കോവാക്​സിന്​ അംഗീകാരം കിട്ടുമോ? ലോകാരോഗ്യ സംഘടനയുടെ അടുത്ത യോഗം 26ന്​

ജനീവ: ഹൈദരാബാദ് ആസ്ഥാനമായുള്ള ഭാരത് ബയോടെക്കിന്‍റെ കോവിഡ് വാക്സിനായ കോവാക്സിന്​ അടിയന്തിര ഉപയോഗ അനുമതി നൽകുന്നത്​ പരിഗണിക്കാൻ ലോകാരോഗ്യ സംഘടനയുടെ സാങ്കേതിക ഉപദേശക സംഘം ഒക്ടോബർ 26ന് യോഗം ചേരുമെന്ന് ഡബ്ല്യു.എച്ച്​.ഒ ചീഫ് സയന്‍റിസ്റ്റ് ഡോ. സൗമ്യ സ്വാമിനാഥൻ അറിയിച്ചു. നടപടിക്രമങ്ങൾ പൂർത്തിയാക്കാൻ ലോകാരോഗ്യ സംഘടന ഭാരത് ബയോടെക്കിനോട് ചേർന്ന് പ്രവർത്തിക്കുന്നുണ്ടെന്നും അവർ പറഞ്ഞു.

'ഒക്ടോബർ 26ന് സാങ്കേതിക ഉപദേശക സംഘം യോഗം ചേരും. നടപടിക്രമങ്ങൾ പൂർത്തീകരിക്കാൻ ഭാരത്​ ബയോടെക്കുമായി ചേർന്ന്​ ലോകാരോഗ്യ സംഘടന പ്രവർത്തിക്കുന്നുണ്ട്​. അടിയന്തിര ഉപയോഗത്തിനായുള്ള അംഗീകൃത വാക്സിനുകളുടെ എണ്ണം വർധിപ്പിച്ച്​ എല്ലാവരിലേക്കും എത്തിക്കുകയാണ്​ ലക്ഷ്യം' -ഡോ. സ്വാമിനാഥൻ ട്വീറ്റ് ചെയ്തു.

ഭാരത്​ ബയോടെക്ക്​ ലോകാരോഗ്യ സംഘടനക്ക്​ വാക്​സിനുമായി ബന്ധപ്പെട്ട വിവരങ്ങൾ മാസങ്ങൾക്ക്​ മുമ്പ്​ തന്നെ സമർപ്പിച്ചിരുന്നു. എന്നാൽ, കൂടുതൽ വിവരങ്ങൾ ആവശ്യപ്പെട്ടതോടെ സെപ്റ്റംബർ 27ന് വീണ്ടും സമർപ്പിച്ചു.

ലോകാരോഗ്യ സംഘടനയുടെ വിദഗ്ധർ ഈ വിവരങ്ങൾ അവലോകനം ചെയ്യുകയാണ്. ഡബ്ല്യു.എച്ച്​.ഒ ഉയർത്തിയ ചോദ്യങ്ങൾക്ക്​ ഇവർ കൃത്യമായ മറുപടി നൽകുകയാണെങ്കിൽ ഒരാഴ്ചക്കുള്ളിൽ അനുമതി നൽകുമെന്ന്​ ലോകാരോഗ്യ സംഘടന ഒക്​ടോബർ ആദ്യം അറിയിച്ചിരുന്നു. അതാണിപ്പോൾ ഒക്​ടോബർ 26ലേക്ക്​ നീട്ടിയത്​.

ഇന്ത്യൻ കൗൺസിൽ ഓഫ് മെഡിക്കൽ റിസർച്ച് (ഐ.സി.എം.ആർ), നാഷനൽ ഇൻസ്റ്റിറ്റ്യൂട്ട് ഓഫ് വൈറോളജി (എൻ.ഐ.വി) എന്നിവയുമായി സഹകരിച്ചാണ്​ ഭാരത് ബയോടെക്ക്​ കോവാക്​സിൻ വികസിപ്പിച്ചത്​.