ഒന്നേകാൽ ലക്ഷം ബുക്കിങുമായി ക്രെറ്റ കുതിക്കുന്നു; 26 ശതമാനം വിപണി വിഹിതം

ഒന്നേകാൽ ലക്ഷം ബുക്കിങുമായി 2020 മോഡൽ ഹ്യുണ്ടായ്​ ക്രെറ്റ കുതിക്കുന്നു. പുതിയ തലമുറ ക്രെറ്റ വിപണിയിലെത്തിയതിനുശേഷം 1,15,000 യൂനിറ്റ് ബുക്കിങ്​ എന്ന നാഴികക്കല്ല് പിന്നിട്ടതായി ഹ്യൂണ്ടായ് മോട്ടോർ ഇന്ത്യയാണ്​ അറിയിച്ചത്​. ഈ വർഷം മാർച്ചിലാണ്​ വാഹനം വിൽപ്പനയ്‌ക്കെത്തിയത്​. എസ്‌യുവി വിഭാഗത്തിലെ ഹ്യൂണ്ടായിയുടെ വിപണി വിഹിതം 2020 ജനുവരി-സെപ്​റ്റംബർ കാലയളവിൽ 26 ശതമാനമായിട്ടുണ്ട്​.

മൊത്തത്തിലുള്ള ബുക്കിങ്​ പരിശോധിച്ചാൽ ഡീസൽ വേരിയൻറാണ്​ കൂടുതൽ വിറ്റഴിഞ്ഞതെന്ന്​ കാണാം. 60:40 ആണ്​ ഡീസൽ-പെട്രോൾ വിൽപ്പന അനുപാതം. ഹ്യൂണ്ടായുടെ ഡിജിറ്റൽ സെയിൽസ് പ്ലാറ്റ്‌ഫോമായ 'ക്ലിക്ക് ടു ബൈ' വഴി ഏറ്റവും കൂടുതൽ വിറ്റഴിഞ്ഞ വവാഹനവും ക്രെറ്റയാണ്​. 'ബ്ലൂ ലിങ്ക്' കണക്​ടിവിറ്റി അവതരിപ്പിച്ചശേഷം അത്തരം വേരിയൻറുകൾക്ക്​ ശ്രദ്ധേയമായ പ്രതികരണമാണ് ലഭിച്ചതെന്നും കമ്പനി അധികൃതർ പറയുന്നു. ബ്ലൂ ലിങ്ക് കണക്റ്റഡ്​ എസ്‌യുവികൾക്ക്​ 25,000 ബുക്കിങുകൾ രജിസ്റ്റർ ചെയ്തിട്ടുണ്ട്.

ഹ്യൂണ്ടായിയുടെ പുതിയ 1.4 ലിറ്റർ കാപ്പ ടർബോ ജിഡി പെട്രോൾ എഞ്ചിനാണ്​ ജനപ്രീതിയിൽ ഒന്നാമത്​. 7 ഡിസിടി (ഡ്യുവൽ ക്ലച്ച് ട്രാൻസ്മിഷൻ) ആണ്​ ഇൗ വാഹനത്തിന്​. 3 വർഷം / പരിധിയില്ലാത്ത കിലോമീറ്റർ അല്ലെങ്കിൽ 4 വർഷം / 60,000 കിലോമീറ്റർ അല്ലെങ്കിൽ 5 വർഷം / 50,000 കിലോമീറ്റർ എന്നിവ ഉൾപ്പെടുന്ന 'വണ്ടർ വാറൻറി ഓപ്ഷനുകളാണ്​' എസ്‌യുവി വാഗ്ദാനം ചെയ്യുന്നത്. 2015 ലാണ്​ ഹ്യൂണ്ടായ് ക്രെറ്റയെ ഇന്ത്യയിൽ അവതരിപ്പിച്ചത്​. അതിനുശേഷം എസ്‌യുവി സെഗ്‌മെൻറിൽ ത​​േൻറതായ ഇടം കണ്ടെത്താൻ വാഹനത്തിനായി. 2015 ൽ വിപണിയിലെത്തിയശേഷം 5,20,000 ക്രെറ്റകൾ വിറ്റഴിക്കാനായത്​ വലിയ വിജയമായാണ്​ കമ്പനി കണക്കാക്കുന്നത്​.