കോവിഡ്​ ഭേദമായവർക്ക്​ ഈ രോഗങ്ങളും ബാധിക്കുന്നതായി ഡോക്​ടർമാർ

മുംബൈ: മൂന്നാംതരംഗത്തിൽ കോവിഡ്​ ബാധിച്ച്​ ഭേദമായവരിൽ വിവിധ ചർമ, സന്ധി രോഗങ്ങൾ കണ്ടുവരുന്നതായി ഡോക്​ടർമാർ. കോവിഡ് ബാധ മൂലം പ്രതിരോധശേഷി കുറയുന്നതാണ്​ ദ്വിതീയ അണുബാധകൾക്ക് കാരണമാവുന്നത്​. ഹെർപസ് സോസ്റ്റർ, സന്ധിവേദന (ആർത്രാൽജിയ) എന്നിവയാണ്​ കൂടുതലായും കണ്ടുവരുന്നതെന്ന്​ മുംബൈ നഗരത്തിലെ ഡോക്​ടർമാരെ ഉദ്ധരിച്ച്​ മിഡ്​ ഡേ റിപ്പോർട്ട്​ ചെയ്യുന്നു. ചിക്കൻ പോക്​സ് ബാധിച്ച്​ ഭേദമായ ചിലരിൽ ശരീരത്തിന്‍റെ ചില ഭാഗങ്ങളിൽ കണ്ടുവരുന്ന വ്രണസമാനമായ രോഗമാണ്​ ഹെർപസ് സോസ്റ്റർ.

കോവിഡിന്‍റെ ഒന്നും രണ്ടും തരംഗങ്ങളിൽ മുതിർന്ന പൗരന്മാരെയാണ്​ ദ്വിതീയ അസുഖങ്ങൾ കൂടുതലായും ബാധിച്ചിരുന്നത്​. എന്നാൽ, ഇത്തവണ 40 വയസ്സിന് താഴെയുള്ളവരെയാണ് ഇവ ബാധിക്കുന്നതെന്ന്​ ഡോക്​ടർമാർ പറയുന്നു. പ്രതിരോധശേഷി കുറയുന്നതിനാൽ കോവിഡിന് ശേഷം വിവിധ അണുബാധകൾ റിപ്പോർട്ട്​ ​െചയ്യപ്പെടുന്നതായി എൽ.എച്ച് ഹിരനന്ദനി ആശുപത്രിയിലെ ഡോ. നീരജ് തുലാര പറഞ്ഞു.

ഹെർപ്പസ് സോസ്റ്റർ, മോളസ്കം കോണ്ടാഗിയോസം, അരിമ്പാറ തുടങ്ങിയ നിരവധി വൈറൽ ചർമ രോഗങ്ങൾ 2021 ഓഗസ്റ്റ്-സെപ്റ്റംബർ മാസങ്ങളിൽ രണ്ടാം തരംഗത്തിൽ ഗണ്യമായി ഉയർന്നതായി നാനാവതി മാക്സ് സൂപ്പർ സ്പെഷ്യാലിറ്റി ഹോസ്പിറ്റലിലെ ഡെർമറ്റോളജി സീനിയർ കൺസൾട്ടന്‍റ്​ ഡോ. വന്ദന പഞ്ചാബി പറഞ്ഞു. "ഇപ്പോൾ കേസുകൾ കുറഞ്ഞിട്ടുണ്ടെങ്കിലും റിപ്പോർട്ട്​ ചെയ്യപ്പെടുന്ന ചർമ രോഗങ്ങളിൽ 20 ശതമാനവും അവയാണ്. ഈ പ്രവണതയുടെ പ്രധാന കാരണം കോവിഡ് -19 മൂലം പ്രതിരോധശേഷി കുയുന്നതും ഈ വൈറസുകളെ നേരിടാനുള്ള ശരീരത്തിന്‍റെ കഴിവില്ലായ്മയുമാണ്" -അവർ പറഞ്ഞു.

