ഒമിക്രോൺ ഇതുവരെ സ്​ഥിരീകരിച്ചത്​ 38 രാജ്യങ്ങളിൽ -ലോകാരോഗ്യ സംഘടന

ജനീവ: കൊറോണ വൈറസിന്‍റെ ഏറ്റവ​​ും പുതിയ വകഭേദമായ ഒമിക്രോൺ 38 രാജ്യങ്ങളിൽ റിപ്പോർട്ട്​ ചെയ്​തതായി ലോകാരോഗ്യ സംഘടന. ഇതുവരെ മരണം റിപ്പോർട്ട്​ ചെയ്​തി​ട്ടില്ലെന്നും സംഘടന അറിയിച്ചു. ലോകരാജ്യങ്ങൾ പുതിയ വകഭേദമായ ഒമിക്രോണിനെ തടയാൻ യാത്രനിയന്ത്രണങ്ങൾ അടക്കമുള്ള പ്രതിരോധ മാർഗങ്ങൾ സ്വീകരിക്കുന്നതിനിടെയാണ്​ ലോകാരോഗ്യ സംഘടനയുടെ പ്രതികരണം.

യു.എസിലും ആസ്​ട്രേലിയയുമാണ്​ പ്രദേശിക വ്യാപനം ഏറ്റവും അവസാനം റിപ്പോർട്ട്​ ചെയ്​തത്​. ഒമിക്രോൺ വ്യാപനം സംഭവിച്ചതോടെ ദക്ഷിണാഫ്രിക്കയിൽ കോവിഡ്​ ബാധിതരുടെ എണ്ണം 30 ലക്ഷമായി ഉയർന്നു.

പുതിയ വകഭേദത്തിന്‍റെ വ്യാപന സാധ്യത, ഗുരുതരമാകൽ, വാക്​സിൻ -ചികിത്സ ഫലപ്രാപ്​തി എന്നിവ നിർണയിക്കാൻ മൂന്നാഴ്ചയോളം സമയമെടുക്കുമെന്നും ലോകാരോഗ്യ സംഘടന അറിയിച്ചു.

ഒമിക്രോൺ ബാധിച്ച്​ ഇതുവരെ മരണം റിപ്പോർട്ട്​ ചെയ്​തിട്ടില്ലെന്നും എന്നാൽ യൂറോപ്പിന്‍റെ പകുതിയിലധികം കേസുകൾക്ക്​ പുതിയ വകഭേദം കാരണമാകു​െമന്നും ലോകാരോഗ്യ സംഘടന കഴിഞ്ഞദിവസം മുന്നറിയിപ്പ്​ നൽകിയിരുന്നു. കൂടാതെ ഡെൽറ്റ വ​കഭേദത്തെപോലെ ആഗോള സമ്പദ്​വ്യവസ്​ഥയുടെ വീണ്ടെടുക്കലിനെ മന്ദഗതിയിലാക്കാൻ ഒമിക്രോണിന്​ കഴിയുമെന്ന്​ അന്താരാഷ്ട്ര നാണ്യ നിധി മേധാവി ക്രിസ്റ്റാലിന ജോർജീവ പറഞ്ഞിരുന്നു.