പുതിയ കോവിഡ്​ വകഭേദം മൂന്നാം തരംഗത്തിന്​ കാരണമായേക്കാം, ജാഗ്രതപാലിക്കണമെന്ന്​ വിദഗ്​ധർ

മുംബൈ: രാജ്യത്ത്​ പുതിയ കോവിഡ്​ വകഭേദം റിപ്പോർട്ട്​ ചെയ്​തതിന്‍റെ പശ്​ചാത്തലത്തിൽ കൂടുതൽ ജാഗ്രത വേണമെന്ന്​ വിദഗ്​ധരുടെ മുന്നറിയിപ്പ്​. എ.വൈ.4.2 എന്ന ​വകഭേദമാണ്​ രാജ്യത്ത്​ കണ്ടെത്തിയത്​. മുമ്പുണ്ടായിരുന്ന വകഭേദങ്ങളേക്കാൾ ഇതിന്​ വ്യാപനശേഷി കൂടുതലാണ്​. അതിനാൽ ഉത്സവകാലത്ത്​ കൂടുതൽ ജാഗ്രത വേണമെന്ന്​ വിദഗ്​ധർ നിർദേശിച്ചു. സാമൂഹിക അകലം പാലിക്കുന്നതും മാസ്​കുകൾ ഉപയോഗിക്കുന്നതും പതിവാക്കണം. ഇന്ത്യയിൽ ഇതുവരെ 25 പേരിൽ പുതിയ കോവിഡ്​ വകഭേദം കണ്ടെത്തിയിട്ടുണ്ട്​​ .

വൈറസിന്‍റെ ജെനിറ്റിക്​ കോഡിൽ മാറ്റം വന്നിട്ടുണ്ടെന്ന്​ ഗ്രാന്‍റ്​ മെഡിക്കൽ കോളജ്​ പ്രൊഫസർ ഡോ.വികാർ ഷെയ്​ഖ്​ പറഞ്ഞു. ജനിതകമാറ്റം മൂലമുണ്ടായ വൈറസ്​ കൂടുതൽ പേരിലേക്ക്​ ബാധിക്കാനും കൂടുതൽ മരണത്തിനും സാധ്യതയുണ്ട്​. പുതിയ വൈറസ്​ വകഭേദം ബാധിച്ച 25 കേസുകൾ റിപ്പോർട്ട്​ ചെയ്​തിട്ടുണ്ട്​. പല സംസ്ഥാനങ്ങളിലും ഇതുസംബന്ധിച്ച ആശങ്കയും ഉയർന്നിട്ടുണ്ട്​.

യു.കെയിലും പുതിയ കോവിഡ്​ വകഭേദം കണ്ടെത്തിയിട്ടുണ്ട്​. യൂനിവേഴ്​സിറ്റി ഓഫ്​ എഡിൻബർഗും യുനിവേഴ്​സിറ്റി ഓഫ്​ ഓക്​സ്​ഫെഡും സംയുക്​തമായി നടത്തിയ പഠനത്തിലാണ്​ എ.വൈ.4.2 വകഭേദം കണ്ടെത്തിയത്​. ഇന്ത്യയിൽ പോയി തിരിച്ചെത്തിയ ആളിലായിരുന്നു വൈറസ്​ വകഭേദം കണ്ടെത്തിയത്​. യു.കെയിൽ കഴിഞ്ഞ മാസം കണ്ടെത്തിയ ​ഭൂരിപക്ഷം കോവിഡ്​ കേസുകൾക്കും കാരണം എ.വൈ.4.2 വകഭേദമാണ്​.

ലോകത്ത്​ 33 രാജ്യങ്ങളിൽ ഇതുവരെ പുതിയ കോവിഡ്​ വകഭേദം കണ്ടെത്തിയിട്ടുണ്ട്​. ജർമ്മനി, അയർലാൻഡ്​, ഡെൻമാർക്ക്​, യു.എസ്​, ഇസ്രായേൽ, റഷ്യ, ചൈന, യു.കെ തുടങ്ങിയ രാജ്യങ്ങളിലെല്ലാം പുതിയ വകഭേദത്തിന്‍റെ സാന്നിധ്യമുണ്ട്​. പുതിയ വകഭേദം ഇന്ത്യയിൽ കോവിഡ്​ മൂന്നാം തരംഗത്തിന്​ കാരണമായേക്കാമെന്നും അദ്ദേഹം മുന്നറിയിപ്പ്​ നൽകി​.

​