50 കോടി ഫൈസർ വാക്​സിൻ വാങ്ങി ലോകത്തിന്​ നൽകാൻ ബൈഡന്‍റെ അമേരിക്ക

വാഷിങ്​ടൺ: 50 കോടി കോവിഡ്​ വാക്​സിൻ വാങ്ങി മറ്റു രാജ്യങ്ങൾക്ക്​ നൽകുമെന്ന്​​ യു.എസ്​ പ്രസിഡന്‍റ്​ ജോ ബൈഡൻ. ബ്രിട്ടനിൽ അടുത്ത ദിവസം ആരംഭിക്കുന്ന ജി ഏഴ്​ ഉച്ചകോടിയിൽ ഔദ്യോഗിക പ്രഖ്യാപനം നടക്കും. വലിയ വാക്​സിൻ നിർമാണ കമ്പനികളിലേറെയും അമേരിക്കയലായിട്ടും ലോക വ്യാപകമായി അനുഭവിക്കുന്ന വാക്​സിൻ കമ്മി പരിഹരിക്കാൻ ബൈഡൻ നടപടി സ്വീകരിക്കുന്നില്ലെന്ന വ്യാപക പരാതിയുടെ സാഹചര്യത്തിലാണ്​ നടപടി.

യു.എസിൽ മൊത്തം ജനസംഖ്യയുടെ പകുതിയിലേറെ പേരും ഇതിനകം വാക്​സിനേഷൻ പൂർത്തിയാക്കിയിട്ടുണ്ട്​. ബ്രിട്ടനും സമാനമായി പകുതി പേർക്കും വാക്​സിൻ നൽകിയിട്ടുണ്ട്​.

20 കോടി വാക്​സിൻ ഈ വർഷവും അവശേഷിച്ച 30 കോടി അടുത്ത വർഷവും കയറ്റി അയക്കാനാണ്​ പദ്ധതി. അവികസിത രാജ്യങ്ങളെ സഹായിക്കാനായി രൂപം നൽകിയ 'കൊവാക്​സ്​' പദ്ധതിയുടെ ഭാഗമായാകും വാക്​സിൻ വിതരണം. 92 പാവപ്പെട്ട രാജ്യങ്ങൾക്കും ആഫ്രിക്കൻ യൂനിയനുമാണ്​ ഇവ കൈമാറുക. നേരത്തെ 30 കോടി വാക്​സിൻ സ്വരൂപിക്കുമെന്നത്​ കൂടി ചേർത്തുവായിച്ചാൽ​ മൊത്തം സമാഹരിക്കുക 80 കോടി വാക്​സിനാകും. ഇന്ത്യക്ക്​ 60 ലക്ഷം വാക്​സിൻ നൽകുമെന്ന്​ നേരത്തെ പ്രഖ്യാപിച്ചിരുന്നു.

ആഗോള രാജ്യങ്ങൾക്കിടയിൽ ട്രംപ്​ നഷ്​ടപ്പെടുത്തിയ അമേരിക്കൻ സദ്​പേര്​ വാക്​സിൻ വിതരണംവഴി തിരിച്ചുപിടിക്കുകയാണ്​ ഇതിന്‍റെ ലക്ഷ്യം.