ഒമി​ക്രോൺ: കേരളത്തിൽനിന്ന് പരിശോധനക്കയച്ച എട്ട്​ സാമ്പിളുകൾ നെഗറ്റിവ്

തിരുവനന്തപുരം: സംസ്ഥാനത്ത് ഒമിക്രോണ്‍ ജനിതക പരിശോധനക്കയച്ച എട്ടുപേരുടെ സാമ്പിളുകൾ നെഗറ്റിവ്​. കോഴിക്കോട്- രണ്ട്​, മലപ്പുറം -രണ്ട്​, എറണാകുളം-രണ്ട്, തിരുവനന്തപുരം- ഒന്ന്​, പത്തനംതിട്ട -ഒന്ന്​ എന്നിങ്ങനെ സാമ്പിളുകളാണ്​ നെഗറ്റിവായത്. ആകെ 10 പേരുടെ സാമ്പിൾ അയച്ചതിൽ രണ്ടുപേരുടേത്​ വരാനുണ്ട്.

ഹൈറിസ്‌ക് രാജ്യങ്ങളില്‍നിന്ന്​ വരുന്നവരില്‍ ആർ.ടി.പി.സി.ആർ പോസിറ്റിവ് ആകുന്നവരുടെ സാമ്പിളുകളാണ് ഒമിക്രോണ്‍ ജനിതക പരിശോധനക്ക്​ അയക്കുന്നത്. രാജീവ് ഗാന്ധി സെൻറര്‍ ഫോര്‍ ബയോടെക്‌നോളജിയുടെ ലാബിലാണ് പരിശോധന. ഹൈറിസ്‌ക് രാജ്യത്തുനിന്ന്​ കഴിഞ്ഞ ദിവസം കോഴിക്കോട് വിമാനത്താവളത്തിൽ എത്തിച്ചേര്‍ന്ന ഒരാള്‍ക്കുകൂടി കോവിഡ് പോസിറ്റിവായ സാഹചര്യത്തിൽ ഇദ്ദേഹത്തി​െൻറ സാമ്പിളുകളും ഒമിക്രോണ്‍ ജനിതക പരിശോധനക്ക്​ അയച്ചിട്ടുണ്ട്.

ഒമി​േ​ക്രാൺ ഭീതിയുടെ പശ്ചാത്തലത്തിൽ വിമാനത്താവളങ്ങളിൽ കർശന നിരീക്ഷണമാണുള്ളത്​. വിദേശ രാജ്യങ്ങളില്‍നിന്ന്​ എത്തുന്നവരില്‍ കോവിഡ്​ പോസിറ്റിവാകുന്നവരെ ആശുപത്രികളിലെ പ്രത്യേക വാര്‍ഡിലേക്കും ഒമി​ക്രോൺ ബാധിത രാജ്യങ്ങളില്‍നിന്ന്​ വരുന്നവരില്‍ നെഗറ്റിവാകുന്നവരെ ഹോം ക്വാറൻറിനിലേക്കും​ മാറ്റുകയാണ്​. വിമാനത്താവളങ്ങളിൽ ആര്‍.ടി.പി.സി.ആര്‍ പരിശോധനക്കും ആരോഗ്യനില വിലയിരുത്തുന്നതിനും കിയോസ്‌കുകള്‍ സ്ഥാപിച്ചിട്ടുണ്ട്.