൂറിൽ 90 കിലോമീറ്റർ ടോപ്പ് സ്പീഡാണ് ബ്രാൻഡ് അവകാശപ്പെടന്നത്. 450എക്സിന് സ്മാർട്ട്ഇക്കോ, ഇക്കോ, റൈഡ്, സ്പോർട്ട്, വാർട്ട് എന്നീ അഞ്ച് റൈഡിങ്​ മോഡുകൾ ലഭിക്കും.

ഗൈഡ്-മീ-ഹോം ലൈറ്റുകൾ, കോസ്റ്റിംഗ് റീജൻ, നാവിഗേഷൻ, ഇന്റർ-സിറ്റി പാർക്കിങ്​ എന്നീ ഫീച്ചറുകളും വാഹനത്തിലുണ്ട്​. മൂന്ന് മോഡലുകളും ടെലിസ്‌കോപ്പിക് ഫ്രണ്ട് ഫോർക്ക്​, മോണോഷോക്ക്​ സസ്​പെൻഷനിലുമാണ് വിപണിയിലെത്തുന്നത്. കംബൈൻഡ്, റീജനറേറ്റീവ് സെറ്റപ്പുള്ള ബ്രേക്കിംഗിനായി മുന്നിലും പിന്നിലും ഡിസ്‌ക് ബ്രേക്കുകളാണ് ഏഥർ 450 എസ്​ സീരീസിൽ ഇപ്പോൾ ഒരുക്കിയിട്ടുള്ളത്.