ചൂടുകുരു വരും ശ്രദ്ധിക്കണേ...

നല്ല ചൂടാണല്ലേ? ശ്രദ്ധിക്കണേ. ഈ ചൂടിൽ പലർക്കും ശരീരത്തിൽ ഉണ്ടാകാൻ സാധ്യതയുള്ള രോഗമാണ് ചൂടുകുരു. മാരകരോഗമൊന്നുമല്ലെങ്കിലും ദേഹമാസകലം ചൊറിച്ചിലുണ്ടാക്കുമെന്നതിനാൽ അതുമതി നമ്മളെ അസ്വസ്ഥരാക്കാൻ. ചൂടുകുരുവിനെക്കുറിച്ചും അവ പ്രതിരോധിക്കാനുള്ള ചില മാർഗങ്ങളും.

എങ്ങനെ വരുന്നു?
വിയർപ്പുഗ്രന്ഥികൾ ശരീരത്തി​​െൻറ എല്ലാ ഭാഗത്തുമുണ്ട്. ഇവയാണ് വിയർപ്പ് ഉൽപാദിപ്പിച്ച്​ പുറന്തള്ളാൻ സഹായിക്കുന്നത്. ശരീരത്തി​​െൻറ ചില ഭാഗങ്ങളിൽ ഈ വിയർപ്പ് ഗ്രന്ഥികളുടെ പ്രവർത്തനത്തിന് തടസ്സമുണ്ടാകുമ്പോഴാണ് ചൂടുകുരു പ്രത്യക്ഷപ്പെടുന്നത്.

ലക്ഷണം
ശരീരം ചുവക്കുക, ചർമത്തിൽ കുരുക്കൾ വളരുക, ചൊറിച്ചിൽ, അസ്വസ്ഥത.

എവിടെയുണ്ടാവും?
കഴുത്ത്, നെഞ്ച്, ശരീരത്തി​​െൻറ പിൻഭാഗം, അരഭാഗം, നാഭിഭാഗം തുടങ്ങിയ ഇടങ്ങളിലാണ് ചൂടുകുരു കൂടുതലായി കാണുക. 

ആർക്ക്​ ബാധിക്കും?
കുട്ടികൾ, അധ്വാനം കുറവുള്ളവർ, പ്രായമുള്ളവർ, തടിയുള്ളവർ, വിയർപ്പ് കൂടുതലുള്ളവർ.

ഒന്ന്​ ശ്രദ്ധിക്കാം

• നല്ല ചൊറിച്ചിലുണ്ടാകുമെങ്കിലും കുരുവുള്ള ഭാഗങ്ങൾ ചൊറിയരുത്. അണുക്കൾ തൊലിയുടെ അടുത്ത ഭാഗങ്ങളിലേക്ക് വ്യാപിക്കാതിരിക്കാൻ വേണ്ടിയാണിത്.
• ധാരാളം വെള്ളം കുടിച്ച്​ നിർജലീകരണ സാധ്യത ഒഴിവാക്കണം. തിളപ്പിച്ചാറിയ വെള്ളമാണ്​ ബെസ്​റ്റ്​.
• ഇറുകിയ വസ്ത്രങ്ങൾ ഇൗ ചൂടുസമയത്ത്​ പരമാവധി ഒഴിവാക്കണം. അയഞ്ഞ വസ്ത്രങ്ങളും കോട്ടൻ വസ്ത്രങ്ങളും ശീലമാക്കാം. 
• ചൂടുകുരുവുള്ള ഭാഗങ്ങളിൽ തേങ്ങാപ്പാൽ ഉപയോഗിച്ച് കഴുകുന്നത്​ നല്ലതാണ്​.
• സോപ്പുകൾ, ക്രീമുകൾ, ലോഷനുകൾ എന്നിവ പരമാവധി ഒഴിവാക്കണം.