കോവിഡ്​-19: മാനസിക ​പ്രശ്​നമുള്ള വ്യക്തികളിൽ സങ്കീർണമാകാൻ സാധ്യതയെന്ന്​ പഠനം

വാഷിങ്​ടൺ: മാനസിക ​പ്രശ്​നമുള്ള വ്യക്തികളിൽ കോവിഡ്​-19 അണുബാധയെത്തുടർന്ന് മരിക്കാനോ ആശുപത്രിയിൽ പ്രവേശിപ്പിക്കാനോ ഉള്ള സാധ്യത ഇരട്ടിയാണെന്ന്​ പഠനം. യൂറോപ്യൻ കോളജ് ഓഫ് ന്യൂറോ സൈക്കോഫാർമക്കോളജിയുടെ ഇമ്മ്യൂണോ ന്യൂറോ സൈക്കിയാട്രി നെറ്റ്‌വർക്ക് ആരംഭിച്ച പഠനം പിയർ റിവ്യൂ ചെയ്ത ജേണലായ 'ലാൻസെറ്റ് സൈക്കിയാട്രി'യിലാണ്​ പ്രസിദ്ധീകരിച്ചത്​. 22 രാജ്യങ്ങളിൽ നിന്നുള്ള 33 പഠനങ്ങളിൽ നിന്നുള്ള വിവരങ്ങൾ ശേഖരിച്ച് 1,469,731 രോഗികൾക്കാണ്​ കോവിഡ് -19 ഉള്ളത്, ഇതിൽ 43,938 പേർക്ക് മാനസിക വൈകല്യങ്ങളുണ്ട്.

മാനസിക വൈകല്യങ്ങളുള്ള വ്യക്തികളിലും ആന്‍റിസൈക്കോട്ടിക്സ് അല്ലെങ്കിൽ ആൻ‌സിയോലിറ്റിക്സ് (ഉത്​കണ്​ഠ കുറയ്ക്കുന്ന മരുന്നുകൾ) ഉപയോഗിച്ച് ചികിത്സിക്കുന്ന രോഗികളിലും കോവിഡ്​-19- അനുബന്ധ മരണനിരക്ക് കൂടുതലാണ്​.

കഠിനമായ മാനസികരോഗം, ബൗദ്ധിക വൈകല്യം, ലഹരിവസ്തുക്കളുടെ ഉപയോഗ തകരാറുകൾ എന്നിവയുള്ള രോഗികൾക്ക്​ ​പ്രതിരോധ കുത്തിവയ്പ്പ് നൽകുന്നതിൽ മുൻഗണന നൽകാൻ ദേശീയവും അന്തർ‌ദ്ദേശീയവുമായ ആരോഗ്യവിഭാഗത്തോട്​ യോജിച്ച നടപടി സ്വീകരിക്കണമെന്ന്​ പുതിയ പഠനം പറയുന്നു. പുതിയ പഠനത്തിന്‍റെ വെളിച്ചത്തിൽ മാനസിക പ്രശ്​നമുള്ളവർക്ക്​ വാക്​സിനേഷനിൽ കൂടുതൽ പരിഗണന നൽകണമെന്ന്​ ബെൽജിയത്തിലെ യൂണിവേഴ്സിറ്റി സൈക്കിയാട്രിക് ഹോസ്പിറ്റൽ കാമ്പസിലെ ഡോ. ലിവിയ ഡി പിക്കർ, ദേശീയ അന്തർദേശീയ സൈക്യാട്രിക് അസോസിയേഷനുകളിൽ നിന്നുള്ള നിരവധി സഹപ്രവർത്തകർക്കൊപ്പം​ ആവശ്യപ്പെട്ടു.