Begin typing your search above and press return to search.
exit_to_app
exit_to_app
Homechevron_rightHealth & Fitnesschevron_rightHealth Articlechevron_rightഅവഗണിക്കരുത്​,...

അവഗണിക്കരുത്​, ശബ്​ദത്തിലെ മാറ്റം

text_fields
bookmark_border
അവഗണിക്കരുത്​, ശബ്​ദത്തിലെ മാറ്റം
cancel

ജീവിതകാലത്ത് നാമെല്ലാവരും അനുഭവിച്ചേക്കാവുന്ന ഒന്നാണ് ഒച്ചയടപ്പ്​ അഥവാ ശബ്​ദത്തിലെ കരകരപ്പ്​. ശ്വാസനാളത്തി​െൻറ മുകൾഭാഗത്തുണ്ടാകുന്ന അണുബാധയാണ്​ സാധാരണഗതിയിൽ ഇതിന്​ കാരണമാകുന്നത്​. അണുബാധ സ്വനതന്തുക്കളിലേക്ക്​ (Vocal Cords) ഇറങ്ങുകയും അത് സ്വനതന്തുക്കളിൽ വീക്കം ഉണ്ടാക്കുകയും ചെയ്യുന്നു. അക്യൂട്ട് ലാറിഞ്ചൈറ്റിസ് എന്നാണ്​ ഇത്​ അറിയപ്പെടു​ന്നത്​.

രോഗം ബാധിച്ച വ്യക്തി 'എ​െൻറ ശബ്‌ദം നഷ്‌ടപ്പെട്ടു, ശബ്‌ദം പരുഷമായി തോന്നുന്നു' എന്ന്​ പറയാറുണ്ട്​. ആവി പിടിക്കുന്നതുപോ​ലുള്ള നടപടികളിലൂടെ ഇത് സാധാരണയായി രണ്ടാഴ്​ചക്കുള്ളിൽ സുഖമാകുന്നതാണ്​. ചിലപ്പോൾ ആൻറിബയോട്ടിക് ചികിത്സ വേണ്ടി വരാം.

നമ്മൾ കോവിഡ് മഹാമാരിയുടെ മധ്യത്തിലാണ്. ശ്വാസകോശ അണുബാധ, തൊണ്ടവേദന എന്നീ ലക്ഷണങ്ങളോടെയാണ്​ കോവിഡ് സാധാരണയായി ആരംഭിക്കുന്നത്​. സ്വനതന്തുക്കളിൽ‌ വീക്കമുണ്ടായി‌ ശബ്​ദത്തിൽ‌ മാറ്റമുണ്ടാകുന്നതും കോവിഡി​െൻറ ലക്ഷണമാകാം. കോവിഡ്​ ബാധിക്കു​േമ്പാൾ ശബ്‌ദത്തിലെ മാറ്റം അപൂർവമാണെങ്കിലും, കോവിഡ് മുക്​തരായ ആളുകളിൽ ശബ്‌ദത്തിലെ കരകരപ്പ്​ കാണപ്പെടാറുണ്ട്​. കോവിഡ് ബാധിതനായ സമയത്ത്​ കഠിനമായി ചുമക്കുന്നതി​െൻറ ഫലമായി സ്വനതന്തുക്കളിൽ വീക്കമുണ്ടാകുന്നാണ്​ ഇതിന്​ കാരണം. കോവിഡ്​ മുക്​തി നേടിയശേഷം 2-3 ആഴ്​ചകൾ ഇത്​ തുടരും.

കൂടുതൽ ശബ്​ദം ഉപയോഗിക്കേണ്ട ചില തൊഴിൽ മേഖലകളുണ്ട്​. കോവിഡ്​ കാലത്ത്​ ശബ്​ദം കൂടുതൽ ഉപയോഗിക്കേണ്ടി വരുന്നവരാണ്​ അധ്യാപകർ. ഓൺലൈൻ ക്ലാസുകൾ നിയന്ത്രിക്കുമ്പോൾ അധ്യാപകർക്ക്​ ശബ്‌ദം കൂടുതലായി ഉപയോഗിക്കേണ്ടി വരുന്നു. തുടർച്ചയായ ശബ്‌ദ ദുരുപയോഗവും ശബ്​ദത്തിനുണ്ടാക്കുന്ന ആയാസവും സ്വനതന്തുക്കളിലുണ്ടാക്കുന്ന വീക്കത്തെ വോക്കൽ കോർഡ് നോഡ്യൂൾസ്​ എന്ന് വിളിക്കുന്നു.

