ബഡ്ജറ്റ്​ ഫ്രണ്ട്​ലി ഇ.വി സ്കൂട്ടറുമായി ഏഥർ; വില 1.30 ലക്ഷം മുതൽ

അടുത്തിടെയാണ്​ ഇലക്​ട്രിക്​ സ്കൂട്ടർ നിർമാതാക്കളായ ഒല തങ്ങളുടെ ഏറ്റവും വിലകുറഞ്ഞ മോഡലായ എയർ ഇ.വി പുറത്തിറക്കിയത്​. അതിന്​ പിന്നാലെ വൈദ്യുത വാഹന വിപണിയിലെ മറ്റൊരു പ്രധാന കമ്പനിയായ ഏഥറും തങ്ങളുടെ വിലകുറഞ്ഞ സ്കൂട്ടർ അവതരിപ്പിക്കാനൊരുങ്ങുകയാണ്​. 450 എസ്​ എന്ന്​ പേരിട്ടിരിക്കുന്ന മോഡലിന്‍റെ പുത്തൻ ടീസർ കമ്പനി പുറത്തുവിട്ടു. സ്കൂട്ടറിന്‍റെ വില പ്രഖ്യാപനവും ഏഥർ നടത്തിയിട്ടുണ്ട്​. 1.30 ലക്ഷം രൂപ മുതലാണ്​ പുതിയ ഇ.വിയുടെ വില.മോഡലിന്റെ പ്രീ-ബുക്കിങ്​ രാജ്യത്ത് ആരംഭിച്ചു കഴിഞ്ഞു. ഉപഭോക്താക്കള്‍ക്ക് 2500 രൂപ ടോക്കണ്‍ തുക നല്‍കി ഇലക്ട്രിക് സ്‌കൂട്ടര്‍ ബുക്ക് ചെയ്യാം.

ഏഥറിന്‍റെ വിലകൂടിയ മോഡലുമായി താരതമ്യപ്പെടുത്തുമ്പോൾ പുതിയ വാഹനത്തിന്‍റെ റേഞ്ച്​ കുറവാണ്​. 115 കിലോമീറ്ററാണ്​ പുതിയ സ്കൂട്ടറിന്‍റെ റേഞ്ച്​. 450 എക്സ്​ എന്ന കൂടിയ മോഡലിന്​ 146 കിലോമീറ്റർ റേഞ്ചാണുള്ളത്​. എന്നാൽ ഉയർന്ന വേഗത രണ്ടിനും ഒരുപോലെയാണ്​, മണിക്കൂറിൽ 90 കിലോമീറ്റർ. ഓഗസ്റ്റ് 11ന് സ്‌കൂട്ടര്‍ പുറത്തിറക്കുമെന്നാണ് പ്രതീക്ഷിക്കുന്നത്.

മോഡലിന്റെ ലോഞ്ചിന് മുന്നോടിയായാണ്​ ടീസര്‍ ചിത്രം സോഷ്യല്‍ മീഡിയയില്‍ പങ്കുവെച്ചത്​. ടീസര്‍ ചിത്രത്തില്‍ ഏറ്റവും പുതിയ ഏഥര്‍ 450 എസിന്റെ പിന്‍ഭാഗമാണ് കാണിക്കുന്നത്. സ്‌കൂട്ടറിന് പുതിയ ഇന്‍സ്ട്രുമെന്റ് ക്ലസ്റ്റര്‍ ലഭിച്ചേക്കുമെന്ന്​ സൂചനയുണ്ട്​. ടച്ച് ഇന്റര്‍ഫേസ്, നാവിഗേഷന്‍ എന്നിവയുള്‍പ്പെടെ നിരവധി ഫീച്ചറുകള്‍ ഇല്ലാതെയാകും ഏഥര്‍ 450 എസ്​ എത്തുക. കേന്ദ്ര സര്‍ക്കാര്‍ ഫെയിം 2 സബ്‌സിഡി വെട്ടിക്കുറച്ചതോടെ പ്രീമിയം ഇവികള്‍ക്ക് വില വർധിച്ചിരുന്നു. ഇതോടെയാണ്​ കമ്പനികൾ വിലകുറഞ്ഞ മോഡലുകൾ അവതരിപ്പിക്കാൻ തുടങ്ങിയത്​.

ഏഥർ ഇലക്​ട്രികിന്‍റെ വിജയകരമായ 450 പ്ലാറ്റ്ഫോമിനെ അടിസ്ഥാനമാക്കിയാണ് പുത്തന്‍ സ്‌കൂട്ടറും പണികഴിപ്പിച്ചിരിക്കുന്നത്. ചെറിയ 3kWh ബാറ്ററി പായ്ക്ക് ആണ് ഇതില്‍ സജ്ജീകരിച്ചിരിക്കുന്നത്. 8.58 bhp പവറും 26 Nm ടോര്‍ക്കും സൃഷ്ടിക്കാന്‍ ശേഷിയുള്ള മോട്ടോറാണ്​ നൽകുന്നത്​. ഡിസൈനിൽ കാര്യമായ മാറ്റങ്ങൾ ഉണ്ടാകില്ല. ഒല S1 എയറുമായാണ് വാഹനം വിപണിയില്‍ മത്സരിക്കുന്നത്. 1,09,999 രൂപയാണ് ഓല S1 എയറിന്റെ പ്രാരംഭ വില. ഇത് വൈകാതെ 1.19 ലക്ഷം രൂപയായി ഉയരുകയും ചെയ്യും.