'ഒമിക്രോൺ എല്ലാവരെയും പിടികൂടും; യു.എസ്​ കോവിഡിനോട്​ പൊരുത്തപ്പെട്ട്​ മുന്നോട്ട്​ പോകും' - ഡോ. ഫൗചി

വാഷിങ്​ടൺ: കൊറോണ വൈറസിനെ നിയന്ത്രിക്കാവുന്ന രോഗമായി കണ്ട്, അതിനോട്​ പൊരുത്തപ്പെട്ട്​ മുന്നോട്ട്​ നീങ്ങാനുള്ള പരിവർത്തനത്തി​െൻറ ഘട്ടത്തിലേക്ക്​ അമേരിക്ക അടുക്കുകയാണെന്ന്​ ഡോ. ആൻറണി ഫൗചി അഭിപ്രായപ്പെട്ടു. രാജ്യത്ത്​ കേസുകൾ കുതിച്ചുയരുകയും കോവിഡ്​ ബാധിച്ച്​ ആശുപത്രിയിൽ പ്രവേശിച്ച ആളുകളുടെ എണ്ണം റെക്കോർഡ്​ ഉയരത്തിൽ എത്തുകയും ചെയ്​ത സാഹചര്യത്തിലാണ്​ ഫൗചിയുടെ പ്രതികരണം.

സെന്റർ ഫോർ സ്ട്രാറ്റജിക് ആൻഡ് ഇന്റർനാഷണൽ സ്റ്റഡീസിനോട് (CSIS) സംസാരിക്കവേയാണ്​ അമേരിക്കൻ പ്രസിഡൻറിൻെറ മെഡിക്കൽ ഉപദേഷ്​ടാവും കോവിഡ്​ പ്രതിരോധ വിദഗ്​ധനുമായ ഫൗചി ഇക്കാര്യം പറഞ്ഞത്​. 'കോവിഡിനെ ഇല്ലാതാക്കുന്നത്​ ഇനി സംഭവ്യമല്ല, ഒമിക്രോൺ അതിന്റെ അസാധാരണവും അഭൂതപൂർവ്വവുമായ വ്യാപനപരത കൊണ്ട്​ ആത്യന്തികമായി എല്ലാവരേയും പിടികൂടുക തന്നെ ചെയ്യും'.

'ഞങ്ങൾ ഈ വൈറസിനെ ഉന്മൂലനം ചെയ്യാൻ പോകുന്നില്ല. പ്രത്യേകിച്ച്​, അതിന്റെ പടർന്നുപിടിക്കുന്ന സ്വഭാവവും, പുതിയ വകഭേദങ്ങളിലേക്ക്​ പരിവർത്തനം ചെയ്യപ്പെടാനുള്ള പ്രവണതയും വാക്സിനേഷൻ എടുക്കാത്ത ആളുകളുടെ വലിയ കൂട്ടവും ഉള്ളിടത്തോളം കാലം. - ഫൗചി പറഞ്ഞു. 'വാക്​സിനുകൾ കൃത്യമായി എടുത്തവർ ഗുരുതരമായ പ്രത്യാഘാതങ്ങളിൽ നിന്ന് നന്നായി സംരക്ഷിക്കപ്പെടുന്നു, എന്നാൽ അണുബാധയ്ക്കെതിരായ വാക്സിൻ ഫലപ്രാപ്തി കുറഞ്ഞിരിക്കുകയാണ്​'. -അദ്ദേഹം മുന്നറിയിപ്പ്​ നൽകി.

'എന്നാൽ ഒമിക്രോൺ കേസുകൾ മുകളിലേക്കും താഴേക്കും പോയിക്കൊണ്ടിരിക്കുന്ന സാഹചര്യത്തിൽ, സമൂഹത്തിൽ മതിയായ സംരക്ഷണമുള്ളതും, ആവശ്യത്തിന് മരുന്നുകൾ ലഭ്യമായതും, ആരെങ്കിലും രോഗബാധിതരാകുകയും ഉയർന്ന അപകടസാധ്യതയുള്ള ഘട്ടത്തിലെത്തുകയും ചെയ്​താൽ, അവരെ ചികിത്സിക്കാൻ എളുപ്പവുമായ ഒരു പുതിയ ഘട്ടത്തിലേക്ക് രാജ്യം (അമേരിക്ക) പ്രവേശിക്കുമെന്ന് പ്രതീക്ഷിക്കുന്നു' - ഫൗചി പറഞ്ഞു. നാം അതിലേക്കെയെത്തിയാൽ അവിടെയാണ് ആ​ പരിവർത്തനമുള്ളത്​. ഒരു പക്ഷെ അതി​െൻറ വാതിൽപ്പടിയിലാണ്​ നാമുള്ളതെന്ന്​ പറയാമെന്നും അദ്ദേഹം വ്യക്​തമാക്കി.

അതേസമയം, അമേരിക്കയിൽ പ്രതിദിനം ഒരു ദശലക്ഷത്തോളം ആളുകൾക്ക്​ കോവിഡ്​ ബാധ സ്ഥിരീകരിക്കുന്നുണ്ട്​. 1.5 ലക്ഷത്തോളം ആളുകൾ ആശുപത്രിയിലാണ്​. 1,200 ലധികം പേർ രോഗ ബാധയെ തുടർന്ന്​ മരിക്കുന്നുമുണ്ട്​.