പുകവലിക്കാരിൽ ശ്വാസകോശത്തിലെ മ്യൂക്കോസ എന്ന ഭാഗത്തുണ്ടാകുന്ന തകരാർ സ്വനതന്തുക്കളിൽ വീക്കത്തിന്​ കാരണമാകുന്നു. ശബ്‌ദത്തിലെ മാറ്റം മൂന്ന്​ ആഴ്​ചയിൽ കൂടുതൽ നീണ്ടുനിൽക്കുന്ന പുകവലിക്കാർ സ്വനതന്തുക്കളുടെ എൻ‌ഡോസ്കോപ്പിക് പരിശോധന നടത്തണം. സ്വനതന്തുക്കൾക്ക്​ തകരാറുണ്ടാക്കുന്ന ഏറ്റവും പ്രധാന ഘടകമാണ് പുകവലി.

ആസിഡ് റിഫ്ലക്​സ്​ ലക്ഷണങ്ങളുള്ളവരിലും ശബ്​ദത്തിൽ മാറ്റമുണ്ടാകാൻ സാധ്യതയുണ്ട്​. ആമാശയ ആസിഡ് നമ്മുടെ സ്വനതന്തുക്കളിലുണ്ടാക്കുന്ന നിരന്തരമായ സമ്മർദ്ദമാണ്​ ഇതിന്​ കാരണം.

ചില സന്ദർഭങ്ങളിൽ ശബ്​ദത്തിലെ മാറ്റം പക്ഷാഘാതം, പാർക്കിൻസൺസ്​, മൈസ്​തീനിയ ഗ്രാവിസ് തുടങ്ങിയ നാഡീസംബന്ധമായ തകരാറുകളുടെ ലക്ഷണങ്ങളായിരിക്കാം.

ചിലപ്പോൾ തൈറോയ്​ഡ്​ ശസ്ത്രക്രിയയിലെ സങ്കീർണത കാരണവും ശബ്​ദത്തിൽ മാറ്റമുണ്ടാകും. സ്വനതന്തുവിൽനിന്നുള്ള നാഡിയിൽ ഹാനി സംഭവിക്കുന്നതാണ്​ ഇതിന്​ കാരണമാകുന്നത്​.

ശബ്‌ദത്തിലെ മാറ്റത്തെക്കുറിച്ച് നിങ്ങൾ എപ്പോഴാണ് ആശങ്കപ്പെടേണ്ടത്?

1. മൂന്ന്​ ആഴ്​ചയിൽ കൂടുതൽ നീണ്ടുനിൽക്കുന്ന ഏത് ശബ്​ദ മാറ്റവും

2. പുകവലിക്കാരനാണെങ്കിൽ

3. മദ്യപാനിയാണെങ്കിൽ

4. നാഡീസംബന്ധമായ ലക്ഷണങ്ങളോടെയുള്ള ഏത് ശബ്​ദ മാറ്റവും

5. ഭക്ഷണം കഴിക്കാനുള്ള ബുദ്ധിമുട്ട്​ അനുഭവപ്പെടുന്ന ശബ്​ദമാറ്റം

6. ഭാരനഷ്​ടം

ഈ അവസ്ഥകളിൽ ഭൂരിഭാഗവും 10-15 മിനിറ്റ്​ എടുക്കുന്ന സ്വനതന്തുക്കളുടെ എൻഡോസ്കോപ്പിക് പരിശോധനയിലും ക്ലിനിക്കൽ പരിശോധനയിലും കണ്ടെത്താം.

നിങ്ങളുടെ ശബ്‌ദത്തിൽ സ്ഥിരമായ മാറ്റമുണ്ടെങ്കിൽ പരിശോധിക്കാൻ മടിക്കരുത്. അതുവഴി നേരത്തെ രോഗനിർണയം നടത്താനും ഉചിതമായ ചികിത്സ ആരംഭിക്കാനും കഴിയും.

ഡോ. വിവേക്​ അബ്രഹാം ചാലി

(ഇ.എൻ.ടി സ്​പെഷലിസ്​റ്റ്​, ആസ്​റ്റർ ക്ലിനിക്​, ബഹ്​റൈൻ)

Show Full Article
TAGS:health news sound 
News Summary - Do not ignore change of sound
Next Story