40 വയസ്സിന്​ താഴെയുള്ളവരിൽ രോഗബാധ കൂടുന്നു

"മഹാമാരിയുടെ മുൻതരംഗങ്ങളിൽ മുതിർന്ന പൗരന്മാർ, ഗർഭിണികൾ, മറ്റുരോഗങ്ങൾ ബാധിച്ച്​ പ്രതിരോധശേഷി കുറഞ്ഞവർ എന്നീ വിഭാഗക്കാരിലായിരുന്നു വിവിധ അണുബാധകൾ സാധാരണ കണ്ടുവന്നിരുന്നത്​. രണ്ടാം തരംഗത്തിനുശേഷം 40 വയസും അതിൽ താഴെയുമുള്ള രോഗികൾക്കിടയിൽ അണുബാധകൾ വർധിച്ചു" -ഡോ. വന്ദന പഞ്ചാബി കൂട്ടിച്ചേർത്തു. ​കോവിഡ്​ ഭേദമാകു​ന്ന ഘട്ടത്തിൽ നിരവധി രോഗികളിൽ ത്വക്ക് സംബന്ധമായ സങ്കീർണതകൾ റിപ്പോർട്ട് ചെയ്തിട്ടുണ്ടെന്നും ഷിംഗിൾസ് എന്നറിയപ്പെടുന്ന ഹെർപ്പസ് സോസ്റ്റർ രോഗം കണ്ടുവരുന്നുണ്ടെന്നും വോക്ക്ഹാർഡ് ഹോസ്പിറ്റൽസിലെ കൺസൾട്ടന്റ് ഫിസിഷ്യൻ ഡോ.പ്രീതം മൂൺ പറഞ്ഞു. നേരത്തെ ചിക്കൻ പോക്​സ്​ വന്നവരിൽ കോവിഡ് -19 മൂലം പ്രതിരോധശേഷി കുറയു​ന്നതാണ്​ ഹെർപ്പസ് സോസ്റ്റർ ബാധിക്കാൻ ഇടയാക്കുന്നതെന്നും അദ്ദേഹം പറഞ്ഞു.

"ഹെർപ്പസ് സോസ്റ്റർ സാധാരണഗതിയിൽ ഞരമ്പുകളിൽ പ്രവർത്തനരഹിതമായി കാണപ്പെടാറുണ്ട്​. നല്ല പ്രതിരോധശേഷി ഉള്ളപ്പോൾ ഇത്​ ഒരു പ്രശ്‌നവും ഉണ്ടാക്കില്ല. എന്നാൽ, കോവിഡിന് ശേഷം പ്രതിരോധശേഷി ദുർബലമാകുമ്പോൾ ചുണ്ട്​, മൂക്ക്, കണ്ണിന് ചുറ്റുമുള്ള ഭാഗങ്ങൾ എന്നിവിടങ്ങളിൽ ഹെർപ്പസ് സോസ്റ്ററിന്‍റെ വകഭേദങ്ങളായ ഷിംഗിൾസ്, ഹെർപ്പസ് എന്നിവ പ്രത്യക്ഷപ്പെടുന്നു' -ഡോ. തുലാര പറഞ്ഞു. കോവിഡ്​ ഭേദമായിട്ടും ചിലരിൽ സന്ധിവേദന തുടരുന്നതും നേരത്തെ രോഗമുള്ളവർക്ക്​ വേദന കൂടുതൽ അനുഭവപ്പെടുന്നതും പ്രതിരോധശേഷി കുറയുന്നതിനാലാണെന്നും അദ്ദേഹം പറഞ്ഞു. പകർച്ചവ്യാധി മൂലമുള്ള സമ്മർദ്ദം കുറയ്ക്കുന്നതിന് ദിവസവും വ്യായാമം ശീലമാക്കണമെന്ന്​ അപ്പോളോ സ്പെക്ട്ര മുംബൈയിലെ ഓർത്തോപീഡിക് സർജൻ ഡോ. സഫിയുദ്ദീൻ നദ്​വി പറഞ്ഞു.