Begin typing your search above and press return to search.
exit_to_app
exit_to_app
Homechevron_rightHealth & Fitnesschevron_rightHealth Newschevron_rightഡോസിന് 600 രൂപ;...

ഡോസിന് 600 രൂപ; കോവിഷീൽഡിന്​ ഇന്ത്യയിൽ ലോകത്തെ ഏറ്റവും ഉയർന്ന വില​

text_fields
bookmark_border
ഡോസിന് 600 രൂപ; കോവിഷീൽഡിന്​ ഇന്ത്യയിൽ ലോകത്തെ ഏറ്റവും ഉയർന്ന വില​
cancel

ന്യൂഡൽഹി: കോവിഷീൽഡ് വാക്സിനു വേണ്ടി ഇന്ത്യയിലെ സ്വകാര്യ ആശുപത്രികൾ നൽകേണ്ടത് ലോകത്തെ ഏറ്റവും ഉയർന്ന വില. ഓക്‌സ്‌ഫഡ് സർവകലാശാലയും അസ്ട്രാസെനക്കയും ചേർന്ന്​ വികസിപ്പിച്ച വാക്‌സിന് സെറം ഇന്‍സ്റ്റിറ്റ്യൂട്ട് നിശ്ചയിച്ച വില 600 രൂപയാണ്. വാക്സിന്​ ലോകത്തെ ഏറ്റവും ഉയർന്ന വിലയാണിതെന്ന് 'ഇന്ത്യൻ എക്സ്പ്രസ്' റിപ്പോർട്ട് ചെയ്യുന്നു.

മെയ് 1 മുതലാണ് സെറം ഇന്‍സ്റ്റിറ്റ്യൂട്ട് 600 രൂപ നിരക്കിൽ സ്വകാര്യ ആശുപത്രികൾക്ക്​ ഒരു ഡോസ് വാക്സിൻ നൽകുന്നത്. സംസ്ഥാനങ്ങൾക്ക് 400 രൂപ നിരക്കിലും നൽകും. എന്നാൽ യു.എസ്, ബ്രിട്ടൻ, യൂറോപ്യന്‍ യൂനിയൻ എന്നിവ അസ്ട്രസെനെക്കയില്‍നിന്ന് നേരിട്ട് വാക്സിൻ വാങ്ങുന്ന വിലയേക്കാള്‍ ഈ 400 രൂപ നിരക്കും കൂടുതലാണെന്നാണ് റിപ്പോര്‍ട്ട്. ഒരു ഡോസ് വാക്‌സിനായി 160 മുതൽ 270 രൂപ മാത്രമാണ് യൂറോപ്യന്‍ യൂണിയന്‍ നൽകുന്നത്.

400 രൂപ നിരക്കിൽ ഓരോ പൗരനും വാക്​സിൻ നൽകാനാവില്ലെന്ന്​ സംസ്​ഥാനങ്ങൾ തീരുമാനിച്ചാൽ വാക്​സിനെടുക്കുന്നവർ തന്നെ വഹിക്കേണ്ടിവരും. എന്നുവെച്ചാൽ, ഇന്ത്യയിൽ ഉൽപാദിപ്പിക്കുന്ന വാക്​സിൻ​ ലോകത്തെ മറ്റു രാഷ്​ട്രങ്ങൾ നൽകുന്നതിനെക്കാൾ കൂടിയ നിരക്കിൽ ഇന്ത്യക്കാർ വാങ്ങണമെന്നു സാരം.

മിക്ക ലോക രാജ്യങ്ങളും വാക്​സിൻ സൗജന്യമായാണ്​ നൽകുന്നത്​. നിലവിൽ ഇന്ത്യയിലും സൗജന്യമാണ്​. ആസ്​ട്ര സെനക്കയും ഓക്​സ്​ഫഡും ചേർന്ന്​ വികസിപ്പിച്ച വാക്​സിൻ പ്രത്യേക ലൈസൻസ്​ പ്രകാരമാണ്​ ഇന്ത്യയിൽ നിർമിക്കുന്നത്​. നിർമാണത്തിന്​ അഡ്വാൻസ്​ തുകയായി കേന്ദ്രം 3,000 കോടി നൽകിയിരുന്നു. ഇതിന്​ പ്രത്യുപകാരമായാണ്​ 150 രൂപ നിരക്കിൽ സെറം ഇൻസ്റ്റിറ്റ്യൂട്ട്​ കേന്ദ്രത്തിന്​ വാക്​സിൻ നൽകുക. 3000 കോടി പൂർത്തിയായാൽ പിന്നീടുള്ള ഡോസുകൾക്ക്​ ഇതേ നിരക്കാകില്ല ഈടാക്കുകയെന്നും സൂചനയുണ്ട്​.

യൂറോപ്യൻ യൂനിയൻ ആസ്​ട്ര സെനകക്ക്​ 39.9 കോടി ഡോളർ നൽകിയിരുന്നു. 40 കോടി ഡോസ്​ വാക്​സിൻ നൽകണമെന്നാണ്​ കരാർ. ​നേരത്തെ പണം നൽകിയ ബ്രിട്ടന്​ മൂന്നു ഡോളർ (225 രൂപ) നിരക്കിലാണ്​ മരുന്നു നൽകുക.

അതേ സമയം, സർക്കാറുകൾക്കും സ്വകാര്യ ആശുപത്രികൾക്കും വിതരണത്തിന്‍റെ ഒന്നാം ഘട്ടം കഴിഞ്ഞാൽ വിപണിയിൽ ഡോസിന്​ 1,000 രൂപ നിരക്കിൽ വിൽക്കാനും തീരുമാനമെടുത്തതായി സെറം ഇൻസ്റ്റിറ്റ്യൂട്ട്​ സി.ഇ.ഒ അഡാർ പൂനവാലയെ ഉദ്ധരിച്ച്​ ഇന്ത്യൻ എക്​സ്​പ്രസ്​ റിപ്പോർട്ട്​ ചെയ്​തു.

Show Full Article
TAGS:Covid 19 Serum Institute Covid Vaccine 
Next